Езекиел 15 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Судзгӕ сӕнӕфсир бӕлас — Израилы фидӕны нысан

¹ Дунедарӕг мын загъта:

² «Адӕймаджы фырт! Сӕнӕфсир бӕлас хъӕды ӕппӕт бӕлӕстӕй цӕмӕй хуыздӕр у, йӕ къалиутӕ дӕр цас хуыздӕр сты?

³ Исты дзаумайӕн дзы лыггаг райсынц, мыййаг? Зӕгъӕм, къӕбӕлӕн — исты йыл ӕрцауындзынмӕ?

⁴ Нӕ, фӕлӕ арты сыгъд ӕрцӕуы. Йӕ дыууӕ кӕроны куы бавзалы вӕййынц ӕмӕ йӕ астӕуыл арт куы сирвӕзы, уӕд ма цӕмӕн фӕбӕззы?

⁵ Ӕнӕхъӕн куы уыд, уӕд дӕр куы ницӕмӕн бӕззыд, уӕд ма, арт ӕй куы аныхъуырдта ӕмӕ куы бавзалы ис, уӕд цӕмӕн бӕззы?

⁶ Уымӕ гӕсгӕ афтӕ зӕгъы Дунедарӕг Хуыцау: хъӕды бӕлӕсты ’хсӕн сӕнӕфсир бӕласы зӕнг арты куыд басыгътон, афтӕ Йерусалимы цӕрджыты дӕр арты басудздзынӕн.

⁷ Ме ’ргом сӕ ныхмӕ сараздзынӕн, ӕмӕ иу артӕй раирвӕздзысты, фӕлӕ сӕ иннӕ арт аныхъуырдзӕн, ӕмӕ сымах базондзыстут, Ӕз Дунедарӕг кӕй дӕн, уый — Ме ’ргом сӕ ныхмӕ куы саразон, уӕд.

⁸ Ӕз ацы зӕхх федзӕрӕг кӕндзынӕн, сӕ зӕрдӕ Мыл кӕй сивтой, уый тыххӕй», — зӕгъы Дунедарӕг Хуыцау.