Езекиел 1 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Езекиел уыны Хуыцауы кад

¹ Кевары доны был хаст адӕмимӕ куы цардтӕн — ӕртынӕм азы, цыппӕрӕм мӕйы фӕндзӕм бон — уӕд арвы дуар байгом ис, ӕмӕ мын Хуыцау равдыста цӕстылуайӕн.

² Мӕйы фӕндзӕм бон (Йехониайы уацары куы акодтой, уымӕн йӕ фӕндзӕм аз),

³ халдейаг зӕххыл, Кевары доны был, Дунедарӕг Йӕ ныхас фехъусын кодта сауджын Езекиелӕн, Бузийы фыртӕн. Уыцы ран ыл Дунедарӕджы къух бандзӕвыд.

⁴ Ӕз федтон: цӕгатӕрдыгӕй ӕрбацӕуы зилгӕ уад — тынг стыр ӕврагъ, уый сыгъди артау, йӕ алыварс тӕмӕнтӕ калдта.

⁵ Арты астӕуӕй калди налхъуыт-налмасау цӕхӕркалгӕ рухс; арты астӕу зынди чидӕртӕ — цыппар удгоймаджы хуызӕн. Уыдон уыдысты адӕймаджы ӕнгӕс,

⁶ фӕлӕ дзы алкӕмӕн дӕр уыди цыппар цӕсгомы ӕмӕ цыппар базыры.

⁷ Сӕ къӕхтӕ уыдысты ӕмраст, сӕ къахы фадтӕ — стуры фадты хуызӕн, цӕхӕр сын калдтой ӕрттиваг ӕрхуыйау.

⁸ Сӕ базырты бын цыппарӕрдыгӕй уыдис адӕймаджы къухтӕ. Сӕ цыппарӕн дӕр уыди цӕсгӕмттӕ ӕмӕ базыртӕ,

⁹ сӕ базыртӕ кӕрӕдзиуыл ӕндзӕвыдысты. Цӕугӕ-цӕуын фӕстӕмӕ нӕ кастысты, алчидӕр дзы цыди, йӕ цӕсгом кӕцырдӕм арӕзт уыди, уыцырдӕм.

¹⁰ Алкӕмӕн дӕр дзы рахизӕрдыгӕй уыдис адӕймаджы цӕсгом, стӕй домбайы цӕсгом, галиуӕрдыгӕй та — галы цӕсгом; ноджы ма дзы алкӕмӕн дӕр уыди цӕргӕсы цӕсгом дӕр.

¹¹ Ахӕм уыдысты сӕ цӕсгӕмттӕ. Сӕ базыртӕ та — уӕлӕрдӕм тыгъд, дыууӕ базырӕй ӕндзӕвыдысты сӕ кӕрӕдзиуыл, иннӕ дыууӕйӕ ӕмбӕрзтой сӕ гуыр.

¹² Алчидӕр дзы цыди, йӕ цӕсгом кӕцырдӕм арӕзт уыди, уыцырдӕм, Уд сын кӕдӕм амыдта, уырдӕм; цӕугӕ-цӕуын фӕстӕмӕ нӕ кастысты.

¹³ Уыцы удгоймӕгтӕ уыдысты судзгӕ арты цӕхӕры хуызӕн, цырагъӕнгӕс. Се ’хсӕн цыди арт ӕмӕ пиллон уагъта, арвӕрттывдтӕ-иу рацыдис артӕй.

¹⁴ Удгоймӕгтӕ дӕр арвӕрттывдау тахтысты дыууӕрдӕм.

¹⁵ Ӕз сӕм кастӕн, ӕмӕ мӕнӕ зӕххыл, уыцы цыппарцӕсгомджын удгоймӕгтӕн сӕ алкӕй раз дӕр — фӕйнӕ цалхы.

¹⁶ Цӕлхытӕн сӕ хуыз, сӕ арӕзт — хризолиты ӕнгӕс. Цыппар цалхы дӕр сӕ хуызмӕ гӕсгӕ уыдысты иухуызон: алкӕцы дӕр дзы, цыма цалх цалхы мидӕг уыд, афтӕ конд уыди.

¹⁷ Куы-иу сызмӕлыдысты, уӕд-иу сӕ бон уыдис алырдӕм дӕр ацӕуын, сӕ цыппарӕй алкӕмӕн дӕр йе ’ргом кӕдӕм здӕхт уыд, уымӕ гӕсгӕ; цӕугӕ-цӕуын фӕстӕмӕ нӕ кастысты.

¹⁸ Сӕ чъилтӕ уыдысты бӕрзонд ӕмӕ тасӕфтауӕг; сӕ цыппарӕн дӕр сӕ чъилтыл алырдыгӕй уыди цӕстытӕ.

¹⁹ Удгоймӕгтӕ-иу куы сызмӕлыдысты, уӕд-иу, сӕ разы цы цӕлхытӕ уыд, уыдон дӕр сӕхи хӕрдмӕ систой семӕ; удгоймӕгтӕ-иу сӕхи зӕххӕй хӕрдмӕ куы истой, уӕд-иу цӕлхытӕ дӕр уӕлӕмӕ ссыдысты.

²⁰ Удгоймӕгтӕ цыдысты, Уд кӕцырдӕм амыдта, уыцырдӕм. Уд-иу кӕдӕмфӕнды ма амонӕд — цӕлхытӕ дӕр-иу сӕхи хӕрдмӕ систой удгоймӕгтимӕ, уымӕн ӕмӕ удгоймӕгты Уд цӕлхыты мидӕг дӕр уыди.

²¹ Удгоймӕгтӕ-иу куы азмӕлыдысты, уӕд-иу адон дӕр семӕ; уыдон-иу куы ’рлӕууыдысты, уӕд-иу адон дӕр афтӕ. Уыдон-иу сӕхи зӕххӕй уӕлӕмӕ куы систой, уӕд-иу цӕлхытӕ дӕр семӕ хӕрдмӕ ссыдысты, уымӕн ӕмӕ удгоймӕгты Уд цӕлхыты мидӕг дӕр уыди.

²² Удгоймӕгты сӕрмӕ уыди цыдӕр — ӕрдынӕджы ’нгӕс, тасӕфтауӕг кристаллы хуызӕн, уый йӕхи айтыгъта сӕ сӕрмӕ.

²³ Ӕрдынӕджы бын, кӕрӕдзиуыл ӕндзӕвгӕйӕ, хӕрдмӕ ссыдысты базыртӕ. Дыууӕ базырӕй та алы удгоймаг дӕр ӕмбӕрзта йӕ гуыр.

²⁴ Куы-иу рацӕйцыдысты, уӕд-иу сын ӕз сӕ базырты уынӕр хъуыстон денджызы уынӕрау, Ӕппӕтхъомысы хъӕлӕсау, хӕстон асадӕны тохы хъӕрау. Куы-иу ӕрлӕууыдысты, уӕд-иу сӕ базыртӕ ӕруагътой.

²⁵ Сӕ сӕрмӕ цы ӕрдынӕг уыд, уырдыгӕй хъуысти хъӕлӕс. Удгоймӕгтӕ-иу куы ’рлӕууыдысты, уӕд-иу сӕ базыртӕ ӕруагътой.

²⁶ Сӕ сӕрмӕ цы ӕрдынӕг уыд, уый уӕлӕ уыди цыдӕр, сапфиртӕй конд паддзахы бадӕны ӕнгӕс, йӕ уӕлӕ та бадти чидӕр, адӕймаджы хуызӕн.

²⁷ Ӕз федтон: астӕуӕй уӕлӕмӕ уыди цӕхӕркалгӕ згъӕры ӕнгӕс, пиллон калдта артау, астӕуӕй дӕлӕмӕ та — арты хуызӕн, йӕ алыварс — тӕмӕнкалгӕ рухс.

²⁸ Къӕвдабон арвыл ӕврӕгъты цы арвӕрдын фӕзыны, уый ӕнгӕс уыди рухс Йӕ алыварс.