Даниил 6 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Хуыцау фервӕзын кодта Даниилы

¹ Дарий йӕ паддзахад ӕхсӕзыссӕдз лӕджы бар бакодта

² ӕмӕ сын сӕ сӕргъы ӕртӕ стыр хицауы сӕвӕрдта. Паддзахы барджынтӕ хъуамӕ стыр хицӕутты раз дзуапп лӕвӕрдтаиккой, цӕмӕй паддзахады мацы знаггад ӕрцӕуа. Ӕртӕ хицауӕй иу уыди Даниил.

³ Цыбыр рӕстӕгмӕ барджынтӕ ӕмӕ стыр хицӕутты ’хсӕн бӕрӕг дарын райдыдта, уымӕн ӕмӕ хайджын уыди алӕмӕты курдиатӕй. Дарийы фӕндыд Даниилы ӕгас паддзахады сӕргъы сӕвӕрын.

⁴ Стыр хицӕуттӕ ӕмӕ барджынтӕ Даниилмӕ сӕ хъус дардтой: паддзахады ныхмӕ исты фыдракӕнд кӕд сараздзӕн, уымӕ ӕнхъӕлмӕ кастысты, цӕмӕй йӕ фӕазымджын кӕной. Фӕлӕ Даниил уыдис иузӕрдион йӕ паддзахыл, ӕмӕ йӕм сӕ бон исты аипп ссарын нӕ уыди.

⁵ Уӕд загътой: «Мах ацы Даниилмӕ уайдзӕфы аккагӕй ницы ссардзыстӕм, кӕд ма, йӕ Хуыцауы ӕгъдауыл ӕнувыд кӕй у, уый тыххӕй йӕ фӕзылынджын кӕнӕм, ӕндӕр».

⁶ Уыйадыл барджынтӕ ӕмӕ стыр хицӕуттӕ иууылдӕр паддзахмӕ бацыдысты ӕмӕ загътой: «Бирӕ азты нын дзӕбӕхӕй цӕр, паддзах Дарий!

⁷ Дӕ паддзахады барджынтӕ, стыр хицӕуттӕ, уынаффӕйы лӕгтӕ ӕмӕ уллутӕ ахсджиагыл нымайынц, цӕмӕй паддзах ахӕм бардзырд ратта: дӕс ӕмӕ ссӕдз боны дӕргъы хуыцаумӕ мачи скувӕд, стӕй дӕу йеддӕмӕ ӕндӕр адӕймагмӕ дӕр мачи бацӕуӕд курӕг. Чи нӕ байхъуса, уый та домбӕйтты хъоргъмӕ ӕппӕрст ӕрцӕуӕд.

⁸ Паддзах, уӕдӕ ныр ацы бардзырдыл дӕ къух ӕрӕвӕр, цӕмӕй, мидиӕгтӕ ӕмӕ персайнӕгты ӕгъдӕуттӕн аивӕн куыд нӕй, афтӕ уымӕн дӕр фехалӕн ма уа».

⁹ Паддзах Дарий сразы ӕмӕ бардзырдыл йӕ къух ӕрӕвӕрдта.

Даниил домбӕйтты хъоргъы аирвӕзт

¹⁰ Кӕд Даниил паддзахы бардзырд зыдта, уӕддӕр-иу йӕ хӕдзары уӕллаг уатмӕ ссыди; йӕ уаты рудзгуытӕ арӕзт уыдысты Йерусалимы ’рдӕм. Бон ӕртӕ хатты-иу йӕ зонгуытыл ӕрлӕууыд ӕмӕ раздӕрау куывта ӕмӕ арфӕ кодта йӕ Хуыцауӕн.

¹¹ Иуахӕмы паддзахы барджынтӕ Даниилы йӕ зонгуытыл кувгӕйӕ баййӕфтой.

¹² Ӕмӕ уӕд паддзахмӕ бацыдысты ӕмӕ йын йӕ бардзырд ӕрлӕууын кодтой йӕ зӕрдыл: «Паддзах, ды дӕхи къухӕй сфидар кодтай дӕ бардзырд: дӕс ӕмӕ ссӕдз боны дӕргъы хуыцаумӕ кӕнӕ дӕу йеддӕмӕ ӕндӕр адӕймагмӕ дӕр чи скува, уый хъуамӕ домбӕйтты хъоргъы ӕппӕрст ӕрцӕуа». Паддзах сын дзуапп радта: «Мидиӕгтӕ ӕмӕ персайнӕгты ӕгъдӕуттӕн аивӕн куыд нӕй, афтӕ фидар у уыцы бардзырд дӕр».

¹³ Уыдон Дарийӕн загътой: «Паддзах, Иудейы бӕстӕй кӕй ӕрбакодтой, уыцы адӕмӕй иу, Даниил, дӕхи дӕр ӕмӕ дын дӕ бардзырд дӕр ницӕмӕ дары, бон ӕртӕ хатты кувы йӕ Хуыцаумӕ».

¹⁴ Паддзах уый куы фехъуыста, уӕд катайы бацыд ӕмӕ хурныгуылдмӕ Даниилы фервӕзын кӕныныл архайдта.

¹⁵ Фӕлӕ та йӕм йӕ барджынтӕ ногӕй бацыдысты ӕмӕ йын загътой: «Ды зоныс, паддзах, мидиӕгтӕ ӕмӕ персайнӕгты закъонмӕ гӕсгӕ, паддзах йӕ къух кӕуыл бафысса, уыцы бардзырдӕн аивӕн нӕй».

¹⁶ Уӕд паддзах Даниилы ӕрбакӕнын кодта, цӕмӕй йӕ домбӕйтты хъоргъы ныппарой. Даниилӕн та загъта: «Ӕнувыдӕй Кӕмӕн лӕггад кӕныс, уыцы Хуыцау дӕ Йӕхӕдӕг фервӕзын кӕнӕд!»

¹⁷ Ӕмӕ дур ӕрбахастой ӕмӕ йӕ хъоргъмӕ ныххизӕныл ныффӕлдӕхтой. Паддзах ыл йӕхи ӕмӕ йе ’лдӕртты къухдарӕнтӕй мыхуыртӕ сӕвӕрдта, — Даниилӕн цы тӕрхон рахастой, уымӕн аивӕн кӕй нӕй, уый нысанӕн.

¹⁸ Дарий йӕ галуанмӕ куы ӕрбаздӕхт, уӕд йӕ дзыхмӕ хойраг нал схаста. Хуыссӕг ӕй нал ахста, ӕмӕ уыцы ӕхсӕв йӕ номылустыты дӕр ӕрбакӕнын нӕ бауагъта.

¹⁹ Сӕумӕцъӕхӕй фестад ӕмӕ домбӕйтты хъоргъмӕ рӕвдз ауади.

²⁰ Хъоргъмӕ куы бахӕццӕ, уӕд Даниилмӕ ӕнкъард хъӕлӕсӕй ныдздзырдта: «Даниил, цардӕгас Хуыцауы цагъар! Ӕнувыдӕй Кӕмӕн лӕггад кӕныс, уыцы Хуыцау дӕ домбӕйтты дзыхӕй фервӕзын кодта?»

²¹ Даниил дзуапп радта: «Паддзах, ӕнусмӕ нын цӕр!

²² Мӕ Хуыцау рарвыста Йӕ зӕды, ӕмӕ уый домбӕйтты дзыхтыл цъутта сӕвӕрдта. Ницы знаггад мын ракодтой, уымӕн ӕмӕ мӕ Хуыцауы раз сыгъдӕг разындтӕн, стӕй дӕ разы дӕр, паддзах, азымджын нӕ дӕн».

²³ Уӕд паддзахы цинӕн кӕрон нал уыд, ӕмӕ Даниилы хъоргъӕй сисын кодта. Куы йӕ систой, уӕд ыл иу цъӕррӕмыхст дӕр нӕ разынд, уымӕн ӕмӕ уыдис иузӕрдион йӕ Хуыцауыл.

²⁴ Паддзах бардзырд радта, цӕмӕй, Даниилы фӕазымджын кӕныныл чи архайдта, уыцы лӕгты ӕд устытӕ ӕмӕ ӕд сывӕллӕттӕ домбӕйтты хъоргъы ныппарой. Хъоргъы бынмӕ нӕма ныххӕццӕ сты, афтӕ сӕм домбӕйттӕ фӕлӕбурдтой ӕмӕ сын се стджытӕ дӕр ма бахсыдтой.

²⁵ Уӕд Дарий фехъусын кодта: «Дунейы адӕмтӕ, адӕмыхӕттытӕ ӕмӕ алы ’взӕгтыл дзурджытӕ! Фарн уӕм бадзурӕд!

²⁶ Мӕ паддзахады цӕрджытӕ! Тӕрсут ӕмӕ ӕмризӕджы ризут Даниилы Хуыцауы раз! Уый у цардӕгас ӕмӕ ӕнусон Хуыцау! Йӕ паддзахадӕн фесӕфӕн нӕй, ӕмӕ Йӕ хицаудзинадӕн кӕрон никуы ӕрцӕудзӕн!

²⁷ Уый у ирвӕзынгӕнӕг, аразы диссӕгтӕ ӕмӕ фенын кӕны ӕвдисӕйнӕгтӕ уӕларвыл ӕмӕ зӕххыл. Йӕ фӕрцы Даниил домбӕйтты дзӕмбытӕй аирвӕзт».

²⁸ Дарий ӕмӕ персайнаг паддзах Киры заман дӕр Даниил паддзахады ахста зынгӕ бынат, царди фӕрнӕйдзагӕй.