Апостолты хъуыддӕгтӕ 27 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Павел цӕуы Роммӕ

¹ Италимӕ кӕй хъуамӕ ацӕуӕм, уыцы уынаффӕ куы рахастӕуыд, уӕд Павелы ӕмӕ ма ӕндӕр ахӕстыты радтой сӕдӕйыхицау Юлийы къухмӕ; уый уыди кесӕры ӕфсӕддон хайӕ.

² Мах сбадтыстӕм адрамитаг науыл ӕмӕ араст стӕм. Нау йӕ фӕндагыл хъуамӕ баздӕхтаид Азийы наулӕууӕнтӕм. Немӕ уыдис македойнаг Аристарх, Фессалоникӕйы сахарӕй.

³ Дыккаг бон бахӕццӕ стӕм Сидонмӕ. Юлий хорз цӕстӕй ракаст Павелмӕ, радта йын йӕ хӕлӕрттӕм ацӕуыны фадат, цӕмӕй йыл баузӕлой.

⁴ Уырдыгӕй араст стӕм дарддӕр; Кипры чъылдыммӕ бамбӕхстыстӕм дымгӕйӕ, уымӕн ӕмӕ дымдта нӕ ныхмӕ.

⁵ Килики ӕмӕ Памфилийы рӕзты ахызтыстӕм денджызыл ӕмӕ бахӕццӕ стӕм ликиаг сахар Мирамӕ.

⁶ Уым сӕдӕйыхицау ссардта, Италимӕ чи цыд, ахӕм александриаг нау, ӕмӕ нӕ сбадын кодта ууыл.

⁷ Дзӕвгар рӕстӕг цыдыстӕм сындӕг ӕмӕ тыхамӕлттӕй бахӕццӕ стӕм Книдмӕ. Дымгӕ нӕ размӕ цӕуын кӕй нӕ уагъта, уымӕ гӕсгӕ ахызтыстӕм Салмоны рӕзты ӕмӕ, Криты чъылдыммӕ дымгӕйӕ бамбӕхсгӕйӕ, цыдыстӕм дарддӕр.

⁸ Былмӕ зынтӕй ӕввахс кодтам ӕмӕ бахӕццӕ стӕм, «Сабыр Наулӕууӕнтӕ» кӕй хонынц, уырдӕм, Ласейы сахармӕ хӕстӕг.

⁹ Уӕдмӕ рацыди бирӕ рӕстӕг, ком дарыны афон дӕр аивгъуыдта, ӕмӕ науы цӕуын сси тӕссаг. Уымӕ гӕсгӕ Павел дзырдта:

¹⁰ «Хорз адӕм, мӕнмӕ гӕсгӕ нӕм фӕндагыл ӕнхъӕлмӕ кӕсы бӕллӕх, ӕмӕ стыр зиан ӕрцӕудзӕн ӕрмӕст ласинӕгтыл ӕмӕ науыл нӕ, фӕлӕ нӕхиуыл дӕр».

¹¹ Фӕлӕ сӕдӕйыхицау, Павел цы дзырдта, уымӕй наутӕрӕгыл ӕмӕ науы хицауыл фылдӕр ӕууӕндыд.

¹² Наулӕууӕн зымӕгиуатӕн кӕй нӕ бӕззыд, уымӕ гӕсгӕ сӕ фылдӕры фӕндыди, гӕнӕн ӕмӕ амалӕй, критаг наулӕууӕн Фениксмӕ бафтын ӕмӕ зымӕг уым арвитын. Уыцы наулӕууӕнӕн йе ’ргом арӕзт у хуссар-ныгуылӕн ӕмӕ цӕгат-ныгуылӕнмӕ.

Уад

¹³ Хуссайраг рог дымгӕ куы радымдта, уӕд ӕнхъӕлдтой, цӕмӕ бӕллыдысты, уый сӕ къухы бафтыд; систой науӕнгуыр ӕмӕ араст сты Криты былгӕрӕтты.

¹⁴ Фӕлӕ уалынджы сакъадахы ’рдыгӕй ӕрбадымдта цӕгат-скӕсӕйнаг дымгӕ; евракилон ӕй хонынц.

¹⁵ Нау йӕ уӕлныхты систа, ӕмӕ уый йӕ ныхмӕ цӕуын нал фӕрӕзта. Нӕ бон ницы уыди, ӕмӕ нӕ дымгӕ хаста, кӕдӕм ӕй фӕндыд, уырдӕм.

¹⁶ Февзӕрдыстӕм, Кавда кӕй хонынц, уыцы сакъадахы цур. Сакъадах нӕ иу цасдӕр бахызта дымгӕйӕ, ӕмӕ тыхамӕлттӕй науы бӕлӕгъ бахъахъхъӕдтам.

¹⁷ Наудзогтӕ йӕ куы систой наумӕ, уӕд, фӕфидар ӕй кӕныны тыххӕй, бӕндӕнтӕй науы фӕрстӕ ӕрбабастой. Дымгӕ науы цӕмӕй Сиртмӕ ма ахӕсса ӕмӕ уым тӕнӕджы ма ныссӕдза, уый тыххӕй ӕруагътой наупӕлӕз, ӕмӕ нӕ дымгӕ йӕхӕдӕг рахӕсс-бахӕсс кодта.

¹⁸ Уад нӕ ӕгъатырӕй кӕй хоста, уымӕ гӕсгӕ дыккаг бон денджызмӕ нӕ ласинӕгтӕ калын райдыдтам.

¹⁹ Ӕртыккаг бон та науы гӕрзтӕ ракалдтам.

²⁰ Бирӕ бонты дӕргъы нӕдӕр хур, нӕдӕр стъалытӕ кӕй нӕ зындысты, уадӕн дӕр ӕрӕнцайӕн кӕй нал уыд, уымӕ гӕсгӕ фервӕзыныл нӕ зӕрдӕ нал дардтам.

²¹ Адӕм хойраджы хъӕстӕ рагӕй нал фесты. Павел рацыд сӕ размӕ ӕмӕ загъта: «Хорз адӕм, хъуыди уӕ мӕ коммӕ бакӕсын ӕмӕ Криты баззайын. Уӕд ацы бӕллӕх нӕ бавзӕрстаиккам ӕмӕ ныл зиан не ’рцыдаид.

²² Ныр та уӕм сидын: уӕ ныфс ма асӕттӕд! Сымахӕй иу дӕр нӕ фесӕфдзӕн, ӕрмӕстдӕр — нау.

²³ Ӕз Кӕй дӕн ӕмӕ Кӕмӕн лӕггад кӕнын, Уыцы Хуыцауы зӕд мӕм фӕзынди дысон

²⁴ ӕмӕ мын загъта: „Ма тӕрс, Павел! Ды хъуамӕ ӕрлӕууай кесӕры раз, ӕмӕ дын Хуыцау балӕвар кодта, демӕ чи цӕуы, уыдоны иууылдӕр“.

²⁵ Уӕдӕ ма тӕрсут, хорз адӕм, ӕз Хуыцауыл ӕууӕндын: куыд мын загъдӕуыд, афтӕ уыдзӕн.

²⁶ Уад нӕ хъуамӕ раппара цавӕрдӕр сакъадахмӕ».

²⁷ Цыппӕрдӕсӕм ӕхсӕв нӕ уылӕнтӕ Адриатикӕйы денджызы куы хастой, уӕд ӕмбисӕхсӕвмӕ хӕстӕг наудзогтӕ банкъардтой, зӕхмӕ кӕй ӕввахс кӕнӕм, уый.

²⁸ Куы сбарстой, уӕд денджыз разынд ссӕдз ивазны ӕрфӕн; стӕй та йӕ чысыл дарддӕр сбарстой, ӕмӕ уыди фынддӕс ивазны ӕрфӕн.

²⁹ Нау къӕдзӕхтӕм куы бахӕсса, уымӕй тӕссаг кӕй уыди, уымӕ гӕсгӕ фӕстӕрдыгӕй ӕруагътой цыппар науӕнгуыры ӕмӕ куывтой, цӕмӕй тагъддӕр ӕрбабон уа.

³⁰ Наудзогтӕ хъавыдысты науӕй алидзынмӕ ӕмӕ, разӕрдыгӕй науӕнгуыр ӕрӕппарыны ӕфсонӕй, бӕлӕгъ ӕруагътой денджызмӕ.

³¹ Уӕд Павел сӕдӕйыхицауӕн ӕмӕ ӕфсӕддонтӕн загъта: «Уыдон науыл куынӕ баззайой, уӕд уын фервӕзӕн нӕй».

³² Уӕд ӕфсӕддонтӕ акъуырдтой бӕлӕгъы бӕттӕнтӕ, ӕмӕ бӕлӕгъ денджызмӕ ныххауд.

³³ Боныцъӕхты размӕ Павел се ’ппӕтмӕ дӕр хатыд бахӕрыны тыххӕй: «Цыппӕрдӕсӕм бон ӕнхъӕлмӕ кӕсут ӕмӕ хойраджы хъӕстӕ нӕма фестут.

³⁴ Уымӕ гӕсгӕ уӕм хатын, цӕмӕй бахӕрат — уый ахъаз уыдзӕни уӕ фервӕзынӕн. Иу ӕрду дӕр уӕ никӕй сӕрӕй фӕхъӕудзӕн».

³⁵ Уыцы ныхӕсты фӕстӕ Павел райста дзул, се ’ппӕты раз арфӕ ракодта Хуыцауӕн, асаста йӕ ӕмӕ райдыдта хӕрын.

³⁶ Уӕд се ’ппӕт дӕр фӕныфсджын сты ӕмӕ бахордтой.

³⁷ Науыл ӕдӕппӕтӕй уыдыстӕм дыууӕсӕдӕ ӕвдай ӕхсӕз адӕймаджы.

³⁸ Куы бафсӕстысты, уӕд нау фӕрогдӕр кӕныны тыххӕй мӕнӕу акалдтой денджызмӕ.

Науы сӕфт

³⁹ Куы сбон ис, уӕд, цы зӕхх у, уый нӕ базыдтой, фӕлӕ змисджын доны былыл федтой донбакӕлӕн. Бауынаффӕ кодтой гӕнӕн ӕмӕ амалӕй нау уырдӕм батӕрын ӕмӕ йӕ змисы ныссадзын.

⁴⁰ Акъуырдтой науӕнгуыртӕ ӕмӕ сӕ ныууагътой денджызы, суӕгъд кодтой науыздахӕнтӕ, систой раззаг наупӕлӕз дымгӕмӕ ӕмӕ сӕ ных сарӕзтой былмӕ.

⁴¹ Фӕлӕ бахаудтой донбылмӕ, ӕмӕ нау тӕнӕджы ныссагъди. Йӕ фындз аныгъуылди зӕххы ӕмӕ нал змӕлыд, йӕ фӕрстӕ та йын уылӕнтӕ пырх кодтой.

⁴² Ӕфсӕддонтӕм фӕзынд ахӕстыты амарыны фӕнд, куыд ничи дзы аленк кӕна ӕмӕ алидза, афтӕ.

⁴³ Фӕлӕ сӕдӕйыхицауы фӕндыди Павелы фервӕзын кӕнын, ӕмӕ сӕ нӕ бауагъта. Бардзырд радта, цӕмӕй, ленк кӕнын чи зыдта, уыдон ӕппӕты разӕй ныггӕпп кӕной денджызмӕ ӕмӕ былмӕ рахизой;

⁴⁴ иннӕтӕ та исты амӕлттӕ кӕной фервӕзынӕн — чи фӕйнӕгыл, чи та науы гӕбазыл. Афтӕмӕй не ’ппӕт дӕр раирвӕзтыстӕм зӕхмӕ.