Апостолты хъуыддӕгтӕ 20 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Павел Македони ӕмӕ Бердзены

¹ Змӕст куы ӕрсабыр ис, уӕд Павел ахуыргӕнинӕгты ӕрӕмбырд кодта ӕмӕ сӕ ныфс бауагъта, хӕрзбон сын загъта ӕмӕ араст Македонимӕ.

² Йӕ балцы рӕстӕг йӕ ныхасӕй ныфс лӕвӕрдта уырнджытӕн. Афтӕмӕй бахӕццӕ Бердзенмӕ.

³ Уым фӕци ӕртӕ мӕйы. Уырдыгӕй Сиримӕ науы ацӕуынмӕ куы хъавыд, уӕд иудейӕгтӕ йӕ ныхмӕ сусӕгвӕнд скодтой, ӕмӕ, уый базонгӕйӕ, Македонийыл аздӕхын сфӕнд кодта.

⁴ Павелимӕ [Асимӕ] уыдысты вериаг Сопатр — Пирры фырт, фессалоникӕгтӕ Аристарх ӕмӕ Секунд, дервиаг Гайос ӕмӕ Тимофей, стӕй асиӕгтӕ Тихик ӕмӕ Трофим.

⁵ Уыдон ацыдысты нӕ разӕй ӕмӕ нӕм ӕнхъӕлмӕ кастысты Троадӕйы.

⁶ Мах та Донгонд дзулты бӕрӕгбоны фӕстӕ науы ацыдыстӕм Филиппты сахарӕй, фондз боны фӕстӕ семӕ баиу стӕм Троадӕйы ӕмӕ дзы фестӕм авд боны.

⁷ Къуырийы фыццаг бон дзулсастмӕ куы ӕрӕмбырд стӕм, уӕд Павел ныхас кодта ахуыргӕнинӕгтимӕ. Дыккаг бон ӕм ацӕуыны фӕнд кӕй уыд, уымӕ гӕсгӕ йӕ ныхас ӕмбисӕхсӕвмӕ дӕр нӕ фӕци.

⁸ Кӕм ӕрӕмбырд стӕм, уыцы уӕллаг уаты сыгъди бирӕ цырӕгътӕ.

⁹ Иу лӕппу, йӕ ном — Евтих, бадти рудзынджы тӕрвазыл. Павелы дӕргъвӕтин ныхасы рӕстӕг ыл хуыссӕг фӕтых ис, тарф фынӕй баци ӕмӕ ӕртыккаг уӕладзыгӕй рахауд. Куы йыл схӕцыдысты, уӕд разынди мард.

¹⁰ Павел ӕрцыд, ныддӕлгом ыл ӕмӕ йын ныхъхъӕбыс кодта: «Ма тыхсут, — загъта, — йӕ уд йӕ мидӕг ис».

¹¹ Фӕстӕмӕ уатмӕ куы ссыди, уӕд дзул ӕрсаста ӕмӕ бахордта. Сӕумӕцъӕхтӕм фӕныхас кодта, стӕй ацыд.

¹² Ныр лӕппуйы та сӕхимӕ удӕгасӕй акодтой, ӕмӕ уый се ’ппӕтӕн дӕр стыр цин уыди.

¹³ Мах ацыдыстӕм разӕй, сбадтыстӕм науы ӕмӕ ацыдыстӕм Ассмӕ, цӕмӕй Павелы уырдыгӕй немӕ ракӕнӕм. Уымӕн ӕмӕ нын йӕхӕдӕг афтӕ бафӕдзӕхста, йӕ зӕрды фистӕгӕй ацӕуын кӕй уыди, уый тыххӕй.

¹⁴ Павел Ассы баиу немӕ, сбадти нӕ науы, ӕмӕ ӕрцыдыстӕм Митиленӕмӕ.

¹⁵ Уырдыгӕй араст стӕм ӕмӕ иннӕ бон Хиосы цурты фӕцӕйцыдыстӕм; дыккаг бон бахӕццӕ стӕм Самосмӕ [фестӕм Трогиллийы] ӕмӕ иннӕ бон ӕрцыдыстӕм Милетмӕ.

¹⁶ Павелы Эфесмӕ бацӕуын нӕ фӕндыд, цӕмӕй Азийы ма бафӕстиат уа. Тагъд кодта, уымӕн ӕмӕ йӕ фӕндыд, кӕд бантыса, уӕд Къуыриты бӕрӕгбонмӕ Йерусалиммӕ бахӕццӕ уӕвын.

Эфесы аргъуаны хистӕртимӕ фембӕлд

¹⁷ Павел Милетӕй Эфесмӕ арвыста аргъуаны хистӕрты ӕрхонынмӕ.

¹⁸ Куы йӕм ӕрцыдысты, уӕд сын загъта: «Сымах зонут, ӕз Асимӕ куы ӕрцыдтӕн, уӕдӕй фӕстӕмӕ уыдтӕн уемӕ.

¹⁹ Сӕрныллӕгӕй ӕмӕ цӕссыг калгӕйӕ куыстон Бардарӕгӕн, иудейӕгты фыдвӕндты аххосӕй тухӕнтӕ ӕвзаргӕйӕ.

²⁰ Сымах зонут, ӕз кӕй ницы басусӕг кодтон, ахъаз уын цы уыди, уымӕй. Ӕппӕт уыдӕттӕ уын амыдтон ӕмӕ уӕ ахуыр кодтон адӕмы раз ӕмӕ хӕдзаргай.

²¹ Иудейӕгтӕм дӕр ӕмӕ муртаттӕгтӕм дӕр сидтӕн Хуыцауы раз сӕ тӕригъӕдтыл ӕрфӕсмон кӕнынмӕ ӕмӕ нӕ Бардарӕг Йесойыл ӕууӕндынмӕ.

²² Ныр та мӕ Сыгъдӕг Уд ӕрвиты Йерусалиммӕ, ӕмӕ мыл уым цы ’рцӕудзӕни, уый нӕ зонын.

²³ Ӕрмӕст мын Сыгъдӕг Уд алы сахары дӕр раргом кӕны, ахӕстон ӕмӕ мӕм хъизӕмӕрттӕ кӕй ӕнхъӕлмӕ кӕсынц, уый.

²⁴ Фӕлӕ мӕнмӕ ницы кӕсы мӕ цард, ӕрмӕст бӕллын мӕ фӕндагыл кӕронмӕ ацӕуынмӕ ӕмӕ мын Бардарӕг Йесо цы куыст бафӕдзӕхста, уый кӕронмӕ фӕуынмӕ — Хуыцауы хорзӕхы тыххӕй Фарны Уац адӕммӕ фӕхӕццӕ кӕнынмӕ.

²⁵ Ӕмӕ ныр зонын, сымах иууылдӕр — кӕй ӕхсӕн цардтӕн ӕмӕ Хуыцауы Паддзахады тыххӕй кӕмӕн дзырдтон — мӕн кӕй нал фендзыстут, уый.

²⁶ Уымӕ гӕсгӕ уын ӕз абон зӕгъын: нырӕй фӕстӕмӕ ӕз сӕрибар дӕн уӕ алкӕй фидӕны цард кӕнӕ мӕлӕтӕй.

²⁷ Уымӕн ӕмӕ ӕз алцыдӕр сарӕзтон, цӕмӕй уын Хуыцауы фӕндон фехъусын кӕнон ӕххӕстӕй.

²⁸ Уӕдӕ кӕсут уӕхимӕ ӕмӕ ӕппӕт дзугмӕ уӕ цӕст дарут. Уыцы дзугӕн уӕ Сыгъдӕг Уд йӕ сӕргъы сӕвӕрдта разамынд дӕттынӕн, цӕмӕй хизат Хуыцауы Аргъуан — Йӕ Фырты Тугӕй Йӕхицӕн кӕй балхӕдта, уый.

²⁹ Ӕз зонын, мӕ фӕстӕ уӕм кӕй бацӕудзысты, дзугыл чи нӕ ауӕрддзӕн, ахӕм тугдзых бирӕгътӕ.

³⁰ Уӕхи ӕхсӕн дӕр фӕзындзӕн, рӕстдзинад чи зыгъуыммӕ кӕндзӕн, ахӕм адӕймӕгтӕ, цӕмӕй ахуыргӕнинӕгты асайой сӕ фӕдыл.

³¹ Уымӕ гӕсгӕ ут къӕрцхъус, уӕ зӕрдыл дарут, ӕртӕ азы дӕргъы ӕхсӕвӕй-бонӕй сымахӕй алкӕй дӕр, цӕссыг калгӕйӕ, кӕй ахуыр кодтон, уый.

³² Ныр уӕ фӕдзӕхсын Хуыцауыл ӕмӕ Йӕ хорзӕхыл дзурӕг ныхасыл. Хуыцау уыцы ныхасы фӕрцы сымах скӕндзӕн удвидар ӕмӕ уын ратдзӕн хай ӕппӕт сыгъдӕджытимӕ.

³³ Ӕз нӕ бабӕллыдтӕн искӕмӕн нӕдӕр йе ’взистмӕ, нӕдӕр йӕ сыгъзӕринмӕ, нӕдӕр йӕ дарӕсмӕ.

³⁴ Уӕхӕдӕг зонут, мӕхи ӕмӕ ме ’мбӕлццӕтты хъуӕгтӕн ӕз куыстон мӕ ацы дыууӕ къухӕй.

³⁵ Ӕз уын алцӕмӕй дӕр равдыстон, афтӕ кусгӕйӕ кӕй хъӕуы лӕмӕгътӕн ӕххуыс кӕнын ӕмӕ Бардарӕг Йесойы ныхӕстӕ зӕрдыл дарын, уымӕн ӕмӕ Уый Йӕхӕдӕг загъта: „Райсынӕй раттын хуыздӕр у“».

³⁶ Уыцы ныхӕсты фӕстӕ Павел ӕрзоныг кодта ӕмӕ бакуывта се ’ппӕтимӕ дӕр.

³⁷ Иууылдӕр куыдтой, йе ’фцӕгыл-иу ын ныттыхстысты ӕмӕ йын батӕ кодтой.

³⁸ Афтӕ кӕй загъта, нал мӕ фендзыстут, зӕгъгӕ, уӕлдай зын та сын уый уыди. Уый фӕстӕ йӕ афӕндараст кодтой наумӕ.