Амос 3 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Израилӕгтӕ! Байхъусут Дунедарӕджы ныхасмӕ, сымах тыххӕй цы зӕгъы, уымӕ! Ӕз, Мысыры зӕххӕй цы адӕмы ракодтон, уыдонӕн се ’ппӕтӕн дӕр зӕгъын:

² ӕгас зӕххыл цы адӕмтӕ ис, уыдоны ’хсӕн сымах равзӕрстон. Уымӕ гӕсгӕ уын уӕ тӕригъӕдтӕй иунӕг дӕр нӕ ныббардзынӕн.

³ Дыууӕ лӕджы кӕрӕдзиимӕ ныхас куынӕ бакӕной, уӕд иумӕ искуыдӕм ацӕудзысты?

⁴ Домбайӕн йӕ амӕттаг йӕ размӕ куынӕ фӕуа, уӕд хъӕдӕй йӕ богъ-богъ райхъуысдзӕн? Домбайы лӕппын куы ницы ’рцахса, уӕд лӕгӕтӕй йӕ рыхын фӕхъуысы?

⁵ Исчи къӕппӕг куынӕ сӕвӕра, уӕд дзы цъиу аирвӕздзӕн? Цъиу къӕппӕгмӕ куы батӕха, уӕд йӕ дуар гомӕй баззайдзӕн?

⁶ Сахары сыкъауадындзы уасын куы райхъуыса, уӕд адӕм нӕ фӕтӕрсдзысты? Дунедарӕг бар куынӕ радта, уӕд сахары фыдбылыз ӕрцӕудзӕн?

⁷ Дунедарӕг Хуыцау сусӕгӕй ницы аразы, алцыдӕр раргом кӕны Йӕ лӕггадгӕнджытӕн, Йӕ пехуымпартӕн.

⁸ Домбай куы ныррыха, уӕд чи нӕ фӕтӕрсдзӕн? Дунедарӕг Хуыцау куы зӕгъа, уӕд пехуымпар чи не суыдзӕн?

⁹ Ашдод ӕмӕ Мысыры сахарты фехъусын кӕнут: «Ӕрӕмбырд ут Самарийы къуыбыртыл, акӕсут-ма, цытӕ дзы цӕуы, уымӕ: бӕстӕ — змӕст, адӕм се ’фсондзы бын удхарӕй мӕлынц!»

¹⁰ Рӕстӕй цӕрын нӕ зонынц, — зӕгъы Дунедарӕг, — тыхми ӕмӕ стигъыны фӕрцы сӕ галуантӕ алы хӕзнатӕй байдзаг сты.

¹¹ Уымӕ гӕсгӕ Дунедарӕг Хуыцау афтӕ зӕгъы: бӕстӕйыл ӕрхъула кӕндзӕн знаг, дӕ хъомыс дын басӕтдзӕн ӕмӕ дын дӕ фидӕрттӕ сафтид кӕндзӕн.

¹² Дунедарӕг афтӕ зӕгъы: фыййау иуӕй-иу хатт домбайы дзыхӕй фысы дыууӕ къахы кӕнӕ хъусы ’рдӕг куыд фелвасы, раст афтӕ фервӕздзысты, Самарийы хуыссӕнты ӕмӕ Дамаскы къӕлӕтджынты цы израилӕгтӕ улӕфынц, уыдон.

¹³ Байхъусут ӕмӕ зӕгъут Йаковы хӕдзарӕн, — зӕгъы Дунедарӕг Хуыцау, Уӕларвӕфсады Бардарӕг. —

¹⁴ Ӕз Йаковы йӕ фыдракӕндты тыххӕй цы бон бафхӕрдзынӕн, уыцы бон Вефилы нывондхӕссӕнтӕ дӕр ӕнӕ ’фхӕрдӕй нӕ баззайдзысты, сӕ сыкъатӕ сын акъуырдзысты ӕмӕ сӕ зӕхмӕ фехсдзысты.

¹⁵ Сӕ зымӕгон ӕмӕ сӕрдыгон хӕдзӕрттӕ, сӕ пылыстӕгӕй фӕлыст галуантӕ сын ныппырх кӕндзынӕн, ныккӕлдзысты стыр хӕдзӕрттӕ, — зӕгъы Дунедарӕг.