Ӕмбисӕндтӕ 9 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Уӕлзонд йӕхицӕн сарӕзта хӕдзар, авд цӕджындзы йын слӕгъз кодта;

² ӕрцӕттӕ кодта дзидза, алы хъацӕнтимӕ — сӕн ӕмӕ фынгтӕ сӕвӕрдта.

³ Уый фӕстӕ йӕ унӕутты арвыста, цӕмӕй сахары уӕлвӕзтӕй хъӕлӕсыдзагӕй фехъусын кӕной:

⁴ «Ӕнӕхинтӕ, рацӕут ардӕм!» Ӕнӕзӕндтӕн дӕр загъта:

⁵ «Рацӕут, мӕ минасӕй мын бахӕрут, бануазут, хъацӕнтӕ цы сӕныл ӕркодтон, уымӕй!

⁶ Уе ’нӕфенд митӕ ныууадзут ӕмӕ цӕрдзыстут, зонды фӕндагыл цӕут!»

⁷ Ӕдзӕсгомӕн зонд чи амона, уый йӕхи сӕгад кӕндзӕн; ӕнӕхуыцауы азымджын чи кӕна, уый йӕхи фӕхудинаг кӕндзӕн.

⁸ Ӕдзӕсгомӕн уайдзӕфтӕ ма кӕн, науӕд ын ӕнӕуынон суыдзынӕ, куырыхонӕн бауайдзӕф кӕн, ӕмӕ дӕ уарздзӕн.

⁹ Куырыхонӕн зонд бацамон, ӕмӕ йӕ зондыл ноджыдӕр бафтдзӕн, раст адӕймаджы сахуыр кӕн, ӕмӕ ноджы зондджындӕр суыдзӕн.

¹⁰ Хуыцауӕй тӕрсын — куырыхон зонды райдиан, Уаз Хуыцауы базонын — ӕмбаргӕ зонды ӕвдисӕн.

¹¹ Мемӕ, Уӕлзондимӕ, дӕ царды бонтӕ фӕфылдӕр уыдзысты, дӕ азты нымӕцыл бафтдзӕнис.

¹² Кӕд куырыхон дӕ, уӕд дын дӕ уӕлзонд пайда хӕссы, кӕд ӕдзӕсгом, уӕд та дӕхӕдӕг фыдӕбон бавзардзынӕ.

¹³ Ӕдылыдзинад у ӕнӕзонд, хъӕргӕнаг ӕмӕ ӕнӕфенд сылгоймаджы ’нгӕс.

¹⁴ Йӕ хӕдзармӕ бацӕуӕны цур, сахары уӕлвӕзтыл, къӕлӕтджыны сбады,

¹⁵ цӕмӕй, йӕ рӕзты чи цӕуы, уыдонмӕ сида:

¹⁶ «Ӕнӕхинтӕ, рацӕут ардӕм!» Ӕнӕзӕндтӕн зӕгъы:

¹⁷ «Давӕггаг дон адджындӕр у, давд кӕрдзын — бирӕ хӕрзаддӕр!»

¹⁸ Уыдон нӕ зонынц, уым мӕрдтӕ кӕй сты, уый, йӕ уазджытӕ мӕрдтыбӕстӕм кӕй бацӕуынц.