Ӕмбисӕндтӕ 6 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Мӕ лӕппу! Кӕд искӕй тыххӕй дӕ сӕр лыгмӕ радтай,

² уӕд дӕ рацахста дӕхи ныхас, дӕхи ныхӕсты уацары бахаудтӕ.

³ Мӕ лӕппу, уӕдӕ дын ныр кӕд чидӕр хицау сси, уӕд, цӕмӕй дзы фервӕзай, уый тыххӕй афтӕ бакӕн: ацу, йӕ къӕхты бынмӕ йын ӕрхау, ӕнӕрӕнцойӕ йын лӕгъстӕ кӕн.

⁴ Дӕхицӕй хуыссӕг фӕсур, дӕ цӕстытӕ мауал бацъынд кӕн,

⁵ сычъийау дӕхи ратон сурджытӕй, маргъау къӕппӕгӕй ратӕх.

⁶ Магуса! Ацу-ма мӕлдзыгмӕ, ӕмӕ, куыд архайы, уымӕ бакӕс, йӕ уӕлзондыл ын сахуыр у.

⁷ Нӕдӕр ын хицау ис, нӕдӕр — цӕстдарӕг, нӕдӕр — паддзах,

⁸ фӕлӕ сӕрды ӕвӕрӕнтӕ скӕны, хуымгӕрдӕн афон йӕхицӕн хӕринаг ӕрцӕттӕ кӕны.

⁹ Зивӕггӕнаг! Кӕдмӕ хуысдзынӕ, райхъал ӕмӕ сыстын афон дын нӕма у?

¹⁰ Чысыл ма куы афынӕй уай ӕмӕ куы арӕдзӕ-мӕдзӕ кӕнай, кӕнӕ ӕгуыстӕй фылдӕр куы абадай,

¹¹ уӕд дӕм дзӕгъӕлдзуйау фӕзындзӕнис мӕгуырдзинад, абырӕгау ӕрбацӕудзӕни гӕвз.

¹² Ӕнаккаг ӕмӕ фыдгӕнӕг чи у, уымӕн мӕнг ныхас йе ’взагӕй нӕ хизы.

¹³ Куы йӕ цӕст ӕрныкъулы, куы йӕ къах зӕххыл ӕртъӕпп кӕны, куы та йе ’нгуылдзтӕй цыдӕртӕ амоны.

¹⁴ Йӕ зӕрдӕйы ӕдзух — мӕнгдзинад, йӕ хъуыдыты — фыдвӕндтӕ, ӕдзухдӕр тауы хъаугъатӕ.

¹⁵ Афтӕ кӕй кӕны, уый тыххӕй йыл ӕвиппайды фыдбылыз ӕрцӕудзӕн, ӕнӕнхъӕлӕджы фесӕфдзӕн ӕмӕ йӕ ничиуал фервӕзын кӕндзӕн.

¹⁶ Дунедарӕгӕн ӕхсӕз хъуыддаджы сты ӕнӕуынон, ӕвдӕммӕ та ӕлгъаджы цӕстӕй кӕсы:

¹⁷ хирвӕссон цӕстӕнгас, мӕнг ӕвзаг, ӕнаххосты марӕг къухтӕ,

¹⁸ фыдвӕндтӕ цы зӕрдӕйы гуырынц, уый, фыдбылыз саразынмӕ згъорӕг къӕхтӕ,

¹⁹ мӕнгдзинадӕй чи улӕфы, уыцы мӕнгӕвдисӕн ӕмӕ дыууӕ ’фсымӕры кӕрӕдзиуыл ардауӕг.

²⁰ Мӕ лӕппу! Хъахъхъӕн дӕ фыды фӕдзӕхст, ма рох кӕн дӕ мады ныстуан.

²¹ Дӕ зӕрдыл сӕ дар ӕдзухдӕр, дӕ хъуыры сӕ фӕрдгуытау бакӕн.

²² Куы фӕцӕйцӕуай, уӕд дӕ размӕ кӕндзысты, куы бафынӕй кӕнай, уӕд дӕ хъахъхъӕндзысты, куы-иу райхъал уай, уӕд демӕ дзурдзысты.

²³ Уымӕн ӕмӕ фӕдзӕхст у цырагъ, ахуырад — рухс, зондамынд — царды фӕндаг.

²⁴ Уыдон дӕ хъахъхъӕндзысты хъахбай сылӕй, кӕйдӕр усы мӕлгъӕвзагӕй.

²⁵ Йӕ рӕсугъдмӕ йын ма бабӕлл дӕ зӕрдӕйы, йӕ цӕстыхауты тъӕбӕрттӕй йын ма атай.

²⁶ Хъахбай сылы фӕдыл куы ацӕуай, уӕд къӕбӕры фаг дӕр нал кӕндзынӕ, уымӕн ӕмӕ искӕй ус дӕ царды фӕдыл зилы.

²⁷ Исчи йӕ роны зынг куы бавӕра, уӕд уымӕн гӕнӕн ис, цӕмӕй йӕ дарӕс ма басудза?

²⁸ Судзгӕ ’взалытыл бӕгъӕввадӕй куы ацӕуай, уӕд дӕ къӕхтӕ нӕ басудздзынӕ?

²⁹ Уӕдӕ искӕй усимӕ ӕмуат чи ’рцӕуы, уый дӕр афтӕ — куы йыл бандзӕвы, уӕд ӕнӕ ’фхӕрдӕй нӕ баззайы.

³⁰ Хуыснӕг, ӕрмӕст йӕ гуыбын бафсадыны тыххӕй исты куы адавы, уӕд ын карз тӕрхон нӕ фӕкӕнынц.

³¹ Фӕлӕ йӕ куы ’рцахсынц, уӕд, цы адавта, уый авд ахӕмӕй бафиды, йӕ хӕдзары исбон иууылдӕр лӕвӕрд ӕрцӕуы.

³² Хъахбайӕн йӕ сӕры зонд нӕй, йӕхӕдӕг йӕхи бабын кӕны.

³³ Над ӕмӕ худинаг бавзардзӕн, йӕ фидиссаджы кой никуы ферох уыдзӕн.

³⁴ Уымӕн ӕмӕ карз уыдзӕн йӕ мойы зӕрдӕхсайд, мастисӕн бон нӕ ныббардзӕн.

³⁵ Ницавӕр фиддоныл сразы уыдзӕн, цасфӕнды лӕвӕрттӕ йын куы кӕнай, уӕддӕр разыйӕ ницӕмӕй баззайдзӕн.