Ӕмбисӕндтӕ 26 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Сӕрдыгон мит куыд нӕ хъӕуы, хуымгӕрдӕн афон — къӕвда, зондцухӕн дӕр кад кӕнын афтӕ нӕ фидауы.

² Сырддонцъиу куыд апӕррӕст кӕны ӕмӕ зӕрватыкк куыд атӕхы, афтӕ дзӕгъӕл ӕлгъыст дӕр дӕ рӕзты ацӕудзӕн.

³ Бӕхӕн — ехс, хӕрӕгӕн — идон, ӕдылыйы рагъӕн та — уис.

⁴ Ӕдылыйӕн зондцухау дзуапп ма дӕтт, науӕд дӕхӕдӕг дӕр уый хуызӕн суыдзынӕ.

⁵ Ӕдылыйӕн дзуапп ратт ӕнӕзондау, науӕд йӕхимӕ зондджын кӕсдзӕн.

⁶ Фӕнды дӕ къӕхтӕ сӕ рӕбынӕй алыг кӕн кӕнӕ фыдбылызы бахау, фӕнды дӕ хъуыддаг ӕдылыйӕн бабар кӕн.

⁷ Къуылых лӕгӕн йӕ къахайст ӕмраст куыд нӕу, афтӕ ’мбисӕндтӕ дӕр зондцухы ’взагыл нӕ фидауынц.

⁸ Фӕнды дурӕхсӕныл дур бабӕтт, фӕнды ӕдылыйӕн кад кӕн.

⁹ Фӕнды расыггӕнаг какон сындзыл ныззӕгӕл уӕд, фӕнды зондцух ӕмбисӕндтӕ хӕссӕд.

¹⁰ Ӕнӕзӕндты кӕнӕ кӕйфӕнды дӕр куыстмӕ чи исы, уый у, фӕд-фӕдыл се ’ппӕты дӕр чи ӕхсы, уыцы фатӕхсӕджы ’нгӕс.

¹¹ Куыдз йӕ омдзӕгтӕм куыд раздӕхы, афтӕ зондцух дӕр йе ’рра митӕ нӕ фӕуадзы.

¹² Искуы, йӕхимӕ куырыхон чи кӕсы, ахӕм адӕймагыл сӕмбӕлдтӕ? Зондцухыл дӕр ма зӕрдӕ дарӕн фылдӕр ис.

¹³ Магуса дзуры: «Фӕндагыл — домбай! Уынгты зилы домбай!»

¹⁴ Дуар йӕ ауындзӕнтыл куыд хъеллау кӕны, афтӕ магуса дӕр йӕ хуыссӕны ратул-батул фӕкӕны.

¹⁵ Зивӕггӕнаг хӕринаджы тӕбӕгъы йӕ къух нытътъыссы, фӕлӕ йӕ дзыхмӕ схӕссын нӕ фӕразы.

¹⁶ Магуса йӕхимӕ, ахъуыдыгӕнгӕйӕ, дзуапп чи ратты, ахӕм авд лӕгӕй зондджындӕр кӕсы.

¹⁷ Искӕй хъаугъамӕ йӕ дзых чи дары, уыцы фӕндаггон, куыдзӕн йӕ хъустӕм чи лӕбуры, уый хуызӕн у.

¹⁸ Ӕдылы судзгӕ фӕттӕ куыд фехсы ӕмӕ мӕлӕт куыд тауы,

¹⁹ уый ӕнгӕс у, йӕ хионы сайгӕйӕ, афтӕ чи дзуры: «Ӕз ӕрмӕстдӕр хынджылӕг кодтон».

²⁰ Ӕнӕ сугӕй арт ахуыссы, ӕнӕ дам-думтӕй хъаугъа банцайы.

²¹ Тӕвдӕн — ӕвзалы, артӕн — сугтӕ, загъдӕргом та — загъд къахынӕн.

²² Дам-думты ныхӕстӕ цыбӕйлаг хӕйттау адӕймагӕн йӕ хуылфмӕ бахизынц.

²³ Ӕлыгӕй конд дурын ӕвзистӕй куы саив кӕнай, раст уый ӕнгӕс сты саузӕрдӕйы уарзӕгой ныхӕстӕ.

²⁴ Знаджы ныхас — цурон, йӕ зӕрдӕйы та хин ӕмбӕхсы.

²⁵ Кӕд йӕ ныхӕстӕ ’хсызгон сты, уӕддӕр ыл ма баууӕнд, — йӕ зӕрдӕйы авд фыдвӕнды ис.

²⁶ Йе ’нӕуынондзинад цурон митӕй ӕмбӕхсы, фӕлӕ уӕддӕр йӕ хӕрам адӕмы раз раргом уыдзӕн.

²⁷ Уӕрм чи къахы, уый дзы йӕхӕдӕг ныххаудзӕн; дур чи тулы, уый йӕхӕдӕг йӕ быны фӕуыдзӕн.

²⁸ Фӕлитойӕн йӕ амӕттаг — ӕнӕуынон, сайӕгой ӕвзаг фыдбылыз цӕттӕ кӕны.