Ӕмбисӕндтӕ 23 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Бӕстӕйы хицауимӕ иу фынгыл хӕрынмӕ куы ’рбадай, уӕд, дӕ разы цы ис, уымӕ лӕмбынӕг кӕс:

² кӕд гуыбындзӕл дӕ, уӕд дӕ хъуырыл кард сӕвӕр,

³ йӕ мондаггӕнӕнтӕм ын ма сцыбӕл у, уымӕн ӕмӕ уыцы хойраг мӕнг у.

⁴ Хъӕздыгдзинады фӕдыл ма згъор, кӕд ӕрлӕууын хъӕуы, уый зон;

⁵ хъӕздыгдзинад, куыддӕр ӕм бакӕсай, афтӕ ӕрбайсӕфы, цӕргӕсау айтындзы йӕ базыртӕ ӕмӕ уӕлӕрвтӕм атӕхы.

^6-7 Чъынды лӕгимӕ иу фынгыл ма бад, йӕ дзаджджын хӕринӕгтӕм ын ма хӕлӕг кӕн, уымӕн ӕмӕ йӕ зӕрдӕ у гуыдырӕй ӕхгӕд. Зӕгъдзӕн дын: «Хӕр ӕмӕ нуаз», йӕ хъуыдытӕ та ӕндӕр уыдзысты.

⁸ Дӕ комдзаг фӕстӕмӕ сомдзынӕ, дӕ хорз ныхӕстӕ уӕлдӕфы ацӕудзысты.

⁹ Зондцухӕн мацы дзур — дӕ зондджын ныхӕстыл дын ӕрмӕст фӕхуддзӕнис.

¹⁰ Рагон арӕны дур ма фезмӕлын кӕн, сидзӕрты хуыммӕ ма бахъав,

¹¹ уымӕн ӕмӕ сӕ Фарсхӕцӕг тыхджын у, ӕмӕ дӕ ныхмӕ рацӕудзӕн сӕ хъасты.

¹² Дӕ зӕрдӕ зондамындмӕ здах, дӕ хъустӕ зонынадмӕ ’рбадар.

¹³ Дӕ лӕппуйы ӕнӕ ’фхӕрдӕй ма ныууадз; уисӕй над куы баййафа, уӕд нӕ амӕлдзӕн:

¹⁴ уисӕй йӕ бафхӕрдзынӕ, фӕлӕ йӕ мӕрдтыбӕстӕй фервӕзын кӕндзынӕ.

¹⁵ Мӕ лӕппу, куырыхон куы уай, уӕд мӕ цинӕн кӕрон нӕ уыдзӕн;

¹⁶ раст ныхас дӕ куы хъуыса, уӕд мӕ зӕрдӕ фыр цинӕй райдзӕн.

¹⁷ Тӕригъӕдджынтӕм хӕлӕг ма кӕн, Дунедарӕджы раз дӕм тас уӕд кӕддӕриддӕр —

¹⁸ уымӕн ӕмӕ дӕуӕн ис фидӕн, дӕ зӕрдӕдарӕн сӕфт нӕу.

¹⁹ Мӕ лӕппу, хъусгӕ кӕн ӕмӕ куырыхон у, дӕ зӕрдӕ раст фӕндагмӕ сараз.

²⁰ Сӕнӕй йӕ мондӕгтӕ чи исы ӕмӕ дзидза фырхӕрд чи кӕны, уыдоны ’хсӕнмӕ ма цу,

²¹ уымӕн ӕмӕ расыггӕнаг ӕмӕ гуыбындзӕл мӕгуырмӕ ’рцӕудзысты, дӕ зивӕджы тыххӕй бызгъуырты цӕудзынӕ.

²² Хъус дӕ фыдмӕ, уымӕн ӕмӕ дын цард уый радта, дӕ ныййарӕг мад куы базӕронд уа, уӕд дӕр ыл ӕлгъ ма кӕн.

²³ Ӕцӕгдзинад агур, уӕлзонд, зондамынд ӕмӕ зонды хӕзнатӕ ма ауӕй кӕн.

²⁴ Рӕстуды фыд фыр цинӕй райы, куырыхоны ныййарӕг йӕ цинӕн кӕрон нӕ ары.

²⁵ Дӕ фыд ӕмӕ дӕ мады зӕрдӕтӕ фыр цинӕй райӕнт, сӕ цины хъӕртӕ райхъуысӕнт!

²⁶ Мӕ лӕппу, ме ’рдӕм раздах дӕ зӕрдӕ, дӕ цӕстӕнгас мӕ фӕндӕгтӕм сараз.

²⁷ Хъахбай сылгоймаг — арф сӕрсӕфӕн, искӕй ус — уынгӕг цъай.

²⁸ Абырӕгау рӕсӕны бады ӕмӕ нӕлгоймӕгты ’хсӕн, сайдӕй чи цӕуы, ахӕмты нымӕц парахат кӕны.

²⁹ Кӕмӕн хъуысынц сӕ кӕуын ӕмӕ сӕ хъӕрзын? Загъд ӕмӕ судзаг хъаст чи кӕны? Кӕмӕн сцъӕхтӕ ис йӕ буар? Йӕ цӕстытӕ кӕмӕн ныссырх сты?

³⁰ Сӕн нуазыныл чи бафтыд, алы хъацӕнтӕ цы сӕныл конд ис, ахӕм сӕны фӕдыл чи зилы, уыдонӕн.

^31-32 Ма сцыбӕл у, нуазӕн кӕхцы сӕн куыд сырх кӕны, куыд хъазы ӕмӕ куыд ӕнцон нуазӕн у, уымӕ. Уый фӕстӕ дыл калмау фӕхӕцдзӕнис, йӕ марг дӕ бауадздзӕн хуссайраг калмау.

³³ Искӕй устытӕм бакӕс-бакӕс кӕндзынӕ, дӕ зӕрдӕйы чъизи хъуыдытӕ фӕзындзӕн.

³⁴ Денджызы астӕу кӕнӕ наухъилы цъуппыл чи бафынӕй ис, уый хуызӕн суыдзынӕ.

³⁵ Зӕгъдзынӕ: «Надтой мӕ, фӕлӕ мын нӕ рысти, хостой мӕ, фӕлӕ йӕ не ’мбӕрстон, куы фӕфынӕй кӕнон, уӕд та ногӕй нозтагур зилдзынӕн».