Ӕмбисӕндтӕ 21 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Паддзахы зӕрдӕ Дунедарӕджы къухы ис, цӕугӕдонау ӕй, кӕцырдӕм Ӕй фӕнды, уырдӕм здахы.

² Адӕймагмӕ йӕ алы фӕндаг дӕр раст фӕкӕсы, фӕлӕ Дунедарӕг зӕрдӕтӕ фӕлвары.

³ Раст ӕмӕ рӕстаг хъуыддӕгтӕ Дунедарӕгӕн нывӕндтӕй ӕхсызгондӕр сты.

⁴ Ӕнӕрвӕссон бакаст ӕмӕ сӕрыстыр зӕрдӕ ӕнӕхуыцауӕн цырагъы хуызӕн сты, фӕлӕ уый тӕригъӕд у.

⁵ Ӕнувыд адӕймаг — фӕрныг; талф-тулфӕй чи архайы, уый та ӕрмӕст хъуаг ӕййафдзӕн.

⁶ Мӕнгдзинады фӕрцы йӕхицӕн мулк чи самал кӕны, уый тагъдивгъуыйаг уддзӕфы, мӕлӕты фӕдыл зилы.

⁷ Ӕнӕхуыцӕутты сӕ фыдбылызтӕ фесафдзысты, уымӕн ӕмӕ раст хъуыддӕгтӕ кӕныныл не сразы сты.

⁸ Фӕлитой галиу фӕндагыл цӕуы, сыгъдӕгзӕрдӕйӕн йӕ хъуыддӕгтӕ сты ӕууӕнкджын.

⁹ Фыдсылимӕ цӕрыны бӕсты фӕлтау уӕлхӕдзары кӕрон цӕр.

¹⁰ Ӕнӕхуыцау фыддзинадмӕ бӕллы, йӕ хионыл дӕр нӕ ауӕрды.

¹¹ Ӕдзӕсгомы куы бафхӕрай, уӕд ӕнӕхинтӕ фӕзондджындӕр уыдзысты; куырыхонӕн зонд бацамон, ӕмӕ йӕ зондыл бафтдзӕнис.

¹² Раст Хуыцау йӕ цӕст дары ӕнӕхуыцауы хӕдзармӕ: ӕнӕхуыцауыл фыдбылыз ӕруадзы.

¹³ Мӕгуыр лӕджы тӕригъӕддаг хъӕр фехъусгӕйӕ, йӕхи чи ныкъкъуырма кӕны, уый йӕхӕдӕг дӕр искӕд бон хъӕр кӕндзӕн, фӕлӕ йӕ ничи фехъусдзӕн.

¹⁴ Сусӕг лӕвар маст басабыр кӕны, фӕччийы бын цы гӕртам ӕмбӕхст ис, уый хъӕхъхъаг маст дӕр бауромы.

¹⁵ Раст тӕрхон рӕстудӕн — цины хос, фыдгӕнӕг та дзы тӕрсгӕ кӕны.

¹⁶ Раст фӕндагӕй чи адзӕгъӕл ис, уый мӕрдты ’хсӕн йӕ бынат ссардзӕн.

¹⁷ Йӕ рӕстӕг цинты ’рвитын чи уарзы, уымӕн цӕрӕн фӕрӕзтӕ нӕ фаг кӕны; сӕн ӕмӕ зынаргъ сӕрдӕнтӕ чи уарзы, уый не схъӕздыг уыдзӕн.

¹⁸ Раст лӕгӕн йӕ ахӕстаргъ — ӕнӕхуыцау, цӕсгомджынӕн та — фӕлитой.

¹⁹ Ӕнӕзонд ӕмӕ загъдӕргом усимӕ цӕрыны бӕсты фӕлтау ӕдзӕрӕг быдыры иунӕгӕй цӕр.

²⁰ Куырыхоны хӕдзары зынаргъ ӕвӕрӕнтӕ ӕвидигӕ сты, ӕдылы та сӕ ’нӕвгъауӕй хардз кӕны.

²¹ Раст фӕндагмӕ ӕмӕ уарзондзинадмӕ чи тырны, уый ссардзӕнис цард дӕр, раст фӕндаг дӕр ӕмӕ кад дӕр.

²² Куырыхон бӕгъатырты сахар басӕтдзӕн, сӕ зӕрдӕ цы фидарыл дарынц, уый сын ныззыгуым кӕндзӕн.

²³ Йӕ дзыхыл хӕцын чи зоны, уый йӕхи фыдбылызтӕй хъахъхъӕны.

²⁴ Къӕйных ӕмӕ ’нӕввӕрсон адӕймаг, йӕ ном «ӕдзӕсгом» кӕмӕн у, уымӕн йӕ къӕйныхдзинад у нӕрӕмон.

²⁵ Зивӕггӕнаджы йӕ фӕндтӕ фесафдзысты, уымӕн ӕмӕ йӕ къухтӕ кусын нӕ уарзынц;

²⁶ алы бон дӕр йӕ монцтӕй фӕлмӕцы, рӕстуд та ӕвӕсмонӕй, цы йӕм ис, уый байуары.

²⁷ Ӕнӕхуыцӕуттӕн сӕ нывӕндтӕ ӕлгъаг сты, уӕлдайдӕр та — фыдвӕндтимӕ кӕй ӕрбахӕссынц, уыдон.

²⁸ Мӕнгӕвдисӕн фесӕфдзӕн, фӕстаг ныхасы бар ӕрхаудзӕн, алцы чи фехъуыста, уымӕ.

²⁹ Ӕнӕхуыцауӕн йӕ хуыз къӕйных у, рӕстуд йӕ фӕндагыл фидар хӕцы.

³⁰ Зонд дӕр, уӕлзонд дӕр ӕмӕ уынаффӕ дӕр Дунедарӕджы раз ницы сты.

³¹ Тохы бонмӕ бӕх ӕрцӕттӕ кӕнынц, фӕлӕ уӕлахиз Дунедарӕг ратты.