Ӕмбисӕндтӕ 19 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Сыгъдӕгзӕрдӕйӕ чи цӕры, уыцы мӕгуыр лӕг ӕдылы фӕлитойӕ — хуыздӕр.

² Ӕнӕ зонынадӕй зӕрдӕйӕн зын у, тагъд чи кӕны, уый та фӕкӕлдзӕнис.

³ Адӕймагӕн йе ’дылы зонды аххосӕй йӕ фӕндаг ныссуйтӕ вӕййы, мӕсты та Дунедарӕгмӕ фӕкӕны.

⁴ Хъӕздыгдзинад ӕрдхӕрдты нымӕц фӕфылдӕр кӕны, мӕгуыр лӕджы та йӕ лымӕн дӕр ныууадзы.

⁵ Мӕнгӕвдисӕн ӕнӕ ’фхӕрдӕй нӕ баззайдзӕн, фӕлитой нӕ фервӕздзӕн.

⁶ Стыр хицӕутты раз козбау митӕ бирӕтӕ фӕкӕнынц, лӕвӕрттӕ чи кӕны, уымӕн алчидӕр йе ’рдхорд у.

⁷ Мӕгуыр лӕг йе ’фсымӕртӕн дӕр — ӕнӕуынон, йе ’мбӕлттӕ дзы сӕхи хизынц: куы сӕм фӕсиды, уӕд ӕрбайсӕфынц.

⁸ Зондагурӕг чи зилы, уый йӕ удыл тыхсы; уӕлзонд чи хъахъхъӕны, уый фарн ссары.

⁹ Мӕнгӕвдисӕн ӕнӕ ’фхӕрдӕй нӕ баззайдзӕн, фӕлитойӕн йе сӕфт ӕрцӕудзӕн.

¹⁰ Ӕдылыйыл нӕ фидауы фырхъӕздыгдзинад, цагъар ӕлдӕрттӕн хицау суа, уый та — уӕлдайдӕр.

¹¹ Зондджын йӕ маст уромын зоны; искӕмӕн йӕ рӕдыд куы ныббары, уӕд йӕхицӕн кад кӕны.

¹² Паддзахы маст — домбайы рыхын, йӕ хорзӕх та, цыма кӕрдӕгыл ӕртӕх ӕрызгъӕлы, уыйау.

¹³ Ӕдылы лӕппу йӕ фыды фенамонд кӕны; зындзӕрин ус — хуынкъ цары ’нгӕс.

¹⁴ Хӕдзар ӕмӕ хъӕздыг исбон — ныййарджыты бынтӕ, зондджын усы та Дунедарӕг ратты.

¹⁵ Адӕймаджы йӕ зивӕг хуыссӕгхъӕлдзӕг скӕны, зивӕггӕнаг стонг ӕййафдзӕнис.

¹⁶ Хуыцауы фӕдзӕхст чи ӕххӕст кӕны, уый йӕ цард хъахъхъӕны, йӕ цардвӕндагмӕ куыдфӕндыйы цӕстӕй чи кӕсы, уый та фесӕфдзӕн.

¹⁷ Мӕгуыр лӕгӕн чи ӕххуыс кӕны, уый Дунедарӕгӕн ӕфстау дӕтты, йӕ хорздзинад ын Дунедарӕг бафиддзӕн.

¹⁸ Дӕ фырты, цалынмӕ нӕма байрӕджы, уӕдмӕ ’фхӕргӕ кӕн, ма йӕ фесаф.

¹⁹ Мӕстыгӕр уадз ӕмӕ ’фхӕрд баййафа, куы йын ныббарай, уӕд ӕвзӕрдӕр уыдзӕн.

²⁰ Уынаффӕмӕ куы хъусай ӕмӕ зондамынд дӕ зӕрдӕмӕ куы айсай, уӕд фидӕны куырыхон суыдзынӕ.

²¹ Адӕймаджы зӕрдӕйы бирӕ фӕндтӕ ис, фӕлӕ, ӕрмӕстдӕр Дунедарӕг цы сфӕнд кодта, уый сӕххӕст уыдзӕн.

²² Адӕмы ’хсӕн иузӕрдыгдзинад кадджын у; мӕгуыр лӕг фӕлитойӕ — хуыздӕр.

²³ Дунедарӕгӕй тас цардмӕ кӕны, уыцы тасӕй йемыдзаг чи у, уый фынӕй кӕны ӕнӕмӕтӕй, фыдбылыз ӕм нӕ баххӕсдзӕн.

²⁴ Зивӕггӕнаг хӕринаджы тӕбӕгъы йӕ къух нытътъыссы, фӕлӕ йӕ дзыхмӕ схӕссын зивӕг кӕны.

²⁵ Ӕдзӕсгомӕн куы бауайдзӕф кӕнай, уӕд ӕнӕхинтӕ раст зондмӕ раздӕхдзысты; зондджынӕн бауайдзӕф кӕн, ӕмӕ ма йӕ зондыл ноджыдӕр бафтдзӕн.

²⁶ Йӕ фыды хӕдзар чи сафтид кӕны ӕмӕ йӕ ныййарӕг мады чи суры, уыцы лӕппу — ӕгад ӕмӕ фидиссаг.

²⁷ Мӕ лӕппу! Зондамындмӕ куынӕ хъусай, уӕд ӕнӕ бацамындӕй фӕдзӕгъӕл уыдзынӕ.

²⁸ Мӕнгӕвдисӕн тӕрхондонӕй хынджылӕг кӕны, ӕнӕхуыцау тӕригъӕдтӕй ӕфсӕды.

²⁹ Ӕдзӕсгом ӕнӕ тӕрхонӕй нӕ баззайдзӕн, ӕдылыйы рагъ та — ӕнӕ надӕй.