Ӕмбисӕндтӕ 13 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Куырыхон лӕппу йӕ фыды зондамындмӕ хъусы, ӕдзӕсгом уайдзӕфтӕм йӕ хъус нӕ дары.

² Адӕймаг йӕ ныхӕсты фарнӕй ӕфсӕды, мӕнгард лӕг та тыхмийӕ цӕры.

³ Йӕ дзыхыл хӕцын чи зоны, уый йӕ цард хъахъхъӕны, рӕузонд ныхӕстӕ чи кӕны, уый йӕхи фесафдзӕн.

⁴ Магуса цӕмӕдӕрты бӕллы, фӕлӕ дзӕгъӕлы, ӕнӕзивӕгӕн йӕ фӕндтӕ йӕ къухы бафтынц.

⁵ Рӕстудӕн мӕнг ныхас ӕнӕуынон у, ӕнӕхуыцау та йӕхи сӕгад ӕмӕ фӕхудинаг кӕны.

⁶ Раст адӕймаг раст фӕндагыл цӕуы, тӕригъӕдджыны йе ’наккагдзинад фесафы.

⁷ Иуӕй-иу йӕхицӕй хъӕздыг аразы, афтӕмӕй йӕм мур дӕр ницы ис, кӕмӕндӕр та йӕ исбон — бирӕ, фӕлӕ йӕхи мӕгуыр хоны.

⁸ Хъӕздыг адӕймаг йӕ мулчы фӕрцы мӕлӕтӕй фервӕзы, фӕлӕ мӕгуыр лӕг уайдзӕф дӕр нӕ фехъусдзӕн.

⁹ Рӕстгӕнджыты рухс хъӕлдзӕгӕй судзы, фыдгӕнджыты цырагъ та мынӕг кӕны.

¹⁰ Хирвӕссондзинад загъд къахы, уынаффӕ кӕм ис, уӕлзонд дӕр уым.

¹¹ Хӕлофӕй цы ’фтиагыл фӕхӕст уай, уый уайтагъд фӕцыдӕр уыдзӕн, чысылгай цы мулк фембырд кӕнай, ууыл ма ноджыдӕр бафтдзӕн.

¹² Адӕймагӕн йӕ зӕрдӕдарӕн куы не ’ххӕст кӕна, уӕд йӕ зӕрдӕ фӕлмӕцгӕ кӕны, чи сӕххӕст ис, уыцы бӕллиц та — царды бӕлас.

¹³ Зондамынд чи ницӕмӕ дары, уый йӕхи сафы, фӕлӕ фӕдзӕхстӕн аргъ чи кӕны, уый йӕ хӕрзиуӕг райсдзӕн.

¹⁴ [Мӕнгард фырт хорзӕй ницы ссардзӕн; ӕмбаргӕ цагъар йӕ хъуыддӕгты уыдзӕни ӕнтыстджын.]

¹⁵ Куырыхоны зондамынд — царды гуырӕн, мӕлӕты къӕппӕгӕй дӕ фервӕзын кӕндзӕн.

¹⁶ Раст зондахаст хорзӕхӕй схайджын кӕны, мӕнгардты фӕндаг сӕфтмӕ ’ркӕны.

¹⁷ Цыргъзонд зондимӕ архайы, ӕдылы та йе ’рра митӕй бӕрӕг дары.

¹⁸ Фыдуацхӕссӕгӕн — додойаг йӕ къона, иузӕрдион фӕдисон — ӕвдадзы хос.

¹⁹ Зондамындыл йӕхи чи атигъ кӕна, уый сӕгад ӕмӕ сгӕвзыкк уыдзӕн; зондамынд йӕ зӕрдӕмӕ чи айса, уый та — кадджын.

²⁰ Адӕймагӕн йӕ бӕллиц куы сӕххӕст вӕййы, уӕд йӕ зӕрдӕ цин фӕкӕны; ӕдылымӕ йӕ фыдбылызы фӕндтӕ ныууадзынӕй зындӕр ницы кӕсы.

²¹ Куырыхонтимӕ куы балымӕн уай, уӕд дӕхӕдӕг дӕр куырыхон суыдзынӕ, ӕдылытимӕ куы баиу уай, уӕд та фыдбылызы бахаудзынӕ.

²² Тӕригъӕдджынӕн йӕ фӕдыл цӕуы фыдбылыз, рӕстуды хӕрзиуӕг — ӕвыдӕй цӕрын.

²³ Хӕларзӕрдӕ адӕймаг йӕ цоты цотӕн бынтӕ ныууадзы, тӕригъӕдджыны исбон та — рӕстуды хай.

²⁴ Мӕгуыр лӕджы хуымы дӕр бирӕ тыллӕг ӕрзайы, фӕлӕ галиу миты аххосӕй йӕ хорӕй ӕнӕхай фӕвӕййы.

²⁵ Йӕ уисӕн тӕригъӕд чи кӕны, уый йӕ фырты нӕ уарзы, фӕлӕ йӕ чи уарзы, уый йын зонд бацамондзӕн.

²⁶ Рӕстуд — ӕфсӕст, ӕнӕхуыцау сыдӕй мӕлы.