Ӕмбисӕндтӕ 12 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Зондамынд чи уарзы, уый зонынад уарзы, уайдзӕф ӕнӕуынон кӕмӕн у, уый ӕнӕфенд у.

² Дунедарӕг уарзы хӕларзӕрдӕ адӕймаджы, мӕнгарды та Йӕ азар баййафы.

³ Фыдгӕнӕг зӕххыл не ’рфидар уыдзӕн, раст адӕймагӕн йӕ уидаг фидар у.

⁴ Хӕрзуаг бинойнаг йӕ сӕрыхицауӕн — кады худ, налат ус та — йе стджыты ’хсӕн ӕмбыд стӕг.

⁵ Раст адӕймаг хъуыды кӕны рӕстдзинадыл, ӕнӕхуыцау та фыдвӕндтӕ аразы.

⁶ Ӕнӕхуыцауы ныхӕстӕ — туг ныккалынӕн асадӕн, фӕлӕ рӕстуды ’взаг адӕмы фервӕзын кӕны.

⁷ Ӕнӕхуыцау ӕрхауди — ӕмӕ нал ис, рӕстуды хӕдзар нӕ фенкъуысдзӕн.

⁸ Зондджын ныхас адӕймаджы скадджын кӕны, ӕнахъинон зондахаст — ӕгады хос.

⁹ Фӕлтау хуымӕтӕгӕй цӕр ӕмӕ дӕхицӕн лӕггад кӕн, дӕхицӕй номджын лӕг аразгӕйӕ, къӕбӕрӕй хъуаг ӕййафыны бӕсты.

¹⁰ Рӕстуд йӕ фосыл дӕр мӕт кӕны, ӕнӕхуыцауӕн йӕ хорзӕх дӕр — залым мийӕ фыддӕр.

¹¹ Йӕ зӕхх чи кусы, уый ӕфсӕст уыдзӕн, ӕдылы та йӕ тутт бӕллицты фӕдыл зилы.

¹² Ӕнӕхуыцау йӕ быцъынӕг скъуыны хинмӕ, фӕлӕ рӕстуды уидаг талатӕ суадзы.

¹³ Ӕнӕхуыцау йӕ сайӕн ныхӕсты ныссуйтӕ уыдзӕн, рӕстуд та фыдбылызӕй фервӕздзӕн.

¹⁴ Адӕймаг йӕ ныхӕсты фарнӕй ӕфсӕды, йӕ хъиамӕт ӕм хӕрзиуӕджы хуызы раздӕхы.

¹⁵ Ӕдылымӕ йӕ фӕндаг раст кӕсы, куырыхон та уынаффӕтӕм хъусы.

¹⁶ Ӕдылы йӕ маст уромын нӕ зоны, фӕлӕ йын зондджын йе ’фхӕрд ницӕмӕ ’рдары.

¹⁷ Цӕсгомджын адӕймаг рӕстдзинад дзуры, мӕнгӕвдисӕнӕн йӕ ныхӕстӕ мӕнгард сты.

¹⁸ Дзӕгъӕлдзыхы ныхас — карды цӕф, куырыхоны ныхас — ӕвдадзы хос.

¹⁹ Раст ныхӕстӕ баззайдзысты ӕнусмӕ, мӕнг ныхас — ӕрмӕстдӕр иу уысммӕ.

²⁰ Фыдвӕндгӕнӕджы зӕрдӕйы — мӕнгарддзинад, фидауынгӕнджытӕм — циндзинад.

²¹ Раст адӕймагыл фыдбылыз не ’рцӕудзӕн, ӕнӕхуыцӕуттӕн сӕ цард — фыдбылызтӕй йедзаг.

²² Мӕнг ӕвзаг Дунедарӕгӕн ӕлгъаг у, цӕсгомджынӕй чи цӕры, уый Йын — ӕхцон.

²³ Зондджын йӕ зонынад ӕмбӕхсы, зондцух та йе ’дылыдзинад равдисы.

²⁴ Кусаг къух хицауиуӕг кӕндзӕн, магусатӕм ӕнхъӕлмӕ кӕсы бегара.

²⁵ Адӕймаджы зӕрдӕ мӕтӕй сфӕлмӕцы, хорз ныхасӕй та схъӕлдзӕг вӕййы.

²⁶ Рӕстуд йӕ хионӕн фӕндаг бацамондзӕн, ӕнӕхуыцӕутты цӕуӕнтыл та фӕдзӕгъӕл уыдзынӕ.

²⁷ Магуса ӕфтиаджы ад нӕ зоны, куыстуарзаг та мулк ӕмӕ цӕрӕн фӕрӕзтӕй цух не ’ййафы.

²⁸ Рӕстдзинады фӕндагыл — цард, йӕ цӕуӕнтыл нӕ сӕмбӕлдзынӕ мӕлӕтыл.