Ӕмбисӕндтӕ 11 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Дунедарӕгӕн сайаг барӕнтӕ ӕлгъаг сты, раст уӕзбарӕнтӕ — ӕхцон.

² Сӕрыстырдзинадӕн йӕ фӕдыл цӕуы худинаг, сӕрныллӕгдзинадӕн — уӕлзонд.

³ Рӕстзӕрдӕйы йӕ сыгъдӕг зӕрдӕ размӕ кӕны, фӕлитойы йӕ мӕнгарддзинад фесафы.

⁴ Дунедарӕджы масты бон куы ралӕууа, уӕд мулкӕй ницы пайда уыдзӕн, фӕлӕ, раст фӕндагыл чи цӕуы, уый мӕлӕтӕй фервӕздзӕн.

⁵ Сыгъдӕгзӕрдӕйы йӕ раст зонд кӕны раст фӕндагыл, ӕнӕхуыцауы йӕ фыдбылызтӕ фесафынц.

⁶ Рӕстзӕрдӕты сӕ раст зонд фервӕзын кӕны, мӕнгӕрдтӕ та сӕ монцты уацары бахауынц.

⁷ Ӕнӕхуыцауӕн йӕ зӕрдӕдарӕн йемӕ амӕлдзӕн, фыдгӕнджытӕ ӕнхъӕлмӕгӕсгӕйӕ баззайдзысты.

⁸ Рӕстуд фервӕзы фыдбылызӕй, йӕ бӕсты дзы бахауы ӕнӕхуыцау.

⁹ Ӕнӕхуыцауы ӕвзаг хионыл дӕр нӕ ауӕрды, рӕстуд йӕ зонынады фӕрцы фервӕзы.

¹⁰ Рӕстуд ӕнтыстджын куы вӕййы, уӕд сахар цин фӕкӕны; ӕнӕхуыцӕуттӕн се сӕфт куы ’рцӕуы, уӕд цины хъӕртӕ райхъуысынц.

¹¹ Рӕстгӕнджыты арфӕтӕй сахар сырӕзы, ӕнӕхуыцӕутты ’взаг та йӕ ныппырх кӕны.

¹² Ӕдылы йӕ хионы сӕгад кӕны, фӕлӕ зондджын ницы сдзуры.

¹³ Фыдӕвзаг искӕй сусӕгтӕ рахъӕр кӕны, ӕууӕнкджын адӕймаг — ӕдзӕм.

¹⁴ Ӕнӕ зондамындӕй адӕм фесӕфынц, фӕлӕ, уынаффӕгӕнджытӕ бирӕ кӕм уа, уым сӕ уӕлахиз — цӕттӕ.

¹⁵ Искӕй тыххӕй йӕ сӕр лыгмӕ чи дӕтты, уый фыдбылызы бахаудзӕн, фӕлӕ, искӕй ӕвджид ныллӕууынмӕ тагъд чи нӕ кӕны, уый — ӕдас.

¹⁶ Хӕрзӕгъдау сылгоймаг — кадджын, куыстуарзаг лӕг — хъӕздыг.

¹⁷ Хӕрзуаг адӕймаг йӕхицӕн пайда ’рхӕссы, ӕгъатыр та йӕхӕдӕг йӕхи фыдбылызы баппары.

¹⁸ Фыдгӕнӕгӕн йӕ хӕрзиуӕг мӕнг у, рӕстдзинад чи тауы, уый ӕцӕг хӕрзиуӕг райсдзӕнис.

¹⁹ Раст фӕндагыл чи цӕуы, уый цӕрдзӕн, фыддзинады фӕдыл чи згъоры, уый мӕлӕтмӕ тырны.

²⁰ Фӕлитойтӕ Дунедарӕгӕн ӕлгъаг сты, раст фӕндагыл чи цӕуы, уыдон та — ӕхцон.

²¹ Фидар зон: тӕригъӕдджын ӕнӕ ’фхӕрдӕй нӕ баззайдзӕн, фӕлӕ рӕстудты мыггаг фервӕздзӕн.

²² Хуыйӕн йӕ бырынчъы сыгъзӕрин хъусцӕг куы бакӕнай, раст уый ӕнгӕс у рӕсугъд ӕмӕ ӕнӕзонд сылгоймаг.

²³ Рӕстудты бӕллицтӕ фарн хӕссынц, ӕнӕхуыцӕуттӕн сӕ зӕрдӕдарӕн маст расайдзӕн.

²⁴ Чидӕр рӕдауӕй уары, ӕмӕ йӕ исбоныл ӕфты, чидӕр та алцӕуыл ауӕрды, фӕлӕ мӕгуырӕй-мӕгуырдӕр кӕны.

²⁵ Рӕдау зӕрдӕ цӕрӕн фӕрӕзтӕй цух нӕ уыдзӕн; искӕмӕн йӕ дойны чи басӕтта, уый йӕхӕдӕг дӕр дойныйӕ нӕ амӕлдзӕн.

²⁶ Йӕ мӕнӕу чи ’мбӕхсы, уый адӕм ӕлгъитгӕ кӕнынц, фӕлӕ дзы чи уӕй кӕны, уый арфӕты бын фӕуыдзӕн.

²⁷ Хорз ракӕнынмӕ чи тырны, уый хорзӕх райсдзӕнис, фыдбылыз чи агуры, уый йӕ ссардзӕн.

²⁸ Йӕ хъӕзыгдзинадӕй йӕ ныфс чи хӕссы, уый фӕкӕлдзӕнис, рӕстудтӕ та, йӕ сыфтӕр цъӕх цы бӕласӕн дары, уый ӕнгӕс суыдзысты.

²⁹ Йӕ хӕдзарыл фыдбылыз чи ӕфтауы, уымӕн йӕ хай — дымгӕ; ӕдылы лӕггад кӕндзӕн куырыхонӕн.

³⁰ Рӕстуды дыргъӕй царды бӕлас сырӕзы, куырыхон адӕмы зӕрдӕтӕ йӕхимӕ ’лвасы.

³¹ Кӕд раст адӕймагӕн йӕ хъуыддӕгтӕ йӕ цӕргӕбонты бафыстӕуы, уӕд ӕнӕхуыцӕуттӕн ӕмӕ тӕригъӕдджынтӕн та — уӕлдайдӕр.