Ӕмбисӕндтӕ 10 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Соломоны ӕмбисӕндтӕ. Куырыхон фыртӕй йӕ фыды зӕрдӕ райы, ӕдылы лӕппу та йӕ ныййарӕг мадӕн — масты хос.

² Мӕнг хъуыддӕгты фӕрцы дӕ къухы цы хӕзнатӕ бафтой, уыдонӕй пайда нӕй; раст фӕндагыл куы цӕуай, уӕд мӕлӕтӕй фервӕздзынӕ.

³ Дунедарӕг рӕстуды ’ххормагӕй нӕ ныууадздзӕн, фӕлӕ, ӕнӕхуыцау сыдӕй куы мӕла, уӕд ыл Йӕхи атигъ кӕндзӕн.

⁴ Зивӕггӕнаг къухтӕ мӕгуырмӕ ’ркӕнынц, кусаг къухтӕ — хъӕздыгдзинадмӕ.

⁵ Сӕрды тыллӕг чи ӕмбырд кӕны, уый зондджын лӕппу у, хуымгӕрдӕн афон фынӕй чи кӕны, уый та — ӕдылы.

⁶ Рӕстуды сӕрыл — арфӕты кады худ; ӕнӕхуыцауӕн йе ’взаг сусӕг кӕны фыдвӕнд.

⁷ Рӕстуды арфӕгондӕй мысдзысты, тӕригъӕдджынӕн йӕ кой дӕр нал баззайдзӕн.

⁸ Куырыхоны зӕрдӕйы цӕры Хуыцауы фӕдзӕхст, дзӕгъӕлдзых ӕмӕ зондцух чи у, уый та фыдбылызы бахаудзӕн.

⁹ Раст фӕндагыл чи цӕуы, уый ӕдас у, галиу фӕндӕгтыл чи цӕуы, уый та ӕфхӕрд баййафдзӕн.

¹⁰ Йӕ цӕстытӕ чи ныкъулы, уый исты фыдбылыз сараздзӕн, ӕдылы ӕмӕ къӕбӕда чи у, уый фыдбылызы бахаудзӕн.

¹¹ Рӕстуды ӕвзаг — дзӕм-дзӕмы суадон, ӕнӕхуыцауӕн йе ’взаг сусӕг кӕны фыдвӕнд.

¹² Ӕнӕуынондзинад хъаугъа расайы, уарзондзинад алы тӕригъӕд дӕр бары.

¹³ Зондджынӕн йе ’взагыл уӕлзонд цӕры, ӕдылыйӕн та йӕ фӕсонтыл уисӕй над ауайы.

¹⁴ Куырыхонтӕ хъахъхъӕнынц зонынад, ӕдылыйӕн та йе ’взаг йе сӕфт хӕстӕгдӕр кӕны.

¹⁵ Хъӕздыгӕн йӕ исбон — фидар мӕсыг, мӕгуыр лӕгӕн йӕ мӕгуырдзинад — йе сӕфт.

¹⁶ Рӕстуды фӕллӕйттӕ — царды сӕраппонд, ӕнӕхуыцауӕн та йе ’фтиаг — тӕригъӕд ракӕнынӕн.

¹⁷ Зондамындмӕ чи хъусы, уый царды фӕндагыл цӕуы, уайдзӕфтӕ чи ницӕмӕ дары, уый фӕдзӕгъӕл уыдзӕн.

¹⁸ Мӕнг ӕвзаг ӕнӕуынондзинад ӕмбӕхсы; ӕдылы хахуыртӕ дыууӕрдӕм хӕссы.

¹⁹ Бирӕ чи дзуры, уый тӕригъӕдӕй йӕхи нӕ бахиздзӕн, йӕ дзыхыл хӕцын чи зоны, уый зондджын у.

²⁰ Рӕстуды ’взаг — ӕвзаргӕ ’взист, ӕнӕхуыцауы зӕрдӕйӕн та цӕй аргъ ис?

²¹ Рӕстуды ныхӕстӕ бирӕты хъахъхъӕнынц, зондцухты та се ’дылы зонд фесафы.

²² Дунедарӕджы арфӕ адӕймаджы схъӕздыг кӕны, ӕмӕ йемӕ сагъӕс нӕ хӕссы.

²³ Ӕдылы чъизи митыл цин кӕны, зондджын та — уӕлзондыл.

²⁴ Ӕнӕхуыцӕуттыл, цӕмӕй тӕрсынц, уыдӕттӕ ’рцӕудзысты, рӕстудты бӕллицтӕ сӕххӕст уыдзысты.

²⁵ Зилгӕ дымгӕ рацыди — ӕнӕхуыцау фесӕфти, рӕстуд та мыггагмӕ фидар уыдзӕн.

²⁶ Дзымари дзых смаст кӕны, фӕздӕг цӕстытӕ къахы, магуса дӕр йе ’рвитджытӕн — уыдоны ’нгӕс.

²⁷ Дунедарӕгӕй чи тӕрсы, уый бирӕ цӕры, ӕнӕхуыцауӕн йӕ азтӕ нымад сты.

²⁸ Рӕстудӕн йӕ зӕрдӕдарӕн цин хӕссы, ӕнӕхуыцауӕн йӕ бӕллицтӕ нӕ сӕххӕст уыдзысты.

²⁹ Сыгъдӕгзӕрдӕйӕн Дунедарӕджы фӕндаг — хъахъхъӕнӕг мӕсыг, фыдгӕнӕджы та тасы ’фтауы.

³⁰ Рӕстуд мыггагмӕ нӕ фӕцуддзӕн, ӕнӕхуыцӕуттӕ зӕххыл нӕ баззайдзысты.

³¹ Рӕстуды ӕвзагӕй уӕлзонд тӕдзы, фыд ӕвзаг та къуырд ӕрцӕудзӕнис.

³² Рӕстуды ’взаг хъӕугӕ ныхас зоны, ӕнӕхуыцауӕн йе ’взаг — зианхӕссӕг.