4 Паддзахӕдтӕ 9 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Пехуымпар Елисей пехуымпарты ахуыргӕнинӕгтӕй иумӕ фӕдзырдта ӕмӕ йын загъта: «Мӕнӕ ацы оливӕйы сойы дурын ӕвӕстиатӕй Галаадаг Рамотмӕ ахӕсс.

² Уым бацагур Нимшийы фырт Йосафаты фырт Йегуйы. Йе ’мбӕлттимӕ уыдзӕн, ӕмӕ йӕ сӕ цурӕй рахон ӕмӕ йӕ ӕндӕр уатмӕ хибар ранмӕ бакӕн.

³ Уым ын дӕ дурыны сой йӕ сӕрыл ӕруадз ӕмӕ йын зӕгъ: „Афтӕ зӕгъы Дунедарӕг: сӕрдын дӕ ӕмӕ дӕ Израилӕн сидын паддзахӕй“. Уый фӕстӕ-иу дуар фегом кӕн ӕмӕ лидз, фӕстӕмӕ дӕр ма фӕкӕс, афтӕмӕй».

⁴ Ӕвзонг пехуымпар, Елисейы ӕрвыст, араст ис Галаадаг Рамотмӕ.

⁵ Куы бахӕццӕ, уӕд цӕлхӕмбырдӕй бадгӕ баййӕфта хӕстон разамонджыты. Сӕ иумӕ дзы бауырдыг: «Ахсджиаг ныхасаг мӕ ис уемӕ, ӕфсады хицау». Йегу йӕ афарста: «Махӕй кӕимӕ?» Уый йын загъта: «Дӕуимӕ, ӕфсады хицау».

⁶ Йегу сыстад йӕ бынатӕй ӕмӕ пехуымпаримӕ хӕдзармӕ бацыд. Уый йын йӕ сӕрыл сой ӕруагъта ӕмӕ йын загъта: «Афтӕ зӕгъы Дунедарӕг: „Сӕрдын дӕ ӕмӕ дӕ Израилӕн ӕвӕрын паддзахӕй.

⁷ Ды ныццӕгъддзынӕ дӕ паддзах Ахавы байзӕддӕгты ӕмӕ Мын афтӕмӕй райсдзынӕ Мӕ маст. Райсдзынӕ, Иезавел кӕй амарын кодта, Мӕ уыцы цагъарты туг: Мӕ пехуымпарты ӕмӕ Ме ’ппӕт лӕггадгӕнджыты туг.

⁸ Ахавы хӕдзарвӕндаг бабын уыдзӕн, стырӕй, чысылӕй дзы иу нӕлгоймаг дӕр нал ныууадздзынӕн Израилы адӕмы ’хсӕн.

⁹ Бафхӕрдзынӕн Ахавы мыггаджы, Наваты фырт Йоровамы ӕмӕ Ахийайы фырт Баасайы мыггӕгты куыд бафхӕрдтон, афтӕ.

¹⁰ Иезавелы дӕр куыйтӕ бахӕрдзысты Изреелы быдыры, ӕмӕ ӕнӕныгӕдӕй баззайдзӕн“». Пехуымпар куыддӕр йӕ ныхас фӕци, афтӕ дуар йӕ сӕрыл ахаста ӕмӕ алыгъди.

¹¹ Йегу йӕ хицауы лӕггадгӕнджытӕм куы рацыд, уӕд ӕй уыдон бафарстой: «Цы хабар у? Уыцы нӕрӕмон дӕм цӕй тыххӕй ӕрбацыд?» Дзуапп сын радта: «Цы лӕг у ӕмӕ цы ӕнӕхъола ныхӕстӕ фӕкӕны, уый уӕхӕдӕг дӕр куы зонут».

¹² Йе ’мбӕлттӕ йӕ баййардтой: «Фӕдфӕливӕн ныхӕстӕ ма кӕн! Радзур нын, цы дын дзырдта, уый». Йегу сын дзуапп радта: «Уый загъта: „Афтӕ зӕгъы Дунедарӕг: ацы байсӕрстӕй дӕ Ӕз Израилӕн паддзахӕй расидтӕн“».

¹³ Уыдон ын уайтагъд йӕ къӕхты бын къӕпхӕнтыл сӕ пӕлӕзтӕ ӕрытыдтой, сыкъауадындзтӕй ныууасыдысты ӕмӕ ныхъхъӕр кодтой: «Йегу сси паддзах!»

¹⁴ Йосафаты фырт Йегу, Нимшийы мыггагӕй, тӕккӕ уыцы сахат Йорамы ныхмӕ скодта сусӕгвӕнд. Уыцы заман Йорам та Израилы ’фсадимӕ лӕууыд Галаадаг Рамоты раз ӕмӕ хӕцыд Арамы паддзах Хазаелы ныхмӕ.

¹⁵ Фӕлӕ арамейӕгтӕ Йорамы фӕцӕфтӕ кодтой, Арамы паддзах Хазаелы ныхмӕ куы хӕцыди, уӕд, ӕмӕ аздӕхти Изреелмӕ, йӕхи дзӕбӕх кӕнынмӕ. Йегу йе ’мбӕлттӕн загъта: «Кӕд мемӕ разы стут, уӕд уӕ ацы сахарӕй Изреелмӕ мачи алидзӕд, ам цы ’рцыд, уый фехъусын кӕнынмӕ».

¹⁶ Йегу йӕхӕдӕг йӕ бӕхыл абадт ӕмӕ араст Изреелмӕ, Йорам кӕм сади ӕмӕ йӕм Иудейаг паддзах Ахазиа бӕрӕггӕнӕг кӕдӕм ацыд, уырдӕм.

¹⁷ Хъалагъур Изреелы мӕсыджы сӕрӕй ауыдта, Йегуйы ӕфсӕдтӕ куыд ӕрбабырсынц, уый, ӕмӕ паддзахӕн фехъусын кодта: «Бирӕ ӕфсад ӕрбацӕуы». Йорам ын загъта: «Иу бӕхджыны сӕм арвит ӕмӕ, цы хабар ӕрбахастой, уымӕй сӕ бафӕрсӕд».

¹⁸ Бӕхджын сӕ размӕ рацыд ӕмӕ сын загъта: «Паддзах фӕрсы, хабӕрттӕ, дам, куыд сты». Йегу йын афтӕ: «Цы дӕ хъуыддаг ис хабӕрттӕм? Цӕугӕ мӕ фӕдыл!» Хъалагъур паддзахӕн фехъусын кодта: «Бӕхджын сӕм бахӕццӕ, фӕлӕ фӕстӕмӕ нал раздӕхт».

¹⁹ Арвыстой ӕндӕр бӕхджыны, ӕмӕ та уый дӕр сӕ размӕ куы бахӕццӕ, уӕд загъта: «Паддзах фӕрсы, хабӕрттӕ, дам, куыд сты». Йегу та уымӕн дӕр афтӕ: «Цы дӕ хъуыддаг ис хабӕрттӕм? Цӕугӕ мӕ фӕдыл!»

²⁰ Хъалагъур та паддзахӕн фехъусын кодта: «Ацы бӕхджын дӕр сӕ размӕ бахӕццӕ ӕмӕ нал раздӕхт. Ӕфсӕдты раздзогӕн йӕ бӕх Нимшийы фырт Йегуйы бӕхы цыд кӕны, уыцы знӕтӕй ӕрбалӕгӕрды».

²¹ Йорам зӕгъы: «Мӕ уӕрдон мын сифтындз!» Сифтыгътой уӕрдон. Израилы паддзах Йорам ӕмӕ Иудейы паддзах Ахазиа сӕ уӕрдӕтты Йегуйы размӕ ахӕцыдысты. Баиу сты изреелаг Навоты зӕххы хайыл.

²² Йорам Йегуйы куы ауыдта, уӕд ӕй бафарста: «Куыд сты хабӕрттӕ?» Йегу йын афтӕ: «Куыд хъуамӕ уой, дӕ мад Иезавел кӕйдӕр хуыцӕуттӕм куы кува ӕмӕ йӕхи ӕдзух дӕсныфӕрсӕнтыл куы ирхӕфса, уӕд?»

²³ Уый фехъусгӕйӕ, Йорам йӕ уӕрдон фӕстӕмӕ фездӕхта ӕмӕ лидзгӕ-лидзын ныхъхъӕр кодта: «Гадзрахатӕй ныл рацыдысты, Ахазиа!»

²⁴ Йегу йӕ фат суагъта, ӕмӕ Йорамӕн йӕ дыууӕ уӕны ’хсӕн бацыд ӕмӕ йын разӕй йӕ зӕрдӕ ратыдта. Йорам йӕ уӕрдоны куы ’рхаудта,

²⁵ уӕд Йегу йӕ фӕсдзӕуин Бидкарӕн загъта: «Цу ӕмӕ йӕ изреелаг Навоты зӕхмӕ баппар. Ӕрхъуыды-ма кӕн, йӕ фыд Ахавы фӕдыл дыууӕйӕ куы цыдыстӕм, уӕд Дунедарӕг уыцы Ахавы тыххӕй рагагъоммӕ цы загъта, уый:

²⁶ „Ӕз федтон, знон Навоты ӕмӕ йӕ фыртты куыд амардтой, уый ӕмӕ сын сӕ туг райсдзынӕн ацы зӕххы хайыл“. Гъемӕ йӕ рахӕсс ӕмӕ йӕ баппар уыцы зӕххы хайыл, ӕмӕ Дунедарӕджы дзырд сӕххӕст уыдзӕн».

²⁷ Ныр иудейаг паддзах Ахазиа та фӕцӕйлыгъди Бет-Ганы ’рдӕм. Фӕлӕ йӕ Йегу фӕсте асырдта ӕмӕ йӕ фӕсдзӕуинтӕн бардзырд радта: «Уый дӕр амарут йӕ уӕрдоны!» Хабар ӕрцыди Гуры бӕрзӕндыл, Ивлеамы сахармӕ ӕввахс. Ахазиа ма Мегиддойы сахармӕ баирвӕзт ӕмӕ уым амард.

²⁸ Йӕ фӕсдзӕуинтӕ йӕ аластой Йерусалиммӕ, Давиды сахармӕ, ӕмӕ йӕ бавӕрдтой йӕ фыдӕлты зӕппадзы.

²⁹ Ахазиа Иудейы паддзах сси Ахавы фырт Йорамы паддзахиуӕджы иуӕндӕсӕм аз.

³⁰ Йегу Изреелмӕ ӕрбаздӕхт, ӕмӕ Иезавел уый куы базыдта, уӕд йӕ цӕстытӕ сахуырста, йӕ сӕрмӕ дӕр базылди, ӕмӕ афтӕмӕй рудзынгӕй ӕддӕмӕ кӕсӕг йӕхи скодта.

³¹ Йегу сахары кулдуарыл куыддӕр бахызт, афтӕ йӕм радзырдта: «Йӕ паддзахы чи амардта, уыцы Зимрийы хабар хорз рауади?»

³² Йегу рудзынгмӕ скасти ӕмӕ ныхъхъӕр кодта: «Мӕ чапартӕ, кӕм стут?» Дыууӕ ӕви йӕм ӕртӕ евнухы ракасти рудзынгӕй.

³³ Йегу сын загъта: «Раппарут уыцы сылгоймаджы!» Раппӕрстой йӕ, ӕмӕ куы ’рхауди, уӕд йӕ туг бакалди галуаны къулыл ӕмӕ бӕхтыл. Йӕ бӕхы къӕхты бын ӕй фӕкодта Йегу.

³⁴ Уый фӕстӕ Йегу галуанмӕ мидӕмӕ бацыд, уым бахордта ӕмӕ бануӕзта, стӕй загъта: «Уыцы ӕлгъыстаджы кой бакӕнут, баныгӕнут ӕй, уӕддӕр та паддзахы чызг у!»

³⁵ Рацыдысты йӕм, фӕлӕ дзы сӕрыкъуыдыр ӕмӕ къухтӕ ӕмӕ къӕхты стджытӕй уӕлдай ницыуал ссардтой.

³⁶ Уӕд фӕстӕмӕ ӕрбаздӕхтысты ӕмӕ хабар паддзахӕн радзырдтой. Уый сын загъта: «Дунедарӕг тишбийаг Илийайы уылты цы загъта, уый йыл ӕрцыд: Изреелы зӕххыл Иезавелӕн йӕ мард куыйтӕ бахӕрдзысты.

³⁷ Хуымы фаджысау суыдзӕн йӕ мард Изреелы быдыры, ӕмӕ ничиуал зӕгъдзӕн, уый Иезавел у, зӕгъгӕ».