4 Паддзахӕдтӕ 12 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Израилы паддзах Йегуйы паддзахиуӕджы ӕвдӕм аз паддзах сси Иоас ӕмӕ Йерусалимы сахары паддзахиуӕг фӕкодта дыууиссӕдз азы. Йӕ мад Цивйа уыди беер-шевӕйаг чызг.

² Иоас цӕргӕ-цӕрӕнбонты Дунедарӕгӕн фӕндон хъуыддӕгтӕ кодта, сауджын Йехода йын куыд амыдта, афтӕ.

³ Ӕрмӕст кувӕн къуыбыртӕ нӕ аивта, адӕм йӕ заманы дӕр кусӕрттӕ кодтой ӕмӕ буд сыгътой уыцы къуыппытыл.

⁴ Иоас сауджынтӕн бафӕдзӕхста: «Дунедарӕджы Кувӕндонмӕ ӕрбацӕуӕг-иу, йӕ рӕдау къух куыд амона, афтӕ йе ’взисты хъалон, фиддон кӕнӕ хуын куы ӕрбахӕсса,

⁵ уӕд-иу алы сауджын дӕр, чи йӕм ӕрбацӕуа, уымӕн йе ’взист райсӕд ӕмӕ йӕ цӕст дарӕд, цӕмӕй иууылдӕр хардзгонд цӕуа Кувӕндоны хӕлддзӕгтӕ цалцӕг кӕныныл».

⁶ Ӕцӕг, Иоасы паддзахиуӕгыл дыууын ӕртӕ азы куы рацыд, уӕд дӕр сауджынтӕ нӕма бавнӕлдтой уыцы бӕрнон куыстмӕ.

⁷ Ӕмӕ уӕд паддзах Иоас фӕдзырдта Йехода ӕмӕ иннӕ сауджынтӕм ӕмӕ сӕ бафарста: «Кувӕндон цӕуылнӕ сцалцӕг кӕнут ныронг? Уӕдӕ афтӕ! Ӕххуыс уын чи кӕны, уыдонӕй ӕхца мауал исут, фӕлӕ сӕ раттут Кувӕндон цалцӕгӕн кӕнынӕн».

⁸ Сауджынтӕ дзырд радтой, адӕмӕй ӕхца кӕй нал исдзысты ӕмӕ Кувӕндон цалцӕг кӕныны хъуыддагӕй сӕхи кӕй аиуварс кӕндзысты.

⁹ Сауджын Йехода райста асыкк, йӕ сӕрыл ын хуынкъ скодта ӕмӕ йӕ нывондхӕссӕны рахизфарс ӕрӕвӕрдта. Ӕмӕ-иу Дунедарӕджы Кувӕндонмӕ цӕуӕг адӕм цы ӕхца ӕрбахастой, уыдон-иу кулдуар хъахъхъӕнӕг сауджынтӕ уыцы асыччы ныппӕрстой.

¹⁰ Асыкк байдзаг ис, уый-иу куы федтой, уӕд-иу паддзахы нымӕрдар ӕмӕ алчер ӕрбацыдысты, ӕвзист-иу дзӕкъулты бабастой ӕмӕ-иу сын сӕ уӕз сбарстой.

¹¹ Уый фӕстӕ-иу уыцы ӕвзист радтой, Дунедарӕджы Кувӕндон цалцӕг кӕнын кӕй бӕрны уыдис, уыцы лӕгтӕм, ӕмӕ дзы уыдон мызд фыстой хъӕддӕснытӕ, аразджытӕ,

¹² сисамайджытӕ ӕмӕ дурлӕгъзгӕнджытӕн. Кувӕндоны хӕлддзӕгтӕ банывыл кӕнынӕн ӕмӕ йӕ иннӕ хъуӕгтӕн афоныл ӕлхӕдтой хъӕдӕрмӕг ӕмӕ лӕгъзгонд дуртӕ.

¹³ Ӕрмӕст Кувӕндонӕн конд не ’рцыди ӕвзист тӕбӕгътӕ, кӕрдтӕ, къустӕ, сыкъауадындзтӕ, стӕй алы ӕндӕр сыгъзӕрин ӕмӕ ӕвзист мигӕнӕнтӕ.

¹⁴ Ӕвзист иууылдӕр лӕвӕрд цыди, Кувӕндон цалцӕг кӕныны куыст кӕй бӕрны уыди, уыдонӕн.

¹⁵ Бӕрны лӕгтӕй дзуапп нӕ домдтой, уымӕн ӕмӕ уыдон ӕууӕнкджын адӕм уыдысты.

¹⁶ Ӕрмӕст-иу фиддоны нывонд ӕмӕ тӕригъӕды нывонды тыххӕй цы ’взист ӕрбахастой, уый Кувӕндонӕн лӕвӕрд нӕ цыд, уымӕн ӕмӕ уый уыди сауджынты хай.

¹⁷ Уыцы заман Арамы паддзах Хазаел Гаты сахары ныхмӕ схӕцыд ӕмӕ йӕ бацахста. Уый фӕстӕ та сфӕнд кодта Йерусалиммӕ бабырсын.

¹⁸ Фӕлӕ Иудейы паддзах Иоас райста, йӕ фыдӕлтӕ, Иудейы паддзӕхтӕ — Иосафат, Иорам ӕмӕ Ахазиа — Кувӕндоны къӕбицмӕ цы уаз дзауматӕ бахастой, стӕй Кувӕндоны хӕзнадӕтты сыгъзӕринӕй цыдӕриддӕр разынди, уыдон, ӕмӕ сӕ Арамы паддзах Хазаелӕн арвыста. Ӕмӕ уӕд уый Йерусалиммӕ нал бабырста.

¹⁹ Иоасы иннӕ хабӕрттӕ иууылдӕр фыст ӕрцыдысты «Иудейаг паддзӕхты азфыстыты чиныджы».

²⁰ Паддзах Иоасы ныхмӕ йӕ дӕлдӕртӕ сусӕгвӕнд скодтой ӕмӕ йӕ амардтой Силламӕ фӕндагыл, Миллойы бӕстыхайы.

²¹ Йӕ дӕлдӕртӕ, чи йӕ амардта, уыдон уыдысты: Шиматы фырт Йозавад ӕмӕ Шомеры фырт Йехозавад. Йӕ мард ын бавӕрдтой йӕ фыдӕлты зӕппадзы, Давиды сахары. Йӕ фӕстӕ паддзах сси йӕ фырт Амациа.