2 Паддзахӕдтӕ 5 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Давид сси ӕппӕт Израилы паддзах

¹ Израилы хӕдзарвӕндӕгтӕ иууылдӕр ӕрцыдысты Давидмӕ Хевронмӕ ӕмӕ йын загътой: «Дӕ туг, де стӕг стӕм мах.

² Амӕй размӕ дӕр, Саул паддзахиуӕг куы кодта, уӕд ды лӕууыдтӕ Израилы ӕфсады сӕргъы. Дунедарӕг дын загъта: „Ды хъахъхъӕндзынӕ Мӕ адӕмы, Израилы, ды уыдзынӕ сӕ фӕтӕг“».

³ Израилы хистӕртӕ ӕмхуызонӕй паддзахмӕ Хевронмӕ ӕрбацыдысты. Уым, Дунедарӕджы раз, паддзах Давид семӕ фидыд сарӕзта, ӕмӕ йӕ Израилӕн паддзахӕй байсӕрстой.

⁴ Дӕс ӕмӕ ссӕдз азы цыди Давидыл, паддзах куы сси, уӕд, паддзахиуӕг та кодта дыууиссӕдз азы.

⁵ Хевроны авд азы ӕмӕ ӕхсӕз мӕйы дӕргъы паддзахиуӕг кодта Иудӕйӕн, Йерусалимы та — ӕппӕт Израил ӕмӕ Иудӕйы — ӕртындӕс ӕмӕ ссӕдз азы.

Йерусалим — Давиды сӕйраг сахар

⁶ Паддзах йӕ хӕстонтимӕ араст Йерусалиммӕ, уымы цӕрӕг йевусӕгты ныхмӕ хӕцынмӕ. Уыдон Давидӕн загътой: «Нӕ дын бантысдзӕн ардӕм ӕрбацӕуын, цалынмӕ куырмытӕ ӕмӕ къуылыхты ардыгӕй аиуварс кӕнай, уӕдмӕ». Уыдон афтӕ ӕнхъӕл уыдысты, Давид сахармӕ нӕ бацӕудзӕн.

⁷ Фӕлӕ Давид басаста Сионы фидар, ӕмӕ уый ныр Давиды сахар у.

⁸ Ӕмӕ загъта Давид уыцы бон: «Йевусӕгтимӕ чидӕриддӕр хӕцы, уый сӕ цӕгъдӕд! Давид йе сӕфт уыны „къуылыхтӕ ӕмӕ куырмытӕй“». Уымӕн загъдӕуы: «Куырм ӕмӕ къуылыхӕн Дунедарӕджы хӕдзармӕ фӕндаг нӕй».

⁹ Давид ӕрцарди фидары, Давиды сахар ӕй схуыдта ӕмӕ йын Миллойӕ мидӕмӕ, фидары онг, йӕ алыварс бӕстыхӕйттӕ сарӕзта.

¹⁰ Давиды хъомыс фылдӕрӕй-фылдӕр кодта — Дунедарӕг, Уӕларвӕфсады Бардарӕг, уыди йемӕ.

¹¹ Тиры паддзах Хирам Давидмӕ йӕ минӕвӕртты ӕрбарвыста, семӕ — кедр хъӕдӕрмӕг, ноджы — дурамайджытӕ ӕмӕ хъӕддӕснытӕ, ӕмӕ Давидӕн галуан сарӕзтой.

¹² Давид бамбӕрста, Израилӕн ӕй паддзахӕй Дунедарӕг кӕй сӕвӕрдта ӕмӕ йын йӕ паддзахад Израилы, Йӕ адӕмы сӕраппонд кӕй скадджын кодта.

¹³ Давид Хевронӕй куы ӕрбацыди, уӕд ма Йерусалимы дӕр номылустытӕ ӕмӕ устытӕ скодта, ӕмӕ ма йын уыдонӕй дӕр рацыди фырттӕ ӕмӕ чызджытӕ.

¹⁴ Мӕнӕ, Йерусалимы йын чи райгуырд, уыдоны нӕмттӕ: Шаммуа, Шовав, Натан, Соломон,

¹⁵ Ивхар, Елишуа, Нефег, Йафиа,

¹⁶ Елишама, Елйада, Елифелет.

Давиды уӕлахиз филистимӕгтыл

¹⁷ Филистимӕгтӕ фехъуыстой, Давиды Израилӕн паддзахӕй кӕй байсӕрстой, уый ӕмӕ ӕмхуызонӕй йӕ агурӕг фӕраст сты, ӕрцахсӕм ӕй, зӕгъгӕ. Давид уый куы базыдта, уӕд фидары бацыд.

¹⁸ Филистимӕгтӕ ссыдысты ӕмӕ Рефаимы дӕлвӕз бацахстой.

¹⁹ Давид Дунедарӕджы бафарста: «Филистимӕгты ныхмӕ цӕуон ӕви нӕ? Мӕ къухмӕ сӕ ратдзынӕ?» Дунедарӕг ын загъта: «Цу, ратдзынӕн сӕ дӕ къухмӕ ӕнӕмӕнг».

²⁰ Давид бацыди Баал-Перациммӕ ӕмӕ сӕ уым ныддӕрӕн кодта. Загъта: «Дон йӕ ауӕзт куыд атоны, афтӕ мын мӕ цӕсты раз ме знӕгты ӕнгом рӕнхъытӕ батыдта Дунедарӕг». Уымӕ гӕсгӕ ацы бынат схуыдтой Баал-Перацим.

²¹ Филистимӕгтӕн сӕ гуымирытӕ уым дзӕгъӕлӕй баззадысты, ӕмӕ сӕ Давид ӕмӕ йӕ адӕм семӕ рахастой.

²² Филистимӕгтӕ та ногӕй ссыдысты ӕмӕ Рефаимы дӕлвӕз бацахстой.

²³ Давид дӕр та Дунедарӕджы бафарста, ӕмӕ йын Уый дзуапп радта: «Сӕ ныхмӕ ма ссу, фӕлӕ сӕ иувӕрсты ӕрзил ӕмӕ тута бӕлӕсты къохы ’рдыгӕй сӕ чъылдыммӕ баздӕх.

²⁴ Ӕмӕ, цыма тута бӕлӕсты цъуппытӕй къахуынӕр хъуысы, афтӕ дӕм куы фӕкӕса, уӕд-иу райдай хӕцын — уый Дунедарӕг рацыди дӕ разӕй филистимӕгты ӕфсад цӕгъдынмӕ».

²⁵ Давид сӕххӕст кодта Дунедарӕджы фӕдзӕхст ӕмӕ филистимӕгты дӕрӕн кодта Гевӕйӕ суанг Гезеры онг.