2 Паддзахӕдтӕ 19 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Йоавмӕ фӕхабар чындӕуыд: «Паддзах кӕуы ӕмӕ хъарджытӕ кӕны Авессаломыл».

² Ӕмӕ уыцы боны уӕлахизы цин ӕппӕт адӕмӕн дӕр хъарӕгӕй йӕхи раивта, уымӕн ӕмӕ фехъуыстой, паддзах йӕ фыртыл кӕй хъыг кӕны, уый.

³ Уыцы бон хӕстон адӕм сахармӕ дӕр хъуызӕгау цыдысты, раст мӕнӕ хӕсты быдырӕй ӕгады лыгъд чи ракӕны, уыдон куыд фӕхъуызынц, афтӕ.

⁴ Паддзах та адӕмӕн йӕхи дӕр не ’вдыста, дуарӕхгӕдӕй ӕрдиаг кодта: «Мӕ фырт Авессалом! Авессалом, мӕ фырт, мӕ фырт!»

⁵ Йоав паддзахмӕ йӕ хӕдзармӕ бацыди ӕмӕ йын загъта: «Ды ныртӕккӕ къӕмдзӕстыджы ӕппарыс дӕ цагъарты, тӕккӕ абон дын дӕхи, дӕ фырттӕ ӕмӕ дӕ чызджыты, дӕ устытӕ ӕмӕ дӕ номылустыты чи фервӕзын кодта, уыдоны,

⁶ уымӕн ӕмӕ ды уарзыс, йе сӕфт дӕ чи уыны, уыдоны ӕмӕ де сӕфт уыныс, чи дӕ уарзы, уыдонӕй. Абон равдыстай, балхонтӕ ӕмӕ хӕстонтӕ дӕумӕ нымады дӕр кӕй не сты, уый. Абон ӕз базыдтон: Авессалом ӕгасӕй куы баззадаид, мах та тӕккӕ абон иууылдӕр куы амардаиккам, уӕд дӕм уый раст фӕкастаид.

⁷ Рацу ӕмӕ дӕ ныхасӕй дӕ цагъарты зӕрдӕ фӕлӕууын кӕн. Дунедарӕгӕй дын ард хӕрын, куынӕ рацӕуай, уӕд дӕм ахсӕв иунӕг лӕг дӕр нал баззайдзӕн, ӕмӕ дын уый, ӕвзонгӕй нырмӕ дыл цы бӕллӕхтӕ ӕрцыди, ӕппӕт уыдонӕй дӕр фыддӕр уыдзӕн».

⁸ Паддзах рацыди ӕмӕ кулдуары раз ӕрбадт. Кулдуары раз бады, зӕгъгӕ, уый адӕмыл айхъуыст, ӕмӕ уайтагъд йӕ размӕ ӕрбамбырд сты. Ныр израилӕгтӕй та алчи йӕ хӕдзармӕ фӕлыгъд.

Давиды ӕрбаздӕхт

⁹ Израилы адӕм, ӕппӕт хӕдзарвӕндӕгтӕ дӕр, сӕхимидӕг быцӕу ныхас систой: «Паддзах нӕ фервӕзын кодта не знӕгтӕй, суӕгъд нӕ кодта филистимӕгты къухӕй, йӕхӕдӕг та, Авессаломӕй лидзгӕйӕ, ныууагъта йӕ зӕхх.

¹⁰ Авессаломы нӕхицӕн байсӕрстам паддзахӕй, фӕлӕ уый хӕсты куы фӕмард, уӕд ныр цы фӕстиат кӕнут паддзах Давиды фӕстӕмӕ раздахыныл?»

¹¹ Израилӕгты ныхӕстӕ паддзахмӕ фӕхӕццӕ сты, ӕмӕ Давид арвыста сауджынтӕ Цадок ӕмӕ Авиафарӕн бафӕдзӕхсынмӕ: «Иудӕйы хистӕртӕн зӕгъут: „Паддзахы йӕ хӕдзармӕ раздахыны хъуыддаджы уӕ фӕсте баззайын цӕмӕн фӕнды?

¹² Ме ’фсымӕртӕ куы стут, мӕ туг ӕмӕ ме стӕг, уӕд паддзахы раздахыны хъуыддаджы фӕсте цӕмӕн хъуамӕ баззайат?“

¹³ Амасайӕн дӕр зӕгъут: „Ды мӕ туг ӕмӕ ме стӕг нӕ дӕ, ӕви? Хуыцау мын афтӕтӕ ӕмӕ уфтӕтӕ, стӕй ноджы фыддӕртӕ бакӕнӕд, цӕрӕнбонтӕм мын Йоавы бӕсты ды ӕфсады хицау куынӕ уай, уӕд!“»

¹⁴ Афтӕмӕй Давид ӕппӕт иудейӕгты дӕр иу адӕймагау ӕртасын кодта, ӕмӕ уыдон арвыстой паддзахмӕ: «Раздӕх, дӕхӕдӕг дӕр ӕмӕ дӕ адӕм дӕр!»

¹⁵ Паддзах раздӕхти ӕмӕ Иорданы былгӕронмӕ ӕрцыд. Иудейӕгтӕ рараст сты паддзахы размӕ, Иорданы фаллаг фарсӕй йӕ ӕрбахизын кӕнынмӕ, ӕмӕ ӕрхӕццӕ сты Гилгалмӕ.

¹⁶ Паддзах Давиды размӕ иудейӕгтимӕ атагъд кодта бахуримаг Шими дӕр, Герайы фырт, Бениамины байзӕддаг;

¹⁷ йемӕ — иу мин адӕймаджы Бениамины мыггагӕй, стӕй ма — Саулы хӕдзары лӕггадгӕнӕг Цива йӕ фынддӕс фыртимӕ ӕмӕ йе ссӕдз цагъаримӕ. Ӕмхуызонӕй атындзыдтой Иорданы ’рдӕм паддзахы размӕ

¹⁸ ӕмӕ паддзахӕн ӕд хӕдзаронтӕ ацырдӕм ӕрбахизынмӕ феххуыс кодтой. Паддзахӕн йӕ алы фӕндон ӕххӕст кӕнынмӕ дӕр гӕппӕввонгӕй лӕууыдысты. Паддзах Иорданы фаллаг фарс куыддӕр йӕ къах ӕрӕвӕрдта, афтӕ Герайы фырт Шими йӕ разы зӕххыл ныддӕлгом ис

¹⁹ ӕмӕ йын загъта: «О мӕ паддзах, ма мӕ бафхӕр мӕ азымы тыххӕй! Мӕ цӕстмӕ мын ма бадар, мӕ бардарӕг, паддзах, Йерусалимӕй куы рацыди, уӕд дӕ цагъар цы тӕригъӕды бацыд, уый. Хӕрам зӕрдӕ мӕм ма бадар, мӕ паддзах.

²⁰ Хорз зоны дӕ цагъар йӕ азым, ӕмӕ мӕнӕ абон Йосефы хӕдзарвӕндагӕн се ’ппӕты разӕй ӕрбацыдтӕн мӕ бардарӕгыл, паддзахыл, сӕмбӕлынмӕ».

²¹ Церуайы фырт Авишай афтӕ бакодта: «Ау, Шимийӕн, Дунедарӕджы байсӕрсты кӕй ӕлгъыста, уый тыххӕй марыны тӕрхон нӕ уыдзӕн?»

²² Давид ын дзуапп радта: «Цы мӕ агурут, Церуайы фырттӕ? Мӕ фӕндагыл цӕхгӕрмӕ цӕмӕн ныллӕууыдыстут? Ахӕм бон марыны тӕрхон скӕнӕн куыд ис Израилы? Израилы паддзах кӕй дӕн, уый та ныртӕккӕ мӕхи цӕстӕй куы уынын!»

²³ Ӕмӕ загъта паддзах Шимийӕн: «Нӕ амӕлдзынӕ». Ӕмӕ йын ард бахордта.

²⁴ Паддзахы размӕ рацыди Саулы фырты фырт Мефивошет дӕр. Паддзахы ацыды бонӕй, сӕрӕгасӕй фӕстӕмӕ куы ӕрбаздӕхти, уыцы бонмӕ уый йӕ къӕхты ныхтӕ дӕр никуы ракодта, йӕ зачъе дӕр никуы фӕцыбыр кодта, йӕ дарӕс дӕр никуы ныхсадта.

²⁵ Йерусалиммӕ паддзахы размӕ куы ӕрбацыди, уӕд ӕй паддзах бафарста: «Мефивошет, мемӕ цӕуылнӕ ацыдтӕ?»

²⁶ Уый йын дзуапп радта: «О мӕ бардарӕг, паддзах! Мӕ фӕсдзӕуин мӕ афӕлывта. Къуылых кӕй дӕн, уымӕ гӕсгӕ ӕз, дӕ цагъар, афтӕ хъуыды кодтон, хӕрӕгыл мӕхицӕн саргъ сӕвӕрын кӕндзынӕн ӕмӕ мӕ паддзахмӕ ацӕудзынӕн, зӕгъгӕ.

²⁷ Фӕлӕ мӕныл, дӕ цагъарыл, мӕ фӕсдзӕуин дӕ разы, мӕ бардарӕджы, паддзахы раз хахуыртӕ фӕкодта. Мӕ хицау, мӕ паддзах! Ды Хуыцауы зӕдау дӕ ӕмӕ, куыд хуыздӕр дӕм кӕсы, афтӕ бакӕн.

²⁸ Мӕ бардарӕг, паддзах, дӕуӕн дӕ бон уыди, ӕмӕ мын мӕ фыды хӕдзарвӕндаг ӕгасӕй дӕр ныццӕгъдай, фӕлӕ ды дӕ цагъары демӕ ӕмвынг скодтай! Уӕд ма ӕз цы цӕсгомӕй хъаст кӕнон паддзахӕн?»

²⁹ Паддзах загъта: «Уыцы ныхӕстӕ ныууадз, цӕмӕн мын сӕ дзурыс? Мӕнӕ дын мӕ уынаффӕ: дӕ зӕххытӕ Циваимӕ уе ’хсӕн адих кӕн».

³⁰ Мефивошет паддзахӕн загъта: «Ӕгайтма мӕ бардарӕг, паддзах, йӕ хӕдзармӕ сӕрӕгасӕй ӕрбаздӕхти! Иууылдӕр сӕ Цива айсӕд!»

³¹ Уымӕй размӕ Рогелимӕй ӕрцыди галаадаг Барзиллай дӕр ӕмӕ паддзахимӕ бацыд Иорданы былгӕронмӕ, уыцы ран ын фӕндараст зӕгъынмӕ.

³² Барзиллай, хӕрз зӕронд лӕг, ӕстайаздзыд, уыди тынг бонджын ӕмӕ, паддзах Маханаимы куы уыди, уӕд ӕй ницы хъуаг уагъта.

³³ Паддзах ын загъта: «Рацу мемӕ ӕмӕ ницы хъуаг уыдзынӕ Йерусалимы».

³⁴ Фӕлӕ йын Барзиллай дзуапп радта: «Цал азы ма цӕрдзынӕн, цӕй номыл ма цӕуон паддзахимӕ Йерусалиммӕ?

³⁵ Ныридӕгӕн мыл ӕстай азы куы цӕуы, уӕд ма мӕм цы хур кӕсы фидӕнӕй? Цы хӕрын ӕмӕ цы нуазын, уыдоны ад ма бамбардзӕни дӕ цагъар? Зарӕггӕнджыты хъӕлӕс ӕрцахсынхъом ма суыдзысты мӕ хъустӕ? Мӕ бардарӕгӕн, паддзахӕн, фыдӕбоны хос цӕмӕн хъуамӕ уон?

³⁶ Афтӕ ма йӕ паддзахимӕ Иорданы онг иу чысыл бауайын фӕндыди дӕ цагъары. Дзӕгъӕлы мӕ кӕны паддзах ахӕм стыр хорзӕхы аккаг.

³⁷ Фӕстӕмӕ аздӕхыны бар ратт дӕ цагъарӕн, ӕмӕ мӕхи сахары, мӕ фыд ӕмӕ мӕ мады зӕппадзы цур амӕлон. Фӕлӕ кӕд гӕнӕн ис, уӕд мӕ бардарӕгимӕ, паддзахимӕ, араст уӕд мӕнӕ дӕ цагъар, мӕ фырт Кимхам, ӕмӕ дӕ бар уӕд».

³⁸ Паддзах загъта: «Мемӕ рацӕуӕд Кимхам ӕмӕ йын, ды цы зӕгъай, уый сараздзынӕн, цыдӕриддӕр мӕ бацагурай, уый бакӕндзынӕн».

³⁹ Паддзах аба кодта Барзиллайӕн, Хуыцауыл ӕй бафӕдзӕхста, ӕмӕ уый йӕ хӕдзармӕ аздӕхт. Адӕм иууылдӕр Иорданы фаллаг фарсмӕ ахызтысты. Ахызти паддзах дӕр

⁴⁰ ӕмӕ араст ис Гилгалмӕ, Кимхам дӕр йемӕ, афтӕмӕй. Ӕппӕт иудейаг адӕм ӕмӕ израилаг адӕмы ӕмбис цыдысты паддзахы фӕдыл.

Савей сыстади Давиды ныхмӕ

⁴¹ Израилӕгтӕ паддзахмӕ бацыдысты ӕмӕ йӕ бафарстой: «Сӕхи дӕ цӕмӕн бакодтой не ’фсымӕртӕ, иудейӕгтӕ? Паддзахы дӕр, йӕ хӕдзаронты дӕр ӕмӕ йе ’ппӕт адӕмы дӕр уыдон цӕмӕн ӕрбахизын кодтой Иорданы ацы фарсмӕ?»

⁴² Иудейӕгтӕ сын дзуапп радтой: «Уымӕн ӕмӕ паддзах махӕн хиондӕр у. Уӕвгӕ ууыл та цы маст кӕнут? Паддзахы хардзӕй минас, мыййаг, фӕкодтам, ӕви нын паддзах исты лӕвӕрттӕ ракодта?»

⁴³ Израилӕгтӕ дӕр загътой иудейӕгтӕн: «Махмӕ сымахӕй дӕс хатты фылдӕр бартӕ куы ис, цӕмӕй Давид мах паддзах уа; ноджы ма уӕ хистӕр ӕфсымӕртӕ дӕр куы стӕм, уӕд нӕ цӕмӕн бафхӕрдтат? Нӕ паддзахы фӕстӕмӕ раздахыны охыл дӕр фыццаг ныхас махӕй нӕ рацыди, ӕви?» Фӕлӕ дзыхӕй уӕддӕр иудейӕгтыл нӕ тых кодтой израилӕгтӕ.