2 Паддзахӕдтӕ 14 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Йоавы курдиат Авессаломы тыххӕй

¹ Церуайы фырт Йоав бафиппайдта, паддзахы зӕрдӕ Авессаломмӕ кӕй фӕфӕлмӕн ис, уый.

² Текоамӕ арвыста ӕмӕ уырдыгӕй иу зонынджын сылгоймаджы ӕрбахуыдта. Загъта йын: «Дӕхи скӕуӕг кӕн. Дӕ уӕлӕ саутӕ скӕн, дӕхимӕ ма базил, раст цыма, йӕ мардыл рагӕй чи хъыг кӕны, ахӕм сылгоймаг дӕ, уый хуызӕн.

³ Бацу паддзахмӕ ӕмӕ йын афтӕ ӕмӕ афтӕ зӕгъ». Йоав ын бацамыдта, цы йын зӕгъгӕ у, уый.

⁴ Текоайаг сылгоймаг паддзахмӕ бацыди ӕмӕ йӕ разы зӕххыл ныддӕлгом ис. Загъта: «Паддзах, баххуыс кӕн!»

⁵ Паддзах ӕй фӕрсы: «Цы дӕ хъӕуы?» Уый йын дзуапп радта: «Идӕдз сылгоймаг дӕн, мӕ мой амарди.

⁶ Дӕ цагъарӕн ма дыууӕ фырты уыди; быдыры фӕхыл сты, ӕмӕ сӕ иргъӕвӕг нӕ фӕци, афтӕмӕй дзы иу иннӕйы ныццавта ӕмӕ йӕ амардта.

⁷ Ныр мӕ хионтӕ дӕр мӕ ныхмӕ рацыдысты ӕмӕ мын зӕгъынц: „Йе ’фсымӕры чи амардта, уый нын нӕ къухмӕ ратт, ӕмӕ дзы, кӕй бабын кодта, уый туг райсӕм; кӕд бындар у, уӕддӕр ӕй амарӕм“. Мӕ къонайы ма цы зынг баззади, уый бынтондӕр ахуыссын кӕндзысты, мӕ мойӕн йӕ ном куыд фесӕфа ӕмӕ йын зӕххы цъарыл куыд ничиуал баззайа, афтӕ».

⁸ Паддзах сылгоймагӕн загъта: «Цу дӕ хӕдзармӕ, ӕз бафӕдзӕхсдзынӕн дӕу тыххӕй».

⁹ Текоайаг сылгоймаг паддзахӕн загъта: «Мӕ хицау ӕмӕ мӕ паддзах, фӕстиуджыты тыххӕй дзуапдӕттӕг ӕз ӕмӕ мӕ бинонтӕ уыдзыстӕм, паддзах ӕмӕ йӕ бадӕн та ӕназым сты».

¹⁰ Паддзах загъта: «Дӕ ныхмӕ дзурӕджы-иу мӕнмӕ ӕрбакӕн, ӕмӕ дӕ нал бахъыгдардзӕн».

¹¹ Сылгоймаг загъта: «Паддзах ард бахӕрӕд Дунедарӕджы, йӕ Хуыцауы раз, тугисджытӕ ноджы стырдӕр бӕллӕх кӕй нӕ сараздзысты, мӕ фырты мын кӕй нӕ амардзысты, уый тыххӕй». Паддзах ын дзуапп радта: «Дунедарӕгӕй дын ард хӕрын, дӕ фырты сӕрӕй иу ӕрду дӕр не ’рхаудзӕн».

¹² Сылгоймаг загъта: «Дӕ хорзӕхӕй, мӕ бардарӕг, мӕ паддзах, дӕ цагъарӕн-ма иу ныхасы бар ратт». «Дзур», — загъта йын уый.

¹³ Сылгоймаг загъта: «Дӕхӕдӕг Хуыцауы адӕмы ныхмӕ цӕмӕн архайыс? Паддзах йӕ уынаффӕйӕ йӕхи азымджын кӕны, уымӕн ӕмӕ йӕхӕдӕг, кӕй атардта, уыцы фырты фӕстӕмӕ не ’рбаздӕхта.

¹⁴ Мӕлӕтӕй нын алидзӕн нӕй. Зӕхмӕ цы дон ӕркӕлы, уымӕн фӕстӕмӕ сисӕн нал ис. Хуыцауы искӕй уд фесафын нӕ фӕнды, хъодыгондыл дӕр Йӕхи куыннӕ атигъ кӕна, ууыл мӕт кӕны.

¹⁵ Ӕз та, адӕм мӕ кӕй стӕрсын кодтой, уымӕ гӕсгӕ ӕрбацыдтӕн, цӕмӕй мӕ бардарӕгӕн, мӕ паддзахӕн ацы ныхӕстӕ ракӕнон. Мӕхинымӕры дзырдтон: зӕгъон паддзахӕн, чи зоны, ӕмӕ сӕххӕст кӕна йӕ цагъары курдиат.

¹⁶ Паддзах ӕнӕмӕнг байхъусдзӕн, ӕмӕ йӕ цагъары фервӕзын кӕндзӕни, мӕн ӕмӕ мӕ лӕппуйы амарынмӕ ӕмӕ нӕ, Хуыцауӕй нын лӕвӕрд цы у, уымӕй ӕнӕхай фӕкӕнынмӕ чи хъавы, уыцы адӕмы къухӕй.

¹⁷ Дӕ цагъар йӕхицӕн хъуыдытӕ кодта: „Ныфсы хос мын фестӕд мӕ бардарӕджы, мӕ паддзахы ныхас, уымӕн ӕмӕ мӕ бардарӕг, паддзах, Хуыцауы зӕды хуызӕн у — равзардзӕни ӕвзӕр дӕр ӕмӕ хорз дӕр“. Демӕ уӕд кӕддӕриддӕр Дунедарӕг, дӕ Хуыцау».

¹⁸ Паддзах ын дзуапп радта: «Цӕмӕй дӕ бафӕрсон, уый мӕ ма басусӕг кӕн». Сылгоймаг загъта: «Дзур, мӕ бардарӕг, мӕ паддзах».

¹⁹ Паддзах ӕй бафарста: «Йоав ницы бар дары ӕппӕт адӕттӕм?» Сылгоймаг ын дзуапп радта: «Мӕ бардарӕг ӕмӕ мӕ паддзах цӕра, цыдӕриддӕр зӕгъай, уымӕй нӕдӕр рахизмӕ, нӕдӕр галиумӕ ис аздӕхӕн. Ӕцӕгдӕр мын дӕ дӕлдӕр Йоав бафӕдзӕхста афтӕ бакӕнын, ӕппӕт ацы ныхӕстӕ уый бацамыдта дӕ цагъарӕн,

²⁰ цӕмӕй Авессаломы хъуыддаг ахӕм ӕмбисонды хуызы ӕвдыст ӕрцӕуа. Фӕлӕ мӕ паддзах Хуыцауы зӕдау куырыхон у ӕмӕ зоны, зӕххыл цыдӕриддӕр цӕуы, уый».

²¹ Уӕд паддзах Йоавӕн загъта: «Дӕ фӕндон дын ӕххӕст кӕнын. Ацу ӕмӕ фӕстӕмӕ ӕрбакӕн уыцы лӕппуйы, Авессаломы».

²² Йоав ӕрхауди зӕххыл, ныддӕлгом ис ӕмӕ паддзахӕн раарфӕ кодта: «Ныр дӕ цагъар зоны, мӕ бардарӕг, мӕ паддзах, хорз цӕстӕй мӕм кӕй ракастӕ, уый, уымӕн ӕмӕ паддзах сӕххӕст кодта йӕ цагъары фӕндон».

²³ Йоав ацыд Гешурмӕ ӕмӕ Авессаломы Йерусалиммӕ ӕрбахуыдта.

²⁴ Фӕлӕ паддзах загъта: «Йӕ хӕдзармӕ цӕуӕд, йӕхи мын ма фенын кӕнӕд». Афтӕмӕй Авессалом йӕ хӕдзармӕ ӕрбаздӕхти, фӕлӕ йын паддзахы размӕ фӕндаг нӕ уыд.

Давид ӕмӕ Авессалом бафидыдтой

²⁵ Авессаломы хуызӕн рӕсугъд нӕлгоймаг, сӕрӕй къӕхтӕм — ӕнаипп, ӕгас Израилы дӕр нӕ уыд.

²⁶ Йӕ сӕры хил-иу куы адаста — дасгӕ та йӕ кодта алы аз дӕр, уымӕн ӕмӕ йыл уӕз кодта, — уӕд-иу паддзахы шекелтӕй дыууӕсӕдӕйы уӕз ӕрласта.

²⁷ Авессаломӕн рантысти ӕртӕ фырты ӕмӕ иунӕг чызг, бакастӕй тынг рӕсугъд, йӕ ном — Тамар.

²⁸ Авессалом Йерусалимы фӕци дыууӕ азы, фӕлӕ нырма паддзахы нӕ федта.

²⁹ Иуахӕмы Йоавмӕ арвыста, паддзахмӕ йӕ баминӕвар кӕнон, зӕгъгӕ, фӕлӕ йӕм Йоав не ’рбацыд. Арвыста йӕм дыккаг хатт, фӕлӕ та йӕм уӕд дӕр нӕ фӕзынд.

³⁰ Уӕд Авессалом йӕ дӕлдӕртӕн загъта: «Уартӕ мӕ хуымы фарсмӕ — Йоавы хъӕбӕрхоры хуым. Цӕугӕут ӕмӕ йыл зынг бафтаут». Авессаломы дӕлдӕртӕ уыцы хуымыл зынг бафтыдтой.

³¹ Йоав Авессаломы хӕдзармӕ бацыди ӕмӕ йӕ фӕрсы: «Дӕ дӕлдӕртӕ мын мӕ хуым цӕмӕн басыгътой?»

³² Авессалом ын загъта: «Ӕз дӕм ӕрвыстон, цӕмӕй мӕм ӕрбацӕуай ӕмӕ дӕ паддзахмӕ барвитон ӕмӕ йын мӕ номӕй зӕгъай: „Цӕмӕн, зӕгъ, ӕрбаздӕхтӕн ӕз Гешурӕй? Фӕлтау уым куы баззадаин! Паддзахы куы фенин, уый мӕ фӕнды. Кӕд мӕм исты азым ис, уӕд мӕ амарӕд“».

³³ Йоав паддзахмӕ бацыд ӕмӕ йын йӕ ныхӕстӕ куы рафӕзмыдта, уӕд паддзах Авессаломмӕ фӕсидти. Уый ӕрбацыд ӕмӕ паддзахы раз зӕххыл ныддӕлгом ис. Паддзах Авессаломӕн аба кодта.