1 Паддзахӕдтӕ 4 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Фидыды Чырыны байст

¹ Самуелы дзырд ахадыдта ӕппӕт Израилы дӕр. Уыцы рӕстӕг филистимӕгтӕ ӕрӕмбырд сты Израилимӕ схӕцынмӕ. Израилӕгтӕ дӕр рацыдысты сӕ ныхмӕ ӕмӕ рӕсӕнуат ӕркодтой Евен-Езеры рӕбын. Ныр филистимӕгты рӕсӕнуат та Афекы цур уыди.

² Филистимӕгтӕ ӕрлӕууыдысты израилӕгты ныхмӕ, ӕмӕ сын тох бацайдагъ. Израилӕгтӕ дӕрӕнгонд ӕрцыдысты, тохы быдыры сӕ фӕмард цыппар мин лӕджы.

³ Адӕм сӕ рӕсӕнуатмӕ куы ӕрбаздӕхтысты, уӕд Израилы хистӕртӕ загътой: «Дунедарӕг нӕ абон филистимӕгты къухӕй цӕмӕн ныддӕрӕн кодта? Цӕй ӕмӕ Дунедарӕджы Фидыды Чырын рахӕссӕм Силомӕй, цӕмӕй Уый немӕ уа ӕмӕ нӕ ирвӕзын кӕна не знӕгтӕй».

⁴ Адӕм арвыстой Силоммӕ ӕмӕ Фидыды Чырын, йӕ сӕрмӕ херувимтыл — Уӕларвӕфсады Бардарӕг, уырдыгӕй ӕрбахастой. Хуыцауы Фидыды Чырынимӕ ӕрбацыдысты Елиайы дыууӕ фырты дӕр, Хофни ӕмӕ Пинхас.

⁵ Дунедарӕджы Фидыды Чырын Израилы рӕсӕнуатмӕ куы ’рбахӕццӕ ис, уӕд адӕмӕн сӕ цины хъӕр афтӕ тынг ныййазӕлыд, ӕмӕ зӕхх ныррызти.

⁶ Уый фехъусгӕйӕ, филистимӕгтӕ скатай сты: «Цӕй цины хъӕр хъуысы уый дзуттӕгты рӕсӕнуаты ’рдыгӕй?» Дунедарӕджы Фидыды Чырын Израилы рӕсӕнуаты ис, уый куы базыдтой,

⁷ уӕд филистимӕгтӕ старстысты ӕмӕ загътой: «Сӕ Хуыцау сӕм сӕ рӕсӕнуатмӕ ӕрцыди! Додойаг нӕ сӕртӕ! Ныронг ахӕм хабар никуыма ӕрцыд.

⁸ Додойаг нӕ сӕртӕ! Уыцы хъомысджын Хуыцауы къухӕй нӕ чи аирвӕзын кӕндзӕн? Уый, мысырӕгтыл ӕдзӕрӕг быдыры Йӕ бӕллӕх Чи сӕвӕрдта, уыцы Хуыцау у.

⁹ Фидар лӕуут ӕмӕ уе ’хсар равдисут, филистимӕгтӕ, ӕмӕ дзуттӕгтӕн сӕ цагъартӕ ма суат, уыдон сымахӕн цагъар куыд сты, афтӕ. Семӕ тохы бацӕут — уӕ лӕджыхъӕд ӕмӕ уӕхӕдӕг!»

¹⁰ Филистимӕгтӕ схӕцыдысты, ӕмӕ израилӕгтӕ дӕрӕнгонд ӕрцыдысты. Бирӕ дзы фӕцагъды: сӕ фистӕг ӕфсадӕй бабын ис дӕс ӕмӕ ссӕдз мины, удӕгасӕй ма чи аирвӕзт, уыдон та сӕ хӕдзӕрттӕм фӕлыгъдысты.

¹¹ Хуыцауы Фидыды Чырын знаджы къухмӕ бахауд, Елиайы дыууӕ фырты та — Хофни ӕмӕ Пинхас — мард фесты.

Елиайы мӕлӕт

¹² Уыцы бон Бениамины хӕдзарвӕндагӕй иу лӕг тохы быдырӕй фӕцагайдта ӕмӕ тӕккӕ уыцы бон Силомы балӕууыд, йӕ дарӕс — скъуыдтӕ, йӕ сӕр рыгӕй нал зынди, афтӕмӕй.

¹³ Елиа фӕндаггӕрон бадти йӕ бандоныл. Йӕ цӕстытӕ фӕндагӕй нӕ иста, уымӕн ӕмӕ Хуыцауы Фидыды Чырынмӕ йӕ зӕрдӕ тынг ӕхсайдта. Уыцы лӕг сахары адӕмӕн хабар фехъусын кодта, ӕмӕ адӕм нырдиаг кодтой.

¹⁴ Елиа кӕуын куы фехъуыста, уӕд скатай ис: «Цӕй хъӕр-хъӕлӕба у уый?» Уалынджы уыцы лӕг йӕ уӕлхъус ӕрлӕууыди, цӕмӕй йын хабӕрттӕ радзура.

¹⁵ Елиайыл ӕстдӕс ӕмӕ цыппарыссӕдз азы цыди, йӕ цӕсты рухс бамынӕг ӕмӕ ницыуал уыдта.

¹⁶ Хабархӕссӕг Елиайӕн загъта: «Тохы быдырӕй ӕрбахӕццӕ дӕн, тӕккӕ абон ралыгътӕн уырдыгӕй». Елиа бафарста: «Цы ’рцыди, мӕ хъӕбул?»

¹⁷ Хабархӕссӕг дзуапп радта: «Израилы ӕфсад лидзӕг фесты филистимӕгтӕй, фӕцагъды сты нӕ адӕм, дӕ дыууӕ фырты — Хофни ӕмӕ Пинхас — фӕмард сты, Хуыцауы Фидыды Чырын та знаджы къухмӕ бахауд».

¹⁸ Фидыды Чырыны коймӕ Елиа йӕ бандонӕй кулдуары цур уӕлгоммӕ ахауди. Уыйадыл уӕззау зӕронд лӕгӕн йӕ бӕрзӕй асаст ӕмӕ амарди. Израилӕн дыууиссӕдз азы дӕргъы сӕ фӕтӕг уыд.

Ихаводы райгуырд

¹⁹ Йӕ чындз, Пинхасы бинойнаг, ӕнхъӕлцау уыди ӕмӕ абон-райсом кодта. Хуыцауы Фидыды Чырын знаджы къухмӕ кӕй бахауд, стӕй йӕ хицау ӕмӕ йӕ лӕг кӕй амардысты, уый куы фехъуыста, уӕд ӕвиппайды батыхсти, зӕххыл афӕлдӕхт ӕмӕ ныййардта,

²⁰ уый фӕстӕ мӕлӕты къахыл ныллӕууыд. Йӕ уӕлхъус цы сылгоймӕгтӕ лӕууыди, уыдон ын ныфсытӕ ӕвӕрдтой: «Ма тӕрс, лӕппу ныййардтай». Фӕлӕ сӕ уый хъуыды дӕр нӕ кодта, ницы дзуапп сын лӕвӕрдта.

²¹ Йӕ сабийы схуыдта Ихавод, Израил йӕ кадӕй фӕцух ис, зӕгъгӕ, Хуыцауы Фидыды Чырын знаджы къухмӕ кӕй бахауд ӕмӕ йӕ хицау ӕмӕ йӕ лӕг кӕй амардысты, уымӕ гӕсгӕ.

²² Уый загъта: «Израил ӕнӕхай фӕци йӕ кадӕй, уымӕн ӕмӕ Хуыцауы Фидыды Чырын знаджы къухмӕ бахауд».