1 Паддзахӕдтӕ 3 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Дунедарӕг раргом ис Самуелмӕ

¹ Ӕвзонг Самуел Елиайӕн ӕххуыс кодта ӕмӕ афтӕмӕй лӕггад кодта Дунедарӕгӕн. Уыцы заман арӕх нӕ хъуысти Дунедарӕджы ныхас, Йӕхи ӕргом кодта стӕм хатт.

² Иу хатт Елиа хуыссыди йӕ уаты. Йӕ цӕстырухс мынӕг кӕнын райдыдта, гӕзӕмӕ ма уыдта.

³ Самуел дӕр хуыссыди Дунедарӕджы кувӕндоны, Хуыцауы Фидыды Чырын кӕм уыди, уым. Кувӕндоны цырагъ ма судзгӕ кодта.

⁴ Дунедарӕг фӕсидти Самуелмӕ, ӕмӕ уый дзуапп радта: «Мӕнӕ дӕн!»

⁵ Елиамӕ бауад ӕмӕ йын загъта: «Дзырдтай мӕм, ӕмӕ мӕнӕ дӕн!» Фӕлӕ йын уый дзуапп радта: «Ӕз дӕм нӕ дзырдтон. Цу фӕстӕмӕ ӕмӕ схуысс». Самуел ацыд ӕмӕ схуыссыд.

⁶ Дунедарӕг та йӕм ногӕй фӕсидти. Самуел сыстад, Елиамӕ бацыд ӕмӕ та йын загъта: «Дзырдтай мӕм, ӕмӕ мӕнӕ дӕн!» Уый йын дзуапп радта: «Ӕз дӕм нӕ дзырдтон, мӕ хъӕбул. Цу фӕстӕмӕ ӕмӕ схуысс».

⁷ Уӕд Самуел Дунедарӕджы нӕма зыдта, Дунедарӕджы дзырд ын нӕма раргом.

⁸ Дунедарӕг та йӕм ӕртыккаг хатт дӕр фӕсидти. Самуел сыстад, Елиамӕ бацыд ӕмӕ та загъта: «Дзырдтай мӕм, ӕмӕ мӕнӕ дӕн!» Уӕд Елиа бамбӕрста, лӕппумӕ Дунедарӕг кӕй дзырдта, уый,

⁹ ӕмӕ загъта Самуелӕн: «Ацу фӕстӕмӕ ӕмӕ схуысс. Куы ма дӕм дзырдӕуа, уӕд-иу зӕгъ: „Дзур, Дунедарӕг, хъусы Дӕм Дӕ цагъар“». Самуел ацыд ӕмӕ йӕ бынаты схуыссыд.

¹⁰ Дунедарӕг ӕрбацыди, ӕрлӕууыд ӕмӕ та ногӕй фӕсидти: «Самуел! Самуел!» Самуел дзуапп радта: «Дзур, хъусы Дӕм Дӕ цагъар».

¹¹ Дунедарӕг загъта Самуелӕн: «Израилы Ӕз ахӕм хъуыддаг саразынмӕ хъавын, ӕмӕ йӕ чи фехъуса, уымӕн йӕ дыууӕ хъусы дӕр ныззардзысты.

¹² Уыцы бон Ӕз сӕххӕст кӕндзынӕн, Елиайӕн йӕ хӕдзарвӕндаджы тыххӕй цыдӕриддӕр загътон, уыдон кӕрӕй-кӕронмӕ.

¹³ Ӕз ын загътон, Мӕ азарӕй йӕ хӕдзар мыггагмӕ кӕй бабын уыдзӕн, уый, уымӕн ӕмӕ Елиа азымджын у: уый зыдта, йӕ фырттӕ се ’нӕгъдау митӕй Хуыцауы кӕй ӕгад кӕнынц, уый ӕмӕ сӕ нӕ урӕдта.

¹⁴ Уымӕ гӕсгӕ Ӕз ард бахордтон, Елиайы хӕдзарвӕндаджы тӕригъӕдтӕ барст кӕй никуы ӕрцӕудзысты — нӕдӕр нывӕндтӕ, нӕдӕр хуынты фӕрцы».

¹⁵ Самуел та схуыссыд. Райсомӕй байгом кодта Дунедарӕджы хӕдзары дуӕрттӕ. Дунедарӕгӕй цы фехъуыста, уый нӕ уӕндыд Елиайӕн схъӕр кӕнын,

¹⁶ фӕлӕ Елиа Самуелмӕ фӕдзырдта: «Самуел, мӕ хъӕбул!» Уый дзуапп радта: «Мӕнӕ дӕн!»

¹⁷ Елиа загъта: «Цы дын загъта? Ма йӕ басусӕг кӕн, зӕгъ мын ӕй. Афтӕтӕ ӕмӕ уфтӕтӕ, стӕй ма дын ноджы фыддӕртӕ фӕуыдзӕни Хуыцау, цы дын загъта, уыдонӕй мӕ исты куы бамбӕхсай, уӕд».

¹⁸ Самуел ын ӕппӕт дӕр радзырдта, ницы дзы бамбӕхста. Уӕд Елиа загъта: «Уый Дунедарӕг у, ӕмӕ Йӕ зӕрды цы ис, уый ӕххӕст кӕны».

Самуел сси Дунедарӕджы пехуымпар

¹⁹ Самуел ралӕг ис, ӕмӕ Дунедарӕг уыд йемӕ: Самуел цыдӕриддӕр загътаид — ӕрцыди-иу.

²⁰ Ӕмӕ Данӕй суанг Беер-Шевӕйы онг ӕппӕт Израил дӕр базыдта, Дунедарӕг Самуелы Йӕхицӕн пехуымпарӕй кӕй равзӕрста, уый.

²¹ Уӕдӕй фӕстӕмӕ йӕм Дунедарӕг Йӕхи дарддӕр дӕр ӕргом кодта Силомы.