1 Паддзахӕдтӕ 28 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Уыцы рӕстӕг филистимӕгтӕ ӕрӕмбырд кодтой се ’фсад Израилимӕ схӕцынмӕ. Ахиш загъта Давидӕн: «Кӕй зӕгъын ӕй хъӕуы, зондзынӕ, дӕхицӕн дӕр ӕмӕ дӕ адӕмӕн дӕр мемӕ хӕстмӕ цӕугӕ кӕй у, уый».

² Давид ын дзуапп радта: «Гъеныр дӕхи цӕстӕй фендзынӕ, дӕ цагъар цы бакӕндзӕн, уый». Ахиш загъта Давидӕн: «Гъемӕ дӕ нырӕй фӕстӕмӕ мӕхицӕн хъахъхъӕнӕгӕй исын».

³ Уӕдмӕ Самуел амарди. Фӕхъыг ыл кодтой Израилы адӕм, ӕмӕ йӕ баныгӕдтой Рамайы, йӕ сахары. Ныр Саул та бӕстӕйӕ фӕсырдта мӕрдтӕмсидджытӕ ӕмӕ дӕсныты.

⁴ Филистимӕгтӕ ӕмбырдӕй ӕрцыдысты Шунеммӕ ӕмӕ уым рӕсӕнуаты ӕрлӕууыдысты. Саул дӕр фӕсидти ӕппӕт израилӕгтӕм, ӕмӕ ӕрбынат кодтой Гилбоайы хохыл.

⁵ Саул филистимӕгты ӕфсад куы федта, уӕд фыр тӕссӕй йӕ зӕрдӕ ныссӕххӕтт кодта.

⁶ Дунедарӕджы фарста, фӕлӕ йын Уый нӕдӕр фыны, нӕдӕр уримы руаджы, нӕдӕр пехуымпарты дзыхӕй лӕвӕрдта дзуапп.

⁷ Уӕд йӕ дӕлдӕртӕн бафӕдзӕхста: «Ссарут мын мӕрдтӕмсидӕг сылгоймаг. Фӕцӕуон ӕм ӕмӕ йӕ бафӕрсон». Дзуапп ын радтой: «Мӕнӕ Ен-Доры ис мӕрдтӕмсидӕг сылгоймаг».

⁸ Саул, мачи мӕ базона, зӕгъгӕ, йӕ хуыз аивта, йӕ уӕлӕ скодта ӕндӕр дарӕс. Дыууӕ лӕджы йемӕ ракодта ӕмӕ уыцы сылгоймагмӕ ӕхсӕвы бацыдысты. Саул ын загъта: «Кӕмӕй дын зӕгъон, уый мын мӕрдтӕй ракӕн ӕмӕ мын ӕй бафӕрс».

⁹ Сылгоймаг ын дзуапп радта: «Ды бӕгуыдӕр зоныс, Саул цы бакодта, уый. Бӕстыл мӕрдтӕмсидӕг ӕмӕ дӕсны куынӕуал ныууагъта, сӕ мыггаг сын куы сыскъуыдта, уӕд мӕ цӕмӕн сафыс, мӕ уд мын къӕппӕджы цӕмӕн ӕппарыс?»

¹⁰ Саул ын Дунедарӕгӕй расомы кодта: «Сомы кӕнын Дунедарӕгӕй, ацы хъуыддаджы тыххӕй дыл ницы бӕллӕх ӕрцӕудзӕн».

¹¹ Уӕд ӕй сылгоймаг бафарста: «Кӕй дын ракӕнон мӕрдтӕй?» Саул ын дзуапп радта: «Самуелы мын ракӕн».

¹² Сылгоймаг куы ауыдта Самуелы, уӕд ныцъцъӕхахст кодта, стӕй Саулӕн загъта: «Цӕмӕн мӕ асайдтай? Ды Саул дӕ!»

¹³ Паддзах ын загъта: «Ма тӕрс. Цы уыныс?» Сылгоймаг ын дзуапп радта: «Уынын, дӕлдзӕхӕй ссӕуы ӕндӕрг».

¹⁴ «Уындӕй цавӕр у?» — бафарста йӕ Саул. Уый загъта: «Ссӕуы зӕронд лӕг, йӕ уӕлӕ пӕлӕз, афтӕмӕй». Саул базыдта, Самуел кӕй у, уый ӕмӕ зӕххыл ныддӕлгом йӕ разы.

¹⁵ Самуел ӕй бафарста: «Цӕмӕн мӕ бахъыгдӕрдтай ӕмӕ мӕ цӕмӕн ӕрбацӕуын кодтай?» Саул ын загъта: «Уынгӕджы фӕдӕн филистимӕгтӕй: мӕ ныхмӕ хӕцынц, ӕмӕ мӕ Хуыцау дӕр Йе ’ргом аздӕхта. Нал мын дӕтты дзуапп нӕдӕр пехуымпарты дзыхӕй, нӕдӕр мӕ фыны. Уый тыххӕй дӕм фӕдзырдтон, цӕмӕй мын бацамонай, цы кӕнгӕ у, уый».

¹⁶ Самуел ын афтӕ: «Мӕн ма цы фӕрсыс, кӕд дӕ Дунедарӕг Йе ’ргом аздӕхта ӕмӕ де знаг сси, уӕд?

¹⁷ Дунедарӕг бакодта, зӕрдӕ цӕмӕй ӕвӕрдта, уый: паддзахад дын дӕ къухӕй стыдта ӕмӕ йӕ ӕндӕрӕн, Давидӕн, радта,

¹⁸ уымӕн ӕмӕ ды Дунедарӕгмӕ нӕ байхъуыстай ӕмӕ Йын амалекӕгты Йӕ азарӕй бахызтай. Уый тыххӕй дын афтӕ бакодта Дунедарӕг абон.

¹⁹ Канд дӕу нӕ, фӕлӕ ӕгас Израилы дӕр Уый филистимӕгты къухмӕ ратдзӕн. Райсом ды дӕр ӕмӕ дӕ фырттӕ дӕр февзӕрдзыстут, ӕз кӕм дӕн, уым. Израилы ӕфсад та филистимӕгты къухмӕ ратдзӕни Дунедарӕг».

²⁰ Саул ӕваст ӕрхауд ӕмӕ зӕххыл адӕргъ ис. Тынг фӕтарсти Самуелы ныхӕстӕй. Стӕй йӕм хъару дӕр нал уыди, уымӕн ӕмӕ уыцы бон ӕмӕ уыцы ӕхсӕв йӕ дзыхмӕ къӕбӕр не схаста.

²¹ Сылгоймаг бацыди Саулмӕ ӕмӕ йӕ тынг тарстхуызӕй куы федта, уӕд ын загъта: «Кӕсыс, дӕ цагъар дӕм байхъуыста. Мӕ удӕн тас у, уый зонгӕйӕ, уӕддӕр сӕххӕст кодтон, цы мын загътай, уый.

²² Ныр дӕ курын, байхъус ды дӕр дӕ цагъармӕ: цӕй, ӕмӕ дын иу къӕбӕр рахӕссон ӕмӕ саход, цӕмӕй фӕндаджы размӕ фӕхъуыртхъом уай».

²³ Уый фыццаг нӕ разы кодта, нӕ бахӕрдзынӕн, зӕгъгӕ, фӕлӕ йӕм йӕ дӕлдӕртӕ дӕр ӕмӕ сылгоймаг дӕр ӕрхатыдысты, ӕмӕ сӕм байхъуыста. Сыстади зӕххӕй ӕмӕ сынтӕгыл ӕрбадти.

²⁴ Сылгоймаг, йӕ хӕдзары цы хӕрзхаст уӕныг уыди, уый аргӕвдын кодта. Стӕй райста ссад, хыссӕ ракодта, донгонд дзултӕ афыхта

²⁵ ӕмӕ Саул ӕмӕ йӕ дӕлдӕртӕн фынг ацарӕзта. Уыдон бахордтой ӕмӕ тӕккӕ уыцы ’хсӕв сӕ фӕндагыл араст сты.