1 Паддзахӕдтӕ 18 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Давид Саулимӕ куы ныхас кодта, уӕд Ионатаны зӕрдӕмӕ фӕцыди, йӕхи удау ӕй бауарзта.

² Уыцы бон Саул Давиды йӕхимӕ баурӕдта, йӕ фыдмӕ йӕ сӕ хӕдзармӕ нал ауагъта.

³ Ионатан Давидӕй загъта ӕрдхорд, уымӕн ӕмӕ йӕ бауарзта йӕхи удау.

⁴ Раласта йӕ пӕлӕз ӕмӕ йӕ ӕрдхорды лӕварӕн радта Давидӕн. Радта йын йӕ хотыхтӕ дӕр, уыимӕ йӕ кард, йе ’рдын ӕмӕ йӕ рон.

Саул Давидӕй тӕрсын райдыдта

⁵ Саул-иу Давиды кӕдӕм арвыста, уым-иу уый алкӕддӕр разынд ӕнтыстджын, ӕмӕ йӕ Саул сӕвӕрдта ӕфсады хицауӕй. Давиды бауарзтой ӕппӕт адӕм дӕр ӕмӕ Саулы дӕлдӕртӕ дӕр.

⁶ Давид филистимаг богалы куы амардта ӕмӕ ӕфсӕдтимӕ куы раздӕхти, уӕд-иу Израилы алы сахарӕй дӕр паддзах Саулы размӕ, далатӕ ӕмӕ дзӕгъдзӕгъӕгтӕ сӕ къухы, афтӕмӕй цины хъӕртимӕ сылгоймӕгтӕ ракалдысты. Кафыдысты ӕмӕ фыр цинӕй зарыдысты:

⁷ «Саул ныццагъта минтӕ, Давид та — дӕсгай минтӕ!»

⁸ Саулӕн йӕ маст фыхти, хъыг ын уыдысты уыцы ныхӕстӕ. Йӕхинымӕр загъта: «Давидӕн радтой дӕсгай минтӕ, мӕнӕн та — минтӕ. Паддзахы бынат хъуаг ма у ӕрмӕстдӕр».

⁹ Ӕмӕ зулмӕ кӕсын райдыдта уӕдӕй фӕстӕмӕ Давидмӕ.

¹⁰ Дыккаг бон та Саулыл, йӕхи хӕдзары уыди, афтӕмӕй Хуыцауы ӕрвыст фыдмон тых кӕнын байдыдта, ӕмӕ Саул феррайау ис. Давид ӕй раздӕрау сабыр кодта йӕ цагъдӕй. Саулы къухы уыди арц,

¹¹ ӕмӕ йыл ӕй фехста, къулмӕ йӕ ныххуыйон, зӕгъгӕ. Фӕлӕ Давидӕн дыууӕ хатты йӕхи фӕсайын бантыст.

¹² Саул тарсти Давидӕй, уымӕн ӕмӕ йыл Дунедарӕг аудыдта, Саулы та ныууагъта.

¹³ Ӕмӕ Саул йӕхицӕй адард кодта Давиды. Йе ’фсады йӕ миныхицауӕй сӕвӕрдта, ӕмӕ Давид ӕфсады сӕргъы цыди хӕстон балцыты.

¹⁴ Йе ’ппӕт хъуыддӕгты дӕр-иу разынд ӕнтыстджын, уымӕн ӕмӕ йыл Дунедарӕг аудыдта.

¹⁵ Саул уыдта Давиды стыр ӕнтыстытӕ ӕмӕ дзы тарсти.

¹⁶ Израилӕгтӕ ӕмӕ иудейӕгтӕ та йӕ се ’ппӕт дӕр уарзтой, уымӕн ӕмӕ хӕстон балцыты лӕууыди сӕ сӕргъы.

Давид ракуырдта Саулы чызг Мелхолӕйы

¹⁷ Саул Давидӕн загъта: «Мӕ хистӕр чызг Меравы дын ратдзынӕн. Ӕрмӕст мын ӕхсарджын у ӕмӕ Дунедарӕджы хӕстыты архай». Йӕхинымӕр та дзырдта: «Мӕхи къухӕй нӕ, фӕлӕ филистимӕгты къухӕй амӕлӕд».

¹⁸ Давид Саулӕн загъта: «Чи дӕн ӕз, ӕмӕ чи у мӕ хъӕстӕ ӕмӕ мӕ фыды мыггаг Израилы? Куыд хъуамӕ суон паддзахы сиахс?»

¹⁹ Фӕлӕ Саулы чызг Меравы Давидӕн раттыны афон куы ӕрцыд, уӕд ӕй мехолайаг Адриелӕн радтой.

²⁰ Ныр Давиды та бауарзта Саулы иннӕ чызг, Мелхолӕ. Саул уый куы фехъуыста, уӕд ын ӕхсызгон уыди.

²¹ Саул ахъуыды кодта: «Цӕй ӕмӕ йын раттон мӕ чызджы. Уый йын уыдзӕни къӕппӕг, ӕмӕ филистимӕгты къухӕй амӕлдзӕн». Саул загъта Давидӕн: «Ныр мӕ сиахс бауыдзынӕ».

²² Ӕмӕ йӕ дӕлдӕртӕн бафӕдзӕхста: «Давидӕн хибарӕй зӕгъут: „Ды зоныс, паддзах дыл куыд ауды ӕмӕ дӕ йе ’ппӕт дӕлдӕртӕ дӕр куыд уарзынц, уый. Паддзахы сиахс дын ӕнӕ суӕвгӕ нӕй“».

²³ Саулы дӕлдӕртӕ уыцы ныхӕстӕ Давидмӕ фӕхӕццӕ кодтой. Уый сын дзуапп радта: «Сымахмӕ гӕсгӕ, паддзахы сиахс суӕвын ӕнцон у? Ӕз мӕгуыр дӕн, адӕмы ’хсӕн — ӕнӕрӕгъыдзыд».

²⁴ Саулмӕ йӕ дӕлдӕртӕ фӕхабар кодтой, афтӕ ӕмӕ афтӕ загъта Давид, зӕгъгӕ.

²⁵ Саул сын бафӕдзӕхста: «Зӕгъут Давидӕн: паддзахы ирӕд нӕ хъӕуы, ӕрмӕст ын йе знӕгтӕй йӕ маст райс — амар сӕдӕ филистимаджы, сунӕт сын скӕн ӕмӕ сын сӕ лыггӕгтӕ паддзахмӕ ӕрбахӕсс». Саул йӕ зӕрдӕ дардта, ныр Давид филистимӕгты къухӕй амӕлдзӕн, зӕгъгӕ.

²⁶ Саулы дӕлдӕртӕ Давидӕн йӕ ныхӕстӕ куы рафӕзмыдтой, уӕд йӕ зӕрдӕмӕ фӕцыд паддзахы сиахс суӕвыны хъуыды. Ӕмгъуыды бонмӕ ма рӕстӕг уыди,

²⁷ афтӕ Давид йӕ адӕмимӕ фӕраст ӕмӕ дыууӕсӕдӕ филистимаджы амардта. Сӕ сунӕты лыггӕгтӕ сын ӕрбахаста ӕмӕ сӕ паддзахы раз ӕрӕвӕрдта, цӕмӕй йӕ уый йӕ сиахс бакӕна. Ӕмӕ йын Саул радта йӕ чызг Мелхолӕйы.

²⁸ Саул федта, Дунедарӕг Давидыл кӕй ауды, йӕ чызг Мелхолӕ дӕр ӕй кӕй уарзы, уый

²⁹ ӕмӕ дзы ноджы тынгдӕр старсти. Цӕрӕнбонтӕм ын знаг сси.

³⁰ Филистимаг ӕлдӕрттӕ-иу рацыдысты хӕцынмӕ, ӕмӕ-иу Давид алы хатт дӕр Саулы иннӕ дӕлдӕртӕй ӕнтыстджындӕр разынд, ӕмӕ йӕ ном тынг скадджын ис.