1 Паддзахӕдтӕ 16 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Хуыцау Давиды равзӕрста паддзахӕй

¹ Дунедарӕг загъта Самуелӕн: «Кӕдмӕ хъынцъым кӕндзынӕ Саулыл? Ӕз ыл атигъ кодтон Мӕхи — уый нал уыдзӕн Израилы паддзах. Сыкъа сойӕ байдзаг кӕн ӕмӕ цу, ӕрвитын дӕ вифлеемаг Йессеймӕ. Уымӕн йӕ фырттӕй Ӕз равзӕрстон иуы, цӕмӕй йӕ паддзахӕй сӕвӕрон».

² Уӕд Самуел афтӕ зӕгъы: «Куыд ацӕуон? Саул хабар фехъусдзӕн ӕмӕ мӕ амардзӕн». Дунедарӕг загъта: «Иу дыгӕрдыг демӕ акӕн, ӕмӕ-иу зӕгъ: „Дунедарӕгӕн нывонд хӕссынмӕ ӕрбацыдтӕн“.

³ Нывонд ӕрхӕссынмӕ-иу ӕрбахон Йессейы, ӕмӕ дын Ӕз бацамондзынӕн, цы гӕнгӕ у, уый: кӕмӕй дын зӕгъон, уый Мын-иу байсӕрд».

⁴ Самуел бакодта, Дунедарӕг ын куыд загъта, афтӕ. Вифлееммӕ куы бахӕццӕ, уӕд тарстхуызӕй йӕ размӕ рацыдысты сахары хистӕртӕ ӕмӕ йӕ бафарстой: «Хорз хабаримӕ сӕмбӕлдтӕ?»

⁵ Дзуапп сын радта: «Хорз хабаримӕ. Дунедарӕгӕн нывонд ӕрхӕссынмӕ ӕрбацыдтӕн. Уӕхи ссыгъдӕг кӕнут ӕмӕ мемӕ нывонд ӕрхӕссынмӕ рацӕут». Йессейы йӕ фырттимӕ ссыгъдӕг кодта Самуел ӕмӕ сӕм нывонд ӕрхӕссынмӕ фӕсидти.

⁶ Куы ’рбацыдысты, уӕд федта Йессейы фырт Елиавы ӕмӕ йӕхинымӕр загъта: «Бӕгуыдӕр, Дунедарӕджы раз лӕууы Йӕ байсӕрст!»

⁷ Фӕлӕ Дунедарӕг Самуелӕн загъта: «Йӕ уынд ӕмӕ йын йӕ асмӕ ма кӕс, ауыл атигъ кодтон Мӕхи. Уымӕн ӕмӕ Хуыцау адӕймаджы цӕстӕй нӕ кӕсы. Адӕймаг йӕ цӕстӕй цы уыны, уымӕ кӕсы, Дунедарӕг та — зӕрдӕмӕ».

⁸ Уӕд Йессей фӕдзырдта Авинадавмӕ ӕмӕ йӕ Самуелы рӕзты рацӕуын кодта. Самуел загъта: «Дунедарӕг уый дӕр нӕ равзӕрста».

⁹ Уӕд ын Йессей йӕ рӕзты рацӕуын кодта Шаммайы, фӕлӕ та Самуел загъта: «Дунедарӕг уый дӕр нӕ равзӕрста».

¹⁰ Афтӕ Йессей Самуелы рӕзты рацӕуын кодта йӕ авд фырты, фӕлӕ Самуел загъта Йессейӕн: «Дунедарӕг адонӕй никӕй равзӕрста».

¹¹ Самуел Йессейы бафарста: «Адон де ’ппӕт цот сты?» Йессей дзуапп радта: «Баззад ма кӕстӕр. Ныртӕккӕ фыстӕ хизы». Самуел ын бафӕдзӕхста: «Арвит ӕм. Цалынмӕ уый ӕрбацӕуа, уӕдмӕ фынгыл не ’рбаддзыстӕм».

¹² Йессей йӕм арвыста, ӕмӕ йӕ ӕрбакодтой. Сырхуадул лӕппу, рӕсугъд цӕстытӕ йын, бакастӕй — зӕрдӕмӕдзӕугӕ. Дунедарӕг Самуелӕн загъта: «Байсӕрд ӕй! Уый у».

¹³ Самуел сойы сыкъа райста ӕмӕ Давиды йе ’фсымӕрты раз байсӕрста. Уыйадыл Дунедарӕджы Уд ӕртыхсти Давидыл ӕмӕ уыцы бонӕй фӕстӕмӕ уыди йемӕ. Самуел та аздӕхти Рамамӕ.

Давид сси Саулы лӕггадгӕнӕг

¹⁴ Дунедарӕджы Уд ныууагъта Саулы, ӕмӕ йӕ Дунедарӕгӕй ӕрвыст фыдмон удхарӕй мардта.

¹⁵ Саулӕн йӕ дӕлдӕртӕ загътой: «Хуыцауӕй ӕрвыст фыдмон дӕ удхарӕй мары.

¹⁶ Нӕ хицау бардзырд раттӕд йӕ разы лӕууӕг цагъартӕн, цӕмӕй дын, хъисыныл дӕсны чи цӕгъды, ахӕм адӕймаджы бацагурой. Ӕмӕ дӕ Хуыцауы ӕрвыст фыдмон куы хъыгдара, уӕд-иу дын уый ӕрцӕгъддзӕн, ӕмӕ та-иу дын фенцондӕр уыдзӕн».

¹⁷ Саул сын дзуапп радта: «Ссарут мын хорз фӕндырдзӕгъдӕг ӕмӕ мӕм ӕй ӕрбакӕнут».

¹⁸ Уӕд ын йӕ дӕлдӕртӕй иу загъта: «Ӕз зонын вифлеемаг Йессейы фырты: дӕсны фӕндырдзӕгъдӕг, ныфсхаст лӕппу, ӕхсарджын хӕстон, дзырдарӕхст ӕмӕ хӕрзконд, Дунедарӕг ыл ауды».

¹⁹ Саул Йессеймӕ арвыста минӕвар, цӕмӕй йын зӕгъа: «Рарвит мӕм Давиды, фыстӕ чи хизы, дӕ уыцы фырты».

²⁰ Йессей хӕрӕгыл сӕвӕрдта дзултӕ, сӕны лалым, равзӕрста иу сӕныкк ӕмӕ сӕ йӕ фырт Давидимӕ Саулӕн арвыста.

²¹ Афтӕмӕй Давид ӕрцыди Саулмӕ ӕмӕ йын лӕггад кодта. Тынг фӕцыди Саулы зӕрдӕмӕ ӕмӕ йӕ хотыхдар скодта йӕхицӕн.

²² Саул арвыста Йессейӕн афтӕ зӕгъынмӕ: «Уадз ӕмӕ мын Давид лӕггад кӕна, уымӕн ӕмӕ мӕ зӕрдӕмӕ фӕцыд».

²³ Ӕмӕ-иу Хуыцауы ӕрвыст фыдмон Саулы куы хъыгдардта, уӕд-иу Давид йӕ къухмӕ райста хъисын ӕмӕ цагъта. Саулӕн-иу фенцон ис, йӕ чемы-иу ӕрцыди, ӕмӕ-иу ӕй фыдмон ныууагъта.