1 Коринфӕгтӕм 14 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Пехуымпарады ӕмӕ ӕвзӕгтыл дзурыны курдиат

¹ Тырнут уарзӕгойӕ цӕрынмӕ, ӕнувыдӕй архайут, Уд кӕй дӕтты, уыцы курдиӕттӕ райсыныл, уӕлдайдӕр та пехуымпариуӕг кӕныныл.

² Ӕндӕр ӕвзагыл чи дзуры, уый адӕмӕн нӕ, фӕлӕ Хуыцауӕн дзуры. Ничи йӕ ӕмбары — Уды хъаруйӕ сусӕгдзинӕдтӕ дзуры.

³ Пехуымпариуӕггӕнӕг та адӕмӕн дзуры, цӕмӕй сӕ сфидар, сразӕнгард кӕна ӕмӕ барӕвдауа.

⁴ Ӕндӕр ӕвзагыл чи дзуры, уый ӕрмӕст йӕхи фидар кӕны, пехуымпариуӕггӕнӕг та — аргъуан.

⁵ Мӕ зӕрдӕ уе ’ппӕтӕн дӕр зӕгъы ӕндӕр ӕвзӕгтыл дзурын, ноджы тынгдӕр та — пехуымпариуӕг кӕнын. Ӕвзӕгтыл дзурӕг аргъуан сфидар кӕныны сӕраппонд йӕ ныхас куынӕ ӕмбарын кӕна, уӕд пехуымпариуӕггӕнӕг ӕвзӕгтыл дзурӕгӕй уӕлдӕр у.

⁶ Ныр уӕм ӕрцыдтӕн, ӕфсымӕртӕ, ӕмӕ ӕндӕр ӕвзӕгтыл дзурын, зӕгъгӕ, уӕд уын цы пайда фӕуыдзынӕн, Хуыцауӕй мын цы раргом, ахӕмӕй исты — зонынад, пехуымпарад кӕнӕ ахуырад куы не ’рхӕссон, уӕд?

⁷ Ӕнӕуд дзауматӕ, уадынгӕрзтӕ, райсӕм — уадындз кӕнӕ фӕндыр, зӕгъӕм. Сӕ зӕлтӕ кӕрӕдзийӕ куынӕ хицӕн кӕной, уӕд куыд базындӕуыдзӕн, цавӕр мелоди цӕгъдынц, уый?

⁸ Уӕдӕ хӕстон сыкъауадындзӕй бӕлвырд зӕлтӕ куынӕ хъуыса, уӕд хӕстмӕ йӕхи чи ӕрцӕттӕ кӕндзӕн?

⁹ Бамбарӕн кӕмӕн нӕй, ахӕм ныхӕстӕ сымах дӕр ӕндӕр ӕвзӕгтыл куы дзурат, уӕд иннӕтӕ куыд базоной, цӕуыл дзурут, уый? Уымӕн ӕмӕ уӕ ныхас уыдзӕни дымгӕмӕ дзурӕгау.

¹⁰ Дунейы бирӕ ӕвзӕгтӕ ис, ӕмӕ иууылдӕр мыртӕй пайда кӕнынц.

¹¹ Фӕлӕ ӕз уыцы мырты нысаниуӕг куынӕ зонон, уӕд ме ’мныхасгӕнӕгӕн ӕз дӕр ӕндӕрбӕстаджы хуызӕн уыдзынӕн, ӕмӕ мын уый дӕр ӕндӕрбӕстаджы хуызӕн уыдзӕни.

¹² Афтӕ уӕд сымах дӕр: кӕд Уды курдиӕттӕм бӕллут, уӕд архайут, цӕмӕй уӕм бирӕ уа, аргъуан сфидар кӕнынӕн ахъаз чи у, ахӕм курдиӕттӕ.

¹³ Уӕдӕ ӕндӕр ӕвзӕгтыл чи дзуры, уый кувӕд, цы дзуры, уый ӕмбарын кӕныны курдиат райсыны тыххӕй.

¹⁴ Уымӕн ӕмӕ, ӕз ӕнӕзонгӕ ӕвзагыл куы кувон, уӕд мӕ уд кувдзӕн, мӕ зондӕн та дзы пайда нӕ уыдзӕн.

¹⁵ Уӕдӕ цы бакӕнон? Кувдзынӕн удӕй, кувдзынӕн зондӕй дӕр, зардзынӕн удӕй, зардзынӕн зондӕй дӕр.

¹⁶ Уымӕн ӕмӕ, ды Хуыцауӕн удӕй куы арфӕ кӕнай, уӕд, ӕвзӕгтӕ ӕмбарынхъом цы адӕймаг нӕу, уый дӕ арфӕйӕн «аммен» куыд зӕгъдзӕн, цы дзурыс, уый куы не ’мбара, уӕд?

¹⁷ Ды хорз арфӕ кӕныс, фӕлӕ дзы иннӕйы уырнындзинад нӕ фидар кӕны.

¹⁸ Бузныг дӕн мӕ Хуыцауӕй: ӕндӕр ӕвзӕгтыл ӕз уе ’ппӕтӕй дӕр фылдӕр дзурын.

¹⁹ Фӕлӕ мӕ аргъуаны фӕнды ӕндӕр ӕвзагыл мингай дзырдтӕ зӕгъыны бӕсты фондз ныхасы мӕ зондӕй зӕгъын, цӕмӕй сахуыр кӕнон иннӕты дӕр.

²⁰ Ӕфсымӕртӕ, зондӕй сывӕллӕттӕ ма ут. Фыдбылыз саразынмӕ ут сабитӕ, зондӕй та — хъомылтӕ.

²¹ Ӕгъдауы фыст ис: «Ӕндӕр ӕвзӕгтыл, ӕцӕгӕлон ныхасыздӕхтӕй дзурдзынӕн ацы адӕмимӕ, фӕлӕ Мӕ уӕддӕр нӕ фехъусдзысты», — зӕгъы Дунедарӕг.

²² Уӕдӕ, уынут ӕй, ӕнӕзонгӕ ӕвзӕгтӕ цыдӕр ахадынц уырнджытӕ нӕ, фӕлӕ, чи не ’ууӕнды, уыдоны цӕсты. Пехуымпар ныхас та ӕнӕуырнджытӕн нӕ, фӕлӕ уырнджытӕн у.

²³ Ӕгас аргъуаны ӕмбырды ӕнӕзонгӕ ӕвзӕгтыл куы дзурат, афтӕмӕй уӕм, чи сӕ не ’мбары, ахӕмтӕ кӕнӕ ӕнӕуырнджытӕ дӕр куы бацӕуой, уӕд цы зӕгъдзысты? Ӕрратӕ уӕ нӕ фӕхондзысты?

²⁴ Фӕлӕ иууылдӕр пехуымпариуӕг куы кӕной, ӕмӕ сӕм ӕнӕуырнӕг кӕнӕ, ӕвзӕгтӕ бамбарынхъом чи нӕу, ахӕм исчи куы бацӕуа ӕмӕ, цы ныхӕстӕ фехъуса, уыдон ын йӕ зӕрдыл йӕ тӕригъӕдтӕ куы ӕрлӕууын кӕной, уӕд йӕхиуыл ӕрхуддзӕн.

²⁵ Раргом уыдзысты йӕ зӕрдӕйы сусӕгтӕ, ӕмӕ уӕд ныддӕлгом уыдзӕн зӕххыл, бакувдзӕн Хуыцаумӕ ӕмӕ зӕгъдзӕн: «Хуыцау ӕцӕгдӕр уемӕ ис».

²⁶ Уӕдӕ уын цы зӕгъон, ӕфсымӕртӕ? Сымах куы ӕрӕмбырд вӕййут, уӕд уӕ алкӕмӕ дӕр вӕййы кӕнӕ зарӕг, кӕнӕ зондамонӕн ныхас, кӕнӕ ӕндӕр ӕвзаг, кӕнӕ уыцы ӕвзаг бамбарын кӕныны курдиат, кӕнӕ искӕмӕн Хуыцауӕй исты раргом вӕййы. Ӕппӕт уыдӕттӕ хъуамӕ фидар кӕной аргъуан.

²⁷ Кӕд исчи ӕндӕр ӕвзагыл дзуры, уӕд дзурӕнт дыууӕйӕ, тӕккӕ фылдӕр ӕртӕйӕ, уымӕй дӕр радгай, иу та йӕ ӕмбарын кӕнӕд.

²⁸ Кӕд ӕмбарынгӕнӕг нӕй, уӕд аргъуаны ма дзурӕд, фӕлӕ дзурӕд йӕхицӕн ӕмӕ Хуыцауӕн.

²⁹ Пехуымпартӕ дӕр дзурӕнт дыууӕйӕ кӕнӕ ӕртӕйӕ, иннӕтӕ та сын сӕ ныхас ӕвзарӕнт.

³⁰ Фӕлӕ чи бады ӕмӕ хъусы, уыдонӕй искӕмӕн Хуыцауӕй исты куы раргом уа, уӕд, дзургӕ чи кӕны, уый банцайӕд —

³¹ уе ’ппӕты бон дӕр у радгай пехуымпариуӕг кӕнын, цӕмӕй иууылдӕр ахуыр кӕной ӕмӕ сӕ бауагъдӕуа ныфс.

³² Пехуымпар хъуамӕ йӕ удӕн фӕтк дӕттын зона,

³³ уымӕн ӕмӕ Хуыцау ӕмтъерыйы Хуыцау нӕу, фӕлӕ у фарндӕттӕг Хуыцау. Уыцы фарнӕй хайджын сты сыгъдӕджыты ӕппӕт аргъуантӕ.

³⁴ Сылгоймӕгтӕ аргъуаны сӕ дзых ма гом кӕнӕнт, уымӕн ӕмӕ сын дзурын не ’мбӕлы, фӕлӕ сӕ бынат зонӕнт, — афтӕ зӕгъы Ӕгъдау дӕр.

³⁵ Кӕд сӕ исты базонын фӕнды, уӕд хӕдзары бафӕрсӕнт сӕ лӕгты, уымӕн ӕмӕ сылгоймагӕн аргъуаны ныхас кӕнын худинаг у.

³⁶ Хуыцауы дзырд исты сымахӕй рацыди кӕнӕ ӕрмӕст сымахмӕ бахъардта?

³⁷ Кӕд исчи йӕхи пехуымпарыл кӕнӕ Сыгъдӕг Удӕй лӕвӕрд курдиаты хицауыл нымайы, уӕд бамбарӕд: ӕз уӕм цы фыссын, уый Бардарӕг бафӕдзӕхста.

³⁸ Уыдӕттӕ чи ницӕмӕ дары, уымӕн йӕхи дӕр ницӕмӕ дардӕуы.

³⁹ Уӕдӕ, ӕфсымӕртӕ, тырнут пехуымпариуӕг кӕнынмӕ ӕмӕ ӕндӕр ӕвзӕгтыл дзурыны бар дӕр дӕттут.

⁴⁰ Ӕппӕт дӕр уӕд нывыл ӕмӕ ӕгъдауыл.