1 Коринфӕгтӕм 12 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Сыгъдӕг Уды лӕвӕрттӕ

¹ Мӕн фӕнды, ме ’фсымӕртӕ, цӕмӕй сымах зонат, Сыгъдӕг Уд кӕй дӕтты, уыцы курдиӕтты тыххӕй.

² Сымах зонут: муртаттӕгтӕ ма куы уыдыстут, уӕд уӕ цыма иставӕр тых сайдта, афтӕ куывтат ӕгомыг гуымирытӕн.

³ Уымӕ гӕсгӕ уын зӕгъын: Сыгъдӕг Удӕй хайджын чи у, уый Йесойы нӕ ралгъитдзӕн, ӕмӕ, Сыгъдӕг Удӕй хайджын чи нӕу, уый Йесойы Бардарӕг не схондзӕн.

⁴ Курдиӕттӕ алыхуызон сты, дӕтгӕ та сӕ уыцы иу Уд кӕны.

⁵ Хуыцауӕн алы хуызы балӕггадгӕнӕн ис, разӕнгардгӕнӕг та уыцы иу Бардарӕг у.

⁶ Куыстытӕ алыхуызон сты, фӕлӕ не ’ппӕты фӕрцы ӕппӕт дӕр уыцы иу Хуыцау аразы.

⁷ Алкӕй удыхъӕды дӕр Сыгъдӕг Уд Йӕхи ӕвдисы сӕрмагонд хуызы, фӕлӕ — иумӕйаг хъуыддаджы пайдайӕн.

⁸ Иуӕн уд йӕ ныхасы бавӕры уӕлзонд, иннӕмӕн — зонынад,

⁹ аннӕмӕ Уды руаджы фӕзыны уырнындзинад, кӕмӕндӕр та Уд схай кӕны низтӕ дзӕбӕх кӕныны курдиат.

¹⁰ Иуӕн — диссӕгтӕ аразыны, иннӕмӕн — пехуымпарады, ӕртыккагӕн — адӕймаг цавӕр удӕй хайджын у, уый иртасыны, цыппӕрӕмӕн — алыхуызон ӕвзӕгтыл дзурыны, фӕндзӕмӕн — уыцы ӕвзӕгтыл цы загъдӕуыд, уый ӕмбарын кӕныны курдиат.

¹¹ Фӕлӕ ӕппӕт уыдӕттӕ уыцы иу, алкӕмӕн дӕр, Йӕхи куыд фӕнды, ахӕм лӕвӕрттӕ Чи кӕны, уыцы Уды архайдӕй цӕуынц.

Буар иу у, йӕ уӕнгтӕ та — бирӕ

¹² Буар иу у, йӕ уӕнгтӕ та — бирӕ. Фӕлӕ кӕд бирӕ сты, уӕддӕр се ’ппӕт дӕр иу буар сты. Афтӕ у Чырысти дӕр.

¹³ Уымӕн ӕмӕ не ’ппӕтыл дӕр — иудейӕгтӕ ӕмӕ бердзенӕгтыл, цагъартӕ ӕмӕ сӕрибар адӕмыл — иу Удӕй саргъуыдӕуыд ӕмӕ иу буар систӕм, не ’ппӕтӕн дӕр уыциу Уд рардӕуыди.

¹⁴ Буар та иу уӕнгӕй нӕу, фӕлӕ бирӕ уӕнгтӕй.

¹⁵ Къах куы зӕгъид: «Къух кӕй нӕ дӕн, уымӕ гӕсгӕ буары хай нӕ дӕн», уӕд уый тыххӕй буары хай нал уаид?

¹⁶ Ӕмӕ хъус куы зӕгъид: «Цӕст кӕй нӕ дӕн, уымӕ гӕсгӕ буары хай нӕ дӕн», уӕд уый тыххӕй буары хай нал уаид?

¹⁷ Кӕд ӕнӕхъӕн буар цӕст у, уӕд хъусгӕ та куыд кӕнид? Кӕд буар ӕнӕхъӕнӕй хъус у, уӕд ӕмбудгӕ та куыд кӕнид?

¹⁸ Хуыцау та буары алы уӕнгӕн дӕр скодта бынат, куыд Ӕй фӕндыд, афтӕ.

¹⁹ Уӕнгтӕ иууылдӕр иу уӕнг куы уаиккой, уӕд буар уӕвгӕ уаид?

²⁰ Ныр та уӕнгтӕ бирӕ сты, буар та иу у.

²¹ Цӕст къухӕн нӕ зӕгъдзӕни: «Ницӕмӕн мӕ хъӕуыс». Сӕр къӕхтӕн нӕ зӕгъдзӕни: «Ницӕмӕн мӕ хъӕут».

²² Уый нӕ, фӕлӕ нӕм лӕмӕгъдӕр цы уӕнгтӕ кӕсынц, уыдон ӕнӕмӕнг хъӕуынц.

²³ Иннӕтӕй нӕм къаддӕр чи кӕсы, нӕ буары уыцы уӕнгтыл фылдӕр мӕт кӕнӕм.

²⁴ Аив чи нӕу, нӕ уыцы уӕнгтӕ хуыздӕр ӕмбӕрзӕм; аив уӕнгты та ӕмбӕрзын нӕ хъӕуы. Хуыцау буар афтӕ скодта, цӕмӕй фылдӕр мӕт кӕнӕм, фаг нымад чи нӕу, уыцы уӕнгтыл,

²⁵ ӕмӕ буары уӕнгтӕ ма ныххицӕнтӕ уой, фӕлӕ кӕрӕдзиуыл мӕт кӕной ӕмхуызон.

²⁶ Уымӕ гӕсгӕ буары иу уӕнг куы фӕриссы, уӕд иннӕтӕ дӕр фӕриссынц йемӕ. Иу уӕнг куы скадджын уа, уӕд иннӕ уӕнгтӕ дӕр цин кӕнынц йемӕ.

²⁷ Сымах Чырыстийы буар стут, хицӕнтӕй та — Йӕ буары уӕнгтӕ.

²⁸ Ӕмӕ Хуыцау уыдонӕй иуты аргъуаны сӕвӕрдта, фыццаджыдӕр, апостолтӕй, дыккаджы — пехуымпартӕй, уый фӕстӕ — ахуыргӕнджытӕй. Уый иутӕн радта диссӕгтӕ ӕвдисыны тых, стӕй низтӕй дзӕбӕх кӕныны, ӕххуыс кӕныны, разамынд дӕттыны ӕмӕ алы ӕвзӕгтыл дзурыны курдиӕттӕ.

²⁹ Се ’ппӕт дӕр апостолтӕ сты? Се ’ппӕт дӕр пехуымпартӕ сты? Се ’ппӕт дӕр ахуыргӕнджытӕ сты? Се ’ппӕтмӕ дӕр ис диссӕгтӕ ӕвдисыны тых?

³⁰ Се ’ппӕтмӕ дӕр ис низтӕй дзӕбӕх кӕныны курдиат? Се ’ппӕты бон у алыхуызон ӕвзӕгтыл дзурын? Се ’ппӕт дӕр ӕвзӕгтӕ ӕмбарын кӕнынц?

³¹ Тырнут уӕлдӕр курдиӕттӕм. Ӕз уын бацамондзынӕн тӕккӕ хуыздӕр фӕндаг.