1 Азфыстытӕ 26 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Кувӕндоны дуаргӕстӕ

¹ Мӕнӕ дуаргӕстӕ, сӕ къордтӕм гӕсгӕ. Корахы мыггагӕй: Мешелемиа, Асафы байзӕддаг Корейы артӕй рацӕуӕг.

² Мешелемиайы фырттӕ: йӕ хистӕр зӕнӕг — Захариа, дыккаг — Йедиаел, ӕртыккаг — Зевадиа, цыппӕрӕм — Йафниел,

³ фӕндзӕм — Елам, ӕхсӕзӕм — Йоханан, ӕвдӕм — Елйехоенай.

⁴ Овед-Едомы фырттӕ: йӕ хистӕр зӕнӕг — Шемайа, дыккаг — Йозавад, ӕртыккаг — Йоах, цыппӕрӕм — Сахар, фӕндзӕм — Нетанел,

⁵ ӕхсӕзӕм — Аммиел, ӕвдӕм — Иссахар, ӕстӕм — Пеуллетай. Афтӕ Овед-Едомӕн раарфӕ кодта Хуыцау.

⁶ Овед-Едомы фырт Шемайайӕн дӕр райгуырди фырттӕ. Уыдон сӕ мыггагӕн уыдысты уынаффӕгӕнӕг, уымӕн ӕмӕ сӕрӕн лӕгтӕ уыдысты.

⁷ Шемайайы фырттӕ: Отни, Рефаел, Овед ӕмӕ Елзавад, стӕй се ’фсымӕртӕ, сӕрӕн лӕгтӕ — Елигу ӕмӕ Семахи.

⁸ Адон се ’ппӕт дӕр сты Овед-Едомы байзӕддӕгтӕ. Сӕхӕдӕг дӕр, стӕй сӕ фырттӕ дӕр ӕмӕ се ’рвадӕлтӕ дӕр уыдысты сӕрӕн лӕгтӕ, зӕрдӕргъӕвд кусджытӕ, ӕдӕппӕт дыууӕ ӕмӕ ӕртиссӕдз лӕджы.

⁹ Мешелемиайы фырттӕ ӕмӕ ӕрвадӕлтӕ, сӕрӕн лӕгтӕ — уыдысты ӕстдӕс.

¹⁰ Мерарийы байзӕддаг Хосайы фырттӕ: хистӕр — Шимри (йӕ фыццаг зӕнӕг нӕ уыди, фӕлӕ йын йӕ фыд радта хистӕры бартӕ),

¹¹ дыккаг — Хилкиа, ӕртыккаг — Тевали, цыппӕрӕм — Захариа. Хосайы фырттӕ ӕмӕ ӕрвадӕлтӕ уыдысты ӕртындӕс.

¹² Ацы дуаргӕсты къордтӕ, сӕ хистӕртӕ сӕ сӕргъы, афтӕмӕй се ’рвад-ӕфсымӕртау лӕггад кодтой Дунедарӕджы хӕдзары.

¹³ Ӕппӕт мыггӕгтӕ дӕр, стырӕй, чысылӕй, хӕлттӕ сӕппӕрстой Кувӕндонӕн йӕ алы кулдуары тыххӕй дӕр.

¹⁴ Скӕсӕнӕрдыгӕй кулдуар ӕрхауди Шелемимӕ. Сӕппӕрстой хӕлттӕ уымӕн йӕ фырт, куырыхон уынаффӕйы лӕг, Захариайы тыххӕй дӕр, ӕмӕ уымӕ та ӕрхаудис цӕгатӕрдыгӕй кулдуар.

¹⁵ Овед-Едоммӕ ӕрхауд хуссарӕрдыгӕй кулдуар, йӕ фырттӕм та — Кувӕндоны ӕфтауцуат.

¹⁶ Шуппим ӕмӕ Хосамӕ ӕрхаудтой ныгуылӕнӕрдыгӕй кулдуар ӕмӕ, фӕндагыл хӕрдмӕ суайын кӕмӕ хъуыди, уыцы Шаллехеты кулдуар. Мӕнӕ дуаргӕстӕн сӕ хъалагъур хӕссыны фӕтк.

¹⁷ Скӕсӕнӕрдыгӕй алы бон дӕр лӕууыд ӕхсӕз левиты, цӕгатӕрдыгӕй — цыппар, хуссарӕрдыгӕй — цыппар, дыууӕ ӕфтауцуаты цур та — дыгӕйттӕ.

¹⁸ Ныгуылӕнӕрдыгӕй, Парбары цур, фӕндагыл лӕууыди цыппар дуаргӕсы, Парбарӕн йӕхи цур та — дыууӕ.

¹⁹ Адон уыдысты дуаргӕсты къордтӕ, Корахы ӕмӕ Мерарийы байзӕддӕгтӕ.

Левиттӕ — хӕзнадартӕ, бӕрнылӕгтӕ ӕмӕ тӕрхоны лӕгтӕ

²⁰ Иннӕ левиттӕ, се ’рвадӕлтӕ, сӕ цӕст дардтой Хуыцауы хӕдзары хӕзнатӕм, уыимӕ уаз хӕзнатӕм дӕр.

²¹ Гершоны фырт Ладаны байзӕддӕгтӕ, мыггӕгты хистӕртӕ: Йехиел

²² ӕмӕ йӕ фырттӕ — Зетам ӕмӕ йе ’фсымӕр Иоел. Адон сӕ цӕст дардтой Дунедарӕджы хӕдзары хӕзнатӕм.

²³ Амрамы, Ицхары, Хевроны ӕмӕ Уззиелы байзӕддӕгтӕ.

²⁴ Моисейы фырт Гершомы байзӕддаг Шевуел уыди хӕзнатӕм хистӕр цӕстдарӕг.

²⁵ Гершомы ӕфсымӕр Елиезеры байзӕддӕгтӕ: йӕ фырт — Рехави, уый фырт Исайа, уый фырт Йорам, уый фырт Зихри, уый фырт Шеломот.

²⁶ Ацы Шеломот ӕмӕ йе ’фсымӕртӕ сӕ цӕст дардтой, паддзах Давид, мыггӕгты хистӕртӕ, миныхицӕуттӕ, сӕдӕйыхицӕуттӕ ӕмӕ ӕфсады хицӕуттӕ кӕй рауӕлдай кодтой, уыцы ӕппӕт уаз хӕзнатӕм.

²⁷ Хӕстон ӕфтиагӕй-иу снывонд кодтой Дунедарӕджы хӕдзарӕн.

²⁸ пехуымпар Самуел, Кишы фырт Саул, Неры фырт Авнер ӕмӕ Церуайы фырт Йоав цыдӕриддӕр снывонд кодтой, уыдонмӕ — ӕппӕт лӕвӕрттӕм дӕр — сӕ цӕст дардтой Шеломот ӕмӕ йе ’фсымӕртӕ.

²⁹ Ицхары байзӕддагӕй: Кенаниа ӕмӕ йӕ фырттӕ. Адон Кувӕндоны нӕ куыстой, Израилӕн сӕ баурӕдтой бӕрнылӕгтӕ ӕмӕ тӕрхоны лӕгтӕй.

³⁰ Хевроны байзӕддагӕй: Хашавиа ӕмӕ йе ’рвадӕлтӕ, мин ӕмӕ авдсӕдӕ лӕджы, ӕхсарджын адӕм. Уыдон сӕ цӕст дардтой, Израилы Иорданӕй ныгуылӕнӕрдӕм Дунедарӕгӕн куыд лӕггад кӕнынц, уымӕ, стӕй паддзахады ӕппӕт хъуыддӕгтӕм.

³¹ Хевроны байзӕддӕгтӕн сӕ сӕргъы лӕууыд Йериа. Давиды паддзахдзинады дыууиссӕдзӕм аз ӕркастӕуыд Хевроны артӕй рацӕуӕг мыггӕгтӕм, ӕмӕ дзы Галаады сахар Йазеры разынди сӕрӕн лӕгтӕ.

³² Паддзах Давид Йериайы ӕмӕ уымӕн йе ’рвад-ӕфсымӕрты — дыууӕ мины ӕмӕ авдсӕдӕ сӕрӕн лӕджы, мыггӕгты хистӕрты — баурӕдта Рувимы ӕмӕ Гады хӕдзарвӕндӕгты сӕргъы, стӕй Менассиайы хӕдзарвӕндаджы ӕмбисы сӕргъы, цӕмӕй сӕ цӕст дарой Израилы дины ӕмӕ паддзахады ӕппӕт хъуыддӕгтӕм.