1 Азфыстытӕ 16 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Хуыцауы Фидыды Чырын ӕрбахастой ӕмӕ йӕ, Давид ын цы цатыр сарӕзта, уым сӕвӕрдтой. Стӕй Хуыцауӕн иууылсудзинаг нывӕндтӕ ӕмӕ фидыды нывӕндтӕ ӕрхастой.

² Иууылсудзинаг нывӕндтӕ куы ӕрхаста, уӕд Дунедарӕджы номӕй Давид адӕмӕн арфӕ ракодта

³ ӕмӕ ӕппӕт израилӕгтӕн, алы сылгоймаг ӕмӕ алы нӕлгоймагӕн дӕр, фӕйнӕ дзулы ӕмӕ финиктӕ ӕмӕ чисмисты фӕйнӕ гуылы байуӕрста.

⁴ Давид Дунедарӕджы Фидыды Чырыны раз левиттӕй баурӕдта лӕггадгӕнджытӕ, цӕмӕй кувой Дунедарӕгмӕ, Израилы Хуыцаумӕ, кӕной Йын арфӕ ӕмӕ кад.

⁵ Асаф уыд сӕ хистӕр, йӕ дӕле — Захариа, иннӕтӕ — Йаазиел, Шемирамот, Йехиел, Маттитиа, Елиав, Бенайа, Овед-Едом ӕмӕ Йеиел. Адон цагътой дыууадӕстонтӕ ӕмӕ хъисфӕндыртӕй, Асаф — ӕмдзӕгъдгӕнӕнтӕй,

⁶ сауджынтӕ Бенайа ӕмӕ Йахазиел та Хуыцауы Фидыды Чырыны раз алкӕддӕр цагътой хӕтӕлтӕй.

Давиды арфӕйы зарӕг

⁷ Уыцы бон Давид фыццаг хатт бафӕдзӕхста Асаф ӕмӕ йе ’рвадӕлтӕн Дунедарӕджы кадӕн ацы арфӕйы зарӕг азарын:

⁸ Сыстаут Дунедарӕджы, арут Ын Йӕ ном, адӕмты ’хсӕн Ын хъусын кӕнут Йӕ хъуыддӕгтӕ.

⁹ Зарут Ын, зарджыты Йӕ сыстаут, хъусын Ын кӕнут Йӕ диссӕгтӕ.

¹⁰ Раппӕлут Ын Йӕ уаз номӕй, Дунедарӕджы чи агуры, уыдон цинӕй райӕнт!

¹¹ Агурут Дунедарӕджы, агурут Ын Йӕ хъомыс, кӕддӕриддӕр тырнут Йӕ размӕ.

¹² Ма рох кӕнут Йӕ диссӕгтӕ, Йе ’вдисӕйнӕгтӕ, Йӕ тӕрхӕттӕ.

¹³ Сымах — Израилы байзӕддӕгтӕ, Йӕ цагъартӕ, Йаковы фӕдонтӕ, Йе ’взӕрстытӕ!

¹⁴ Уый махӕн у нӕ Дунедарӕг Хуыцау, ӕгас зӕххы тӕрхонгӕнӕг.

¹⁵ Мыггагмӕ дӕр ма рох кӕнут Йӕ фидыд, мин фӕлтӕрӕн кӕй бафӕдзӕхста,

¹⁶ Авраамӕн ныстуанӕн кӕй ныууагъта, Исаакӕн сомы кӕмӕй ракодта.

¹⁷ Йӕ сомы уагӕвӕрдау радта Йаковӕн, ӕнусон фидыдау — Израилӕн.

¹⁸ Уый загъта: «Ханааны зӕхх уын фыдӕй-фыртмӕйы исбонӕн ратдзынӕн».

¹⁹ Сӕ нымӕц чысыл куы уыд нырма, ӕрцӕуӕггӕтӕ куы уыдысты уыцы ран,

²⁰ уӕд хӕтӕнхуагӕй иу бӕстӕйӕ иннӕмӕ, иу паддзахадӕй иннӕмӕ цыдысты.

²¹ Фӕлӕ сӕ Уый никӕмӕн уагъта ӕфхӕрын, паддзӕхтӕн-иу бардзырд радта:

²² «Ма хъыгдарут Мӕ байсӕрстыты, мӕ пехуымпартӕн ӕвзӕрӕй мацы ракӕнут».

²³ Дунедарӕгӕн ног зарӕг зарут, ӕгас зӕххы цъар, Дунедарӕгӕн зар! Зарут Дунедарӕгӕн, арфӕ кӕнут Йӕ номӕн, бонӕй-бонмӕ Йӕ ирвӕзындзинадыл дзурут!

²⁴ Адӕмтӕн дзурут Йӕ кадыл, ӕппӕт адӕмтӕн — Йӕ диссӕгтыл.

²⁵ Уымӕн ӕмӕ Дунедарӕг стыр у, ӕппӕлыны аккаг у Уый, ӕппӕт хуыцӕуттӕй — тӕссагдӕр.

²⁶ Адӕмтӕн сӕ хуыцӕуттӕ — гуымирытӕ, Дунедарӕг та сфӕлдыста уӕлӕрвтӕ.

²⁷ Йӕ кад ӕмӕ намыс цӕуынц Йӕ разӕй; Йӕ Кувӕндоны — Йӕ хъару ӕмӕ Йе стырад.

²⁸ Адӕмтӕ, Дунедарӕджы стаут, сыстаут Ын Йӕ кад ӕмӕ Йӕ хъомыс!

²⁹ Дунедарӕгӕн Йӕ номы аккаг кад скӕнут, бацӕут Йӕ кӕртытӕм хуынтимӕ. Бакувут Дунедарӕгӕн Йӕ сыгъдӕг кады рухсы!

³⁰ Ӕгас зӕхх Дунедарӕджы раз ӕмризӕджы нырризӕд! Дун-дуне Уый фӕрцы у фидар, нӕ фенкъуысдзӕн.

³¹ Цин кӕнӕд уӕларв иууылдӕр, цинӕй райӕд зӕхх, уадз ӕмӕ адӕмты ’хсӕн айхъуыса: «Дунедарӕг паддзах у!»

³² Ныннӕрӕд денджыз ӕмӕ, йӕ мидӕг цыдӕриддӕр ис, уыдон; райгонд уӕнт фӕзтӕ ӕмӕ сыл цыдӕриддӕр ис, уыдон.

³³ Хъӕды бӕлӕстӕ иууылдӕр ныццин кӕнӕнт Дунедарӕджы раз, уымӕн ӕмӕ Дунедарӕг ӕрцӕудзӕн — тӕрхон кӕнынмӕ зӕххӕн.

³⁴ Арфӕ кӕнут нӕ Хуыцауӕн, уымӕн ӕмӕ Уый хорзӕхджын у, Йӕ хорзӕх мыггагмӕ у.

³⁵ Кувут Ӕм: «Фервӕзын нӕ кӕн, Хуыцау, нӕ Ирвӕзынгӕнӕг! Иумӕ нӕ, Хуыцау, рамбырд кӕн, бахиз нӕ алы адӕмтӕй — кад Дын кӕнӕм Дӕ уаз номӕн, стауӕм Дӕ, цинӕй райгӕйӕ!»

³⁶ Дунедарӕг уӕд арфӕгонд, йе Стыр Хуыцау Израилӕн! Кад Ын уӕд мыггагӕй-мыггагмӕ! Ӕппӕт адӕм дӕр загътой: «Аммен! Алелуйа!»

Хуыцауы лӕггадгӕнджытӕ Йерусалимы ӕмӕ Гивоны

³⁷ Дунедарӕджы Фидыды Чырыны раз Давид ӕрвылбоны лӕггадгӕнджытӕ скодта Асафы ӕмӕ уымӕн йе ’рвад-ӕфсымӕрты,

³⁸ стӕй Овед-Едомы ӕмӕ йе ’рвад-ӕфсымӕрты, аст ӕмӕ ӕртиссӕдз лӕджы. Йедутуны фырт Овед-Едомы ӕмӕ Хосайы та скодта дуаргӕстӕ.

³⁹ Сауджын Цадокӕн ӕмӕ уымӕн йӕ сауджын ӕрвадӕлтӕн Давид бахӕс кодта Гивоны кувӕн къуыбырыл, Дунедарӕджы Цӕрӕны цур,

⁴⁰ алы райсом ӕмӕ алы изӕр иууылсудзинӕгты нывондхӕссӕныл Дунедарӕгӕн нывӕндтӕ хӕссын, Дунедарӕг Израилӕн кӕй бафӕдзӕхста, уыцы Ӕгъдауы ӕппӕт домӕнтӕм гӕсгӕ.

⁴¹ Уыдонимӕ ма уыдысты Хеман ӕмӕ Йедутун, стӕй иннӕ ӕвзӕрст лӕгтӕ. Сӕ хӕс уыди Дунедарӕджы стауын, афтӕ дзургӕйӕ: «Йӕ хорзӕх нӕ сӕфы мыггагмӕ!»

⁴² Хуыцауы кадӕн Хеман ӕмӕ Йедутун зарыдысты; хӕтӕлтӕй, ӕмдзӕгъдгӕнӕнтӕй ӕмӕ ӕндӕр цӕгъдӕнтӕй цагътой. Йедутуны фырттӕ та уыдысты дуаргӕстӕ.

⁴³ Уый фӕстӕ адӕм сӕ хӕдзӕрттӕм фӕцыдысты. Давид дӕр ӕрбаздӕхт ӕмӕ йӕ хӕдзаронтыл Хуыцауы арфӕ бафтыдта.