Yuda 1 - Ya/abtór hho' 1977

¹ Ánuú Yuda a lawaalmoó Yesu Kristo nee slám a hhiyoó Yakobo. Aníng barwaárí ngina gooiím dír mukdá' taa ateét nee Mungú, kudá' taa slaá' nee Mungú Baabá, nee kiri amohhe'eemiís as Yesu Kristo.

² Gurtleemu nee wayda nee sla'aari masók kingi dook dirhunge.

Intsaahhatuusér lama

³ Sla'aaruúse, aníng iidíguú ba/ama nguwa dirhúng i gooiim una ló'wa slaá'. Nee ba/amarí a toorén atén sleémeero. Ala aníng ana tsaáhh gídaabá gár hariím gooiro a kuungá' nun gurbuú'. Gurbu'ungw'eé' a kwí gídaabá kuungá' haratlintaao sageeslaqwaak, tidá' Mungú aa saayín amór mukós sagaáwa wák wa ale.

⁴ Asma muu i deer oo aa qawti dah. Mukwí kuna sakwasleemarí i gooín iimír aáng wa ale. Inooín a múk Mungú da'ayuumitaaká, slám a múk tsuuqaá Mungú harneét ar hotángw tlákw. Nee inooín kudá' úr oo kilós, Aakoorén Yesu Kristo, ngu sa tlaankiyá'.

⁵ Iidíguuwí ngun inslawtisár wa slaá' dirhúng i alé, ala tam ugwa geerí xui'i gídaabá, Aako mukós guna ba/amís baraá yaamaá Misrír wa ale, aluuwo mukdá' inós gwa haratlintii'iiká guri qwaareés.

⁶ Nee malayke sleeme tidá' taa uráy i haniís, uray'ín kudá' taa sláy kwaa gaár i xuiiká, ala didár hotaín wa hariim kari geexáy. Gawaá adoorihe Mungú gari tseék baraá giwti ar tseegamór alhhe'eesay wasl, as kiwa sakwasleemuuti bál deelór sakwasleemár ure.

⁷ Múk gixsár Sodoma nee Gomora inslawaak sleeme, nee múk gixsadaá hatlá' awa bihheedá' i tsewen. Inooín sleeme adoodár malaykeedá' kana tleéhh, tsaatu'uuma kana eehaár, ilatleerír tlakw baraá slaqooine ina baaliín, tam tsaatu'uumadár tlakw ar irangeét kana tlehhiít. Mukwí kwaa sakwasleemuút as tawa slaqsaay tleehhiti dír múk hatlae, kiwa slahhe'eemisi baraá asltá alhhe'eesoó koomaaká.

⁸ Tam mukwí naa tla/angwhúng i dah sleeme aqo adoodá'. Inooín baraá tlataín awa tawooro slaqooín kin slasla/areemiis, tan siaasii' kiwa baliiti nee Mungú, nee kudá' xirfayen awa gawaá doori kin /ooslislín.

⁹ Ala tam Mikaeli, malaykamoodá' úr, qoomár tiwa tlaampa'aasiyé' nee Neetlaangw daanduú slaqwtá Musá wa ale, aa qiitliiká sleeme nguwa /ooslin, aqo ina oó', “Aako kuúng u iigahhaati.”

¹⁰ Ala mukwí muruudá' ta tsatsahhanká kun /ooslislín. Nee muruudá' slaqo oo iimír iimu/uungw ta tsatsahhan, kudá' makaá fuqurángw kooma'aaká sleeme i tsatsahhana', mukwí slaqooín gin hhitiitín ar muruudá'.

¹¹ Mukwí a tsaxwa sakwaasleemar'ín ngiwa wa /akuuti. Asma inooín loohír Kaini kana eehaár. Tari /eét baraá dakuúsadár Balaamu, as tawa bu'utú slai, inooín tari qwaár baraá dee/aanuú adór kuduú Kora.

¹² A múk hhitár huwahuúw baraá dinku'uumarhúng tidár muruú /aymár sla'aariro. Tan al /ayín nee kuungá' ar mure wasle. Inooín kilooín tin xuiyá'. Inooín a adór hunkoó tar hii'imiiti nee fur'a, ala i tluwoó konká. Slám inooín a adór xaa'aá mamaá kooma'aaká qoomár hariímár mamaá xaaiwo, kudá' taa dee/aruú al tuú/ nee niri kahiyé' niri slupuutiyé'.

¹³ Inooín a adór gwaanduú tlawi, kudá' ila/aaro ta aleeslayká, mureewasler'ín ka geehhoo' adór sloorór gwaanduú baraá tlawi. Inooín a adór tsatse/uú tawó qwaqwadiím, kudá' dir'ín taa amohhe'eés ay alhhe'eesay wásl baraá ma/ami.

¹⁴ Nee Henoko a heé faanqw alaá Adamuwo. Inós aari gana oó' daanduú mukwihe iwa kaahi, “Qaytsité', Aako naa hardáh nee malaykeerós ar hhohho' ar kumér kúm.

¹⁵ Inós nina hardáh as sakwasleema ngiwa tleehhi gawaá daanduú muu sleémeero. Mukdá' sleémeero oo Mungú gwa ilaiwa/iiká guri doohhimiis, as gawaá daanduú tlehhemi'ii'ín kudá' sleémeero awa qwanaay taa tlehhiít, kudá' Mungú kuwa ilaiwawa/iiká. Kiri malé doohhimiis as gawaá daanduú axweesanaydá' xaraásl sleémeero awa tlakuuseedá' Mungú ilaiwawa/aaká aa kát daanduuwós i alé.”

¹⁶ Mukwí a múk tawó qununuú/ nee oo naeetuús. Nee laatí inooín a múk ilatleerir'ín eeharahaár. Mukwí axweesanoó daara/aangw gun ar axwees, nee bartakaaro tin sla'atimisiyá' dír múk urén as slaasláw kawa dir'ín wa slay.

Gurbu'uungw

¹⁷ Ala kuungá' sla'aaruúse, inslawaak /ayma'aá taa káh aáng nee Ya/abuusér Aakoorén Yesu Kristo.

¹⁸ Inooín tana oó', “Qoomár alhhe'eesaywo waniquuse i deerút awa ilatleerir'ín tidár qwanaay ngi eeharahará'.”

¹⁹ Mukwí an múk wakaarír huwahuúw. Inooín muruú ta eeharahari a muruú baraaká' yaamu kilós, muruú qeeru ku eeharahariiká.

²⁰ Ala kuungá' sla'aaruuser'eé', ti kwa/ase' baraá haratlintaaorhúng tidá' hhoohhooe, nee tawa firiiriinda' baraá /uuruú Qeeruú hhoohhooe.

²¹ Kuungá' kumiité' baraá sla'aarír Munguhe, nee slafíngw alhhe'eesay wásl kuwa daamaaraanda', kudá' Aako Yesu Kristo ni haniisi ar gurtleemuuwós.

²² Múk xurér koóm baraá muner'ine, gurtlatlaawaak.

²³ Awa hatlá' ba/amisaak ar kiwa baraá asltá wa dafimita'. Bahh'alé i dayá' awa ta gurtlatleera', ala ar dae. Tam inqwaruuín aahhaak kudá' taa slasla/aareés nee ilatleerír slaqwa.

Xirif dír Mungú

^24-25 Mungú kilós, inós a Ba/amusmoorén ar baraá Yesu Kristo Aakoorén. Inós kuungá' nu aleesláy nuwa de'en as dukuutsmo munduwa tuú', slám nuri sihhitis dír geerá xirfuuwós tawa múk xaslxaansli wásl, nee tawa múk baraá qwal/uú úr. Inós xirif a kós, nee uraay, nee aleesleemu, nee /uuru, iimír iimu/uungo ay hamí, tam ay alhhe'eesay wasle. Amin.