Yohana 9 - Ya/abtór hho' 1977

Yesu heé taampa nguwa ila' qaytsitís

¹ Yesu qoomár iwa waaraahhi, heeko guna ár, inós a taampa iimír kuwa laqwaali.

² Eeharuuse Yesu guri yaahás iri ó', “Intsaahhatusúmo, heé tlakweema gaa tleehh a heemá, a heewíhe laqaá a xwayliteérós, heewí kuwa laqwaali tawa taampa.”

³ Yesu iri oó', “Heewí tlakweemaawós ngwa taampuy'iiká, laqaá tam tlakweemaá xwayliteérós, ala as gadiyér Mungú iwa geehhouur inós ar alé.

⁴ Gár atén tiwa hariím a gadiyér kudá' án iga ya/aaw ngiwa tleehhaan, dír tlaatla/aangw ir kumiit. Xweera binda hardahiyé', hee gadiyeét tleehhamooro ga aleeslayká.

⁵ Qoomaarí án niwa baraá yaamí dirii', aníng a gwa/ateemaá yaamu.”

⁶ Adoorí ooaro ngiwa hhe'eés, iri yaamí tsuúq, baa/í gari tleéhh ar tsuuqaadá', baa/ídá' gari sliík ar ila'.

⁷ Iri oó', “Tláw, hamtlo aweek baraá tlahhasár Siloamu.” (Gídaabárós, “Oo taa ya/aáw”). Iri tláy, iri hamtlór áy. Niwa kií/ naxés i xumiis.

⁸ Inslaawaywós kudá' aáng gu xuú' gídaabá heewí a heedaádá' firaariím, tari oó', “Ahaá, heewí a kudá' iwaawiítaáke nee iwa firaarin?”

⁹ Múk hatlá' iri oó', “An inós.” Bahh'alé tari oó', “Aasla'áy, a kudáeeká, an slaqamiimís nee kudá'.” Heedaáduú kilá' iri oó', “An aníng.”

¹⁰ Tari oó', “Adór ilaawók nira qaytsitiyé' a adoomá?”

¹¹ Inós iri oó', “Heedaádá' ta babay Yesu baa/í gana tleéhh, ilaaeé' giri sliík, iri báy, ‘Tláw, hamtlo aweek baraá tlahhasár Siloamu.’ Aníng niri daqáw, niri hamtliím, ilaaeé' niri qaytsitiyé'.”

¹² Tari oó', “Heesíng i amá?” Inós iri oó', “Aníng u xuaaká amór i dirii'i.”

Múk Farisayo i iidíguú hungu/uusadá' yaahamiisiyá'

¹³ Heedaáduú taampa kuri huúw amór múk Farisayo.

¹⁴ Nee baldá' ilaawós kiwa gweér nee Yesu, baldá' a deelór hungu/uma.

¹⁵ Múk Farisayo sleeme heedaádá' kuri yaahamiís malé alé, adór ilaawós nira qaytsiitiyé'. Inós iri oó', “Ilaaeé' gina baa/ír ar sliík, án niri hamtlór áw, nee hám a xumiís.”

¹⁶ Múk Farisayo bahh'alé tari oó', “Heesíng i amór Mungú dahhiiká, asma hara'ayár deelór hungu/uma ga eeharahariiká.” Bahh'alé tari oó', “Heé tlakweemaá koóm, layár adór tí tleehhamooro, adór ngir aleeslay a adoomá?” Tari afoo dakumiisiyé' tla/angw'ine.

¹⁷ Tari oó' dír heedaáduú taampa sagaáwa tsare, “Kuúng ma kát daanduú iidíguú heesinge? Asma ilaawók ngaa gweér.” Iri oó', “A aarusmo.”

¹⁸ Ala múk Yahudi iidíguú heedaádá' kwa haratlinti'iiká gídaabá a taampa nee ilaawós kiri gweér. Xwaylitér heedaáduú taampa kari ateét,

¹⁹ kari yaahaás, tari oó', “Garmaawí a koohúnge, kudá' tawa kata' a taampa iimír kuwa laqwaali? Adór ilaawós nira qaytsitiyé' a adoomá?”

²⁰ Xwayliteérós iri ó', “Atén gár ta xuaan garmaawí an koorén, nee gídaabá an taampa iimír kuwa laqwaali.

²¹ Ala adór hamí ir xumiisi atén a xuaanaaká. Slám heé ilaawós gaa gweer u xuanaaká. Inósuú kilá' yaahasaak, asma inós a heé úr. Inósuú kilá' ngi ooi.”

²² Xwayliteérós adoorí gana ó', asma i múk Yahudír da'ayuumít. Asma múk Yahudi gaa qaroó al'axweés gídaabá, hee bar Yesu ngwa ya/án, gídaabá inós a Kristo, heedaádá' ku baynitiis dír doó saaliingo.

²³ Gaarí an gár xwayliteérós isa ó', “Inósuú kilá' yaahasaak, asma inós a heé úr.”

²⁴ Múk Farisayo heedaáduú taampa kuri ateét sagaáwa tsare, tari oó', “Mungú xirfuú i haniseek. Atén a xuaán gídaabá heedaádá' a heé tlakusmo.”

²⁵ Heedaáduú taampa iri oó', “Adór tar tlakusmo, aníng a xuaaká. Aníng gár ni xuu' a tí, ‘Geeraawo aníng a taampa, nee hám daxta a xumiís.’”

²⁶ Tari oó', “Gár naa kuúng i tleéhh a milá? Nee adór ilaawók ngira gweér a adoomá?”

²⁷ Iri oó', “Aníng kuungá' naa qaroó ádbáw. Ahaá, kuungá' mas axmamisa'aaká? Mas malé axaasár wa sla'á'. Kuungá' sleeme a sla'á'a tawa eeharuuseerós tleehhita'?”

²⁸ Kuri niqimís tari oó', “Kuúng an eeharusmoó heesíng. Atén a eeharuusér Musa.

²⁹ Atén a xuaán gídaabá Mungú ina axweés nee Musa. Ala amór heesíng i dahhi a xuanaaká.”

³⁰ Heedaáduú taampa iri oó', “Gaarí a gár waa/oo/amo, bar kuungá' amór i dahhi a xua'aaká, nee inós ilaaeé' gina gweér.

³¹ A xuaán gídaabá Mungú múk tlakweemaá koóm gu iiár i qaminká. Ala heé Mungú ilaiwawaá/ nee sla'aarír Mungú ga tlehhiít, heé adoorí Mungú gu iiár i qaas.

³² Iimír iimu/úngw yaamuuwo kángw adoorí kwa axaasiiká gídaabá, hee ilaá taampa gaa gweér, barnaxes a taampa iimír kuwa laqwaali.

³³ Ala heewí bir amór Mungú dahhiiká, gár tleehhamooro geera i aleeslay i káhh.”

³⁴ Inooín tari oó', “Kuúng bartuna laqwaál baraá tlakweemaá wa ale, kuúng daxta atén adór tir intsaahhatimis a adoomá?” Kuri tsee/aá i duúx baraá doó saaliingo.

Taampu'uumár baraá qeeru

³⁵ Yesu gari axaás gídaabá heedaádá' kwa tsee/aá i duúx baraá doó saaliingo. Guri ár, iri oó', “Kuúng Garmoó Hee u haratlintatía?”

³⁶ Heedaádá iri oó', “A heemá, Aáko, as án nguwa haratlintii'.”

³⁷ Yesu iri oó', “Kuúng ugwa aán. Heé nee kuúng axweesá' hamí an inós.”

³⁸ Heedaádá' iri oó', “Án ugwa haratlintií', Aáko.” Guri i tumbarara'aát.

³⁹ Yesu iri oó', “Aníng nina hardáh baraaká' yaamu as kwasleema, as múk xumiisaaká iwa qaytsiti, nee múk xumiís i taampuuti.”

⁴⁰ Múk Farisayo bahh'alé, oo didaádá' i dirií', adoodá' ngiwa axaás, tari oó', “Ahaá, atén sleeme a taampúwo?”

⁴¹ Yesu iri oó', “Kuungá' geera bar taampu, geera alók a tlakweemaá koonda'aaká. Ala hám kuungá' a kata', ‘Atén a xumiisaán,’ ala gawaá adoorihe tlakweemaahúng i gawaahúng i kahhiyá'.”