Yohana 8 - Ya/abtór hho' 1977

/Ameenír tinda baraá fuqtá wa óh

¹ Umuú heewo iri waátl amór do'ós. Ala Yesu iri tláy amór tloomarka ta babay Miseituni.

² Looa niwa tleér Yesu iri malé dáh baraá Doó Mungú. Múk yaariír guri i daqáy. Yesu iri iwiít, giri intsaahhatimís.

³ Intsaahhatuusér hara'ayár Musa nee múk Farisayo /ameenirka kari huúw dír Yesu, ar tinda óh baraá fuqtá wa ale. Kari tla/ángw i qaás.

⁴ Yesu kuri báy, “Intsaahhatusúmo, /ameenirí ngaa baraá fuqtá wa oohaán.

⁵ Baraá hara'ayaro Musa ina oó', /ameenár adór tí, gár kas hariím a tlaqut ar tlaa/e. Ala kuúng ma kát?”

⁶ Yesu kuna adoorí báy as kuwa iiari, as /aymuú Yesu kur sakwasleemuuti kuwa slay. Yesu iri xupuú', iri gooín ar diitsarós yaamí alé.

⁷ Ala mukdá' iwa ak buúhh yaahamisuuwo, Yesu iri amor'ín i qaytsiít, giri báy, “Heé baraá tla/angwhunge tlakweemaá koomaaká, /ameenirí ngi geerí tsaxaari ar tlaa/ano.”

⁸ Yesu iri malé xupuú', iri gooín ar diitsarós yaamí alé.

⁹ Inooín /aymi'iidá' Yesu aa oó' kiwa axaás, muner'ín giri sakwasleemút. Tiri wakeetiné' ti'inango. Bariisee ina giiriín, sleémeero tay faakiís. Yesu kuna kilós geexáy, nee /ameenidá' i didá' wa sihhimamít.

¹⁰ Yesu iri qaytsiít, /ameenidá' gari báy, “Aáyo, mukdá' i amá? Heé kiíng iga sakwasleemuut i káhhi?”

¹¹ /Ameenidá' iri ó', “Aáko, i kaahh.” Yesu gari báy, “Tam aníng sleeme kiíng i sakwasleemuutaaká. Kiíng tláw, ala tlakweema mi malé tleehhaar.”]

Yesu a gwa/ateemaá yaamu

¹² Yesu iri malé oó', “Aníng a gwa/ateemaá yaamu. Heé aníng iga eehaar, i baraá giwtír kayká baloó alé, ala inós gwa/ateemaá slafiingw gi kón.”

¹³ Múk Farisayo iri oó', “Kuúng a kilók tin lamabu'uún. Lamabu'uungók oo loeeká.”

¹⁴ Yesu iri oó', “Aníng tam ti kilooeé' lamabu'uuma, lamabu'ungw'eé' oo ló', asma aníng amór ni daahh a xuú', nee amór ni kaw sleeme. Ala kuungá' a xua'aaká amór ni daahh laqaá tam amór ni kaw.

¹⁵ Kuungá' hee un sakwasleemutá' ar tlehhemi'iiwós kudá' ta ara'aanda'. Ala aníng hee u sakwasleemuutaaká.

¹⁶ Án tam sakwasleemuuta, sakwasleemar'eé' ar ló'. Asma aníng a kilooeeneeká. Ala a aníng nee kudá' aníng iga ya/aaw.

¹⁷ Slám baraá hara'ayarhunge kaa gooín gídaabá lamabu'úngw múk tsár a lamabu'úngw ló'.

¹⁸ Aníng tin kilooeé' lamabu'uúm, nee Baabuúeé' kudá' aníng iga ya/aaw, i lamabu'ún sleeme.”

¹⁹ Múk Farisayo iri oó', “Baabuúwók i amá?” Yesu iri oó', “Án kuungá' i xua'aaká. Tam Baabuúeé' sleeme u xua'aaká. Aníng bar geera iga xué', Baabuúeé' sleeme ugwa xué'.”

²⁰ Yesu axweesanaywí guna axweés qoomár iwa intsaahhatimisi baraá Doó Mungú wa ale, baraá matla/ángw ilahhooa. Ala heé Yesu ooharo gwa qiitl i kaahh, asma qoomaarós aa xeeriiká.

Amór án ni kaw, kuungá' i hardata'aaká

²¹ Yesu iri malé oó', “Aníng a quútl, ala án kuungá' iri leelehhitá', nee kuungá' a qatlá' baraá tlakweemaahúng i alé. Nee amoodá' án ni kaw, kuungá' hardahamu ngu aleesleera'aaká.”

²² Múk Yahudi iri oó', “Ahaá, tin kilós gaási, as adoodá' iwa kaahi, ‘Aníng a quútl, nee kuungá' hardahamuú amor'eé' u aleesleera'aaká.’”

²³ Yesu iri oó', “Kuungá' awa baraay, aníng oo gawa. Kuungá' awa yaamuuká', aníng oo yaamuukaeeká.

²⁴ Gaarí an gár kuungá' án nusa báw gídaabá, ‘Kuungá' a qatlá' baraá tlakweemaahúng i alé. Asma kuungá' barnaxes aníng iga haratlinti'ii'iiká gídaabá aníng an kudá', daqaní kuungá' aqo qatlá' baraá tlakweemaahúng i alé.’”

²⁵ Múk Yahudi iri oó', “Kuúng a heemá?” Yesu iri oó', “Aníng an kudaádá' taa geerí oó'.

²⁶ Aníng axweesanoó yaariír u koóm, nee sakwasleemár yaariir ngiwa kah daandeemoohunge. Kudá' aníng iga ya/aaw, inós a looeema. Nee aníng tidá' naa axaás dirós wa ale, an tí ni kah dír múk i alé.”

²⁷ Ala inooín kaa tsaahhiiká adór iidíguú Baabá ngur káh.

²⁸ Yesu iri oó', “Qoomár bar Garmoó Hee tleesár gawto ugwa hhe'esé', daqaní a tsahhá' gídaabá aníng an kudá'. Nee daqaní a tsahhá' gídaabá án gaa a kilooeé' tleehhaaká, ala adoodá' Baabá aníng ira intsaahhatís, an adoodá' ni axwees.

²⁹ Nee kudá' aníng iga ya/aaw, inós i dinkwa nee aníng. Aníng iga kilooeé' geexayká. Asma umuúqo deelooro tidá' inós gu sla'atimis an tlehhiít.”

³⁰ Yesu axweesanaywí nguwa axweés, múk yaariír guri haratlintií'.

Looeema nu gweeriyá'

³¹ Yesu múk Yahudi kudá' gwa haratlintii' guri báy, “Kuungá' bara kumité' axweesante'eé' eeharahaduwo, aga eeharuuser'eé' ar ló' tleehhité'.

³² Slám looeema i tsahhá', nee looeemaaká' nu gweeriyá' baraá lawaali'iimaro.”

³³ Tari oó', “Atén a xwaylár Abrahamu, slám aga lawaalér hee tleehhitaaniiká baloó alé. Kuúng mas kat, ‘Tundu gweer.’”

³⁴ Yesu giri báy, “Án a kah, umuúqo heé tlakweemaá tlehhahhiít, a lawaalmoó tlakweema.

³⁵ Nee lawaalmo deelo sleémeero do' gu hootiiká. Ala na/aay i doó hoot deelo sleémeero.

³⁶ Ala Garma burna gweér baraá lawaali'iimaro, tunda gweér kángw kilá' wa ale.

³⁷ Aníng a xuú', kuungá' a xwaylár Abrahamu. Aníng in leelehhitá' iwa gaasár wa sla'a', asma axweesante'eé' baraahunge i káhh.

³⁸ Tidá' án naa ár amór Baabá wa ale, an tidá' ni axwees. Nee tidá' kuungá' taa axasé' amór baabuúhúng wa ale, an tidá' ta tlehhita'.”

³⁹ Tari oó', “Baabuúrén a Abrahamu.” Yesu iri oó', “Kuungá' geera bar na/'aá Abrahamu, geera alók gadiyeérós aga tlehhé'.

⁴⁰ Tidá' ló' naa amór Mungú wa axaás, ngin kuungá' babáw, ala tam adoorihe kuungá' i gaasár wa sla'á'. Ala Abrahamu adoosíng gaa tleehhiiká.

⁴¹ Kuungá' gadiyér ta tlehha' ar baabuúhúng.” Tari oó', “Atén a xwaylár tsaatu'uumarooká. Atén Baabá u koomaán, an Mungú.”

⁴² Yesu iri oó', “Mungú geera bar baabuúhúng, án geera kuungá' iga slaé'. Asma án amór ni daahh a amór Mungú. Niri hardáh amoorí alé. Ala naa hardahiiká as sla'aarir'eé', ala án Mungú ina ya/aáw.

⁴³ Ala tí án ni kah mas tsatsahhaanda'aaká? Asma kuungá' axweesante'eé' iiár i qaasaro a aleesleera'aaká.

⁴⁴ Kuungá' amór ta dahha' a amór baabuúhúng, Neetlaangw, nee ilatleerír baabuúhúng an tidá' ta sla'a' tlehhmuuwo. Inós a tsu/utusmo iimír iimu/uungo, tam aa sihhiitiiká baraá looeemá i alé, asma looeema baraawose i kahhiyá'. Bir lamtá axwees, a tós kilós gan axwees, asma inós a lamusmo nee a baabuú lama.

⁴⁵ Ala aníng looeema in káh, an gár án kuungá' is haratlintatia'aaká.

⁴⁶ Heé baraá tla/angwhunge tlakweemaaeé' ngi laqaám a heemá? Nee aníng bar tidá' ar looeema ngi káh, kuungá' mas ya/a/aanda'aaká?

⁴⁷ Heé Mungú axweesantá Mungú gaa iiár i qamín. Ala kuungá' a axamisa'aaká, asma kuungá' a múk Munguheeká.”

Yesu nee Abrahamu

⁴⁸ Múk Yahudi iri oó', “Ahaá, atén ar ló' aga ooániíke, tawa ooaán gídaabá kuúng a heé Samaria, nee gídaabá a neetlaamér koón.”

⁴⁹ Yesu iri oó', “Aníng a neetlaamér koomaaká. Ala aníng Baabuúeé' un ilaiwawaá/. Ala kuungá' aníng i ilaiwawa/a'aaká.

⁵⁰ Slám aníng ti xirfuú i leelehhiitaaká. Ala oo wák i deer oo aníng u xirfuú i leelehhiít, nee inós an kudá' sakwasleema ga tleéhh.

⁵¹ Án a kah, hee bar axweesante'eé' gaa óh, i baloó gwaaiiká.”

⁵² Múk Yahudi iri oó', “Daxta aga tsaahhaán adór kuúng tar neetlaamér koón. Abrahamu aa gwaá', aaruuse aa qátl, ala kuúng a kat, ‘Hee bar axweesante'eé' gaa óh, i baloó gwaaiiká.’

⁵³ Baabuúrén Abrahamu aa gwaá'. Inós kuúng u bá/a? Nee aaruuse sleeme aa qátl. Kuúng heé tir slaqamiimis a heemá?”

⁵⁴ Yesu iri oó', “Án kilooeé' birti xirfayeemiís, xirfuueé' a gaarooká. Án baabuúeé' i xirfayeemiis, inós an kudá' kuungá' tawa kata', ‘A Mungúrén.’

⁵⁵ Kuungá' ugwa xui'iiká, ala aníng u xuú'. Barnaxes aga oó' u xuaaká, aníng a lamusmo tleehhiít adór kuungá' wa ale. Ala án u xuú', nee axweesantós aga óh.

⁵⁶ Abrahamu, baabuúhúng, ina baraá/ asma deelor'eé' ngiwa ari. Inós gay ár, iri qwalalaá/.”

⁵⁷ Múk Yahudi iri oó', “Kuúng kureeraá mibeeraá kooán iga eeriiká, kuúng Abrahamu uga qo aándi?”

⁵⁸ Yesu iri oó', “Án a kah, iimír Abrahamu kuwa laqwaliiká, aníng a qaroó daadeer.”

⁵⁹ Inooín tlaa/e kiri sleemiís as kuwa tlaquuti. Ala Yesu iri nahhaát, iri ti'iít baraá Doó Munguhe.