Yohana 7 - Ya/abtór hho' 1977

Yesu nee hhaeewós

¹ Aluudaádae Yesu ina hi'iimiít baraá yaamaá Galilayár wa ale, asma gaa slaiiká iwa hi'iimiiti baraá yaamaá Yudeár wa ale, asma múk Yahudi i inós leelehhiit, as kuwa gaasár wa slai.

² Deelór ur ar múk Yahudi, deeloodá' ur ar Isleeri, qoomaadae aa naká/.

³ Hhaeewós nguri bayé', “Quútl diirihe, tláw baraá Yudea, as eeharuuseerók tlehhemi'iiwók kudá' ta tlehhahhit, ngiwa ariya'.

⁴ Hee barnaxes ti xu'utisár wa slaa', tlehhemi'iiwós gi tleehhiiká ar naaqo. Kuúng bar tlehhemi'iiká' tlehhít, ti laqaan dír múk baraaká' yaamu, kuúng u kilá'.”

⁵ Asma tam hhaeewós awa kilá' Yesu ngwa haratlinti'ii'iiká.

⁶ Yesu iri oó', “Qoomar'eé' naa xeeriiká, ala qoomarhúng i deer deelo sleémeerowo.

⁷ Múk aa haratlintii'iiká kuungá' nu aahhiiká, ala aníng iga aáhh. Asma án inooín in babaw gídaabá tlehhemi'ii'ín ki tlakw.

⁸ Kuungá' tsa/amé', deeloorí ur awaak. Aníng deeloorí ur a awaaká hamihe, asma qoomar'eé' aa xeeriiká.”

⁹ Axweesanaywí ooaro nguwa hhe'eés, inós iri Galilayár i meét.

Deelór ur ar Isleeri

¹⁰ Ala hhaeewós niwa tlayé' as tawa deelór úr ay, inós sleeme iri daqáy, taa geehhoutisiiká, ala ar naaqo.

¹¹ Múk Yahudi Yesu kuri leelehhiít baraá deeloodá' ure, tari oó', “Heedaádá' i amá?”

¹² Múk yaariír iri qununuú/ baraá boo/aydae daanduú Yesuwo. Bahh'alé tari oó', “A heé hhoó'.” Bahh'alé ta kaahi, “Aasla'áy, in múk al/agín.”

¹³ Ala heé gwa daanda axwees ar geehhoeema i kaahh, asma ta múk Yahúdír da'ayuumiit.

¹⁴ Qoomár tawa tla/aaohú deelór úr i dirii'i, Yesu iri dáh baraá Doó Mungú, iri intsaahhatimís.

¹⁵ Múk Yahudi tari waa/oo/amín tari oó', “Heewí sagalooár adór tí adór ngira sláy, inós bira soomuusiiká?”

¹⁶ Yesu iri oó', “Intsaahhasar'eé' a te'eeneeká, a ar kudá' aníng iga ya/aaw.

¹⁷ Hee barnaxes sla'aarír kudá' aníng iga ya/aaw, gaa ya/án tleehhamooro, iidíguú intsaahhastadá' daqaní gu tsaahh, gídaabá amór i dahh a amór Mungúhe, laqaá a án kilooeé' an axweés.

¹⁸ Heé sagós ar axweés, xirfuú i leelehhiiti a kós kilós. Ala heé xirfuú kudá' inós ngwa ya/aaw gu leelehhiít, heedá' a heé ló', nee baraawose al/ayma i káhh.

¹⁹ Ahaá, Musa hara'aya ngaa dirhúng i haniísiíke? Nee baraahunge tam heé wák oo hara'aya gaa boo/ees i kaahh. Ala kuungá' aníng mihar gaasár wa sla'a'?”

²⁰ Boo/aydá' iri oó', “Ahaá, kuúng a neetlaamér koónda? Ahaá, heé kuúng u gaasár wa slaá' a heemá?”

²¹ Yesu iri oó', “Aníng /aymuú wák oo waa/oo/amo una tleéhh, kuungá' sleémeero tari waa/oo/é'.

²² Musa hara'ayár al/utlo ngina haniís, ala a gídaabaheeká hara'ayaarí in amór Musá dáhh, ala a amór baabi'i. Nee kuungá' tam bál deelór hungu/umaawo hee u al/utlá'.

²³ Ala hee bir harín al/utlooro bál deelór hungu/umaawo, as hara'ayár Musa makawa geeqáy, ala án kuungá' adór ir i buhhaabuhha' a adoomá, aníng bar hee una hungu/uús bál deelór hungu/umaawo.

²⁴ Muu mu sakwasleemuutara' ar barqaanti, ala sakwasleema naa tlehhitaak ar loohír ganaa'.”

Heewí a Krístówo?

²⁵ Múk Yerusalemu bahh'alé tari oó', “Ahaá, heewí a kudá' ta leelehhiítiíke, as kuwa gaasár wa slai?

²⁶ U ga/eéraáke, i axwees ar geehhoeema, ala inooín gár ku babay i káhh. Dooqa mukwí urén gaa xuú' gídaabá, a ló', heewí a Krísto.

²⁷ Ala heewí atén u xuaán amór i dahhi. Ala Kristo bál bindi hardah, amór i dahhi heé ga xuú' i kaahh.”

²⁸ Yesu iri tseé' ar afór ur baraá Doó Mungú wa ale iwa intsaahhatimisi, iri oó', “Án kuungá' i xuá', nee amoodá' ni daahh a xuá' sleeme. Ala án naa hardahiiká as sla'aarir'eé'. Kudá' aníng iga ya/aaw, inós a looeema, slám kuungá' inós u xua'aaká.

²⁹ Inós aníng u xuú' asma aníng a amoorós daáhh. Inós an kudá' aníng iga ya/aaw.”

³⁰ Gawaá adoorihe kuri oohár wa slaá', ala heé gwa oh i kaahh, asma qoomaarós aa xeeriiká.

³¹ Ala múk yaariír baraá boo/aydae Yesu guri haratlintií' tari oó', “Ahaá, Krísto bál bindi hardah, layár yaariir ar tír heewí ga baa/ ga tleéhhi?”

Yesu i quutlmaawós alki/iit

³² Múk Farisayo boo/aay guri axaás adór ira qununuú/ daanduuwose. Inooín nee geeraharuusér uren ar saalíngw múk Yahudi askaári kari ya/aáw as Yesu kuwa oohi.

³³ Yesu iri oó', “Har qoomár niinawe án nee kuungá' a dinkwa. Aluuwo aníng a tláw amór kudaádá' aníng iga ya/aaw.

³⁴ Aníng kuungá' i leelehhá', ala i sleera'aaká, slám aníng didaádá' ni dirii', kuungá' hardahamu u aleesleera'aaká.”

³⁵ Múk Yahudi tiri kilooín yaahamiisiyé', “Heewí amór i kay a amá, diirí atén kuwa araanaaká a diimá? Amór i kay a amór múk Yahudi kudá' aa diyaa/áti amór múk xoordaá hatlá', nee giri intsaahhatimísi?

³⁶ /Aymuuwí i kaahi gídaabárós a milá? Kí iwa kaahi, ‘Aníng kuungá' i leelehhá', ala i sleera'aaká, slám aníng didaádá' ni dirii', kuungá' hardahamu u aleesleera'aaká.’”

Ma'aá slafíngw koomá'

³⁷ Baraá deeloodá' ure, deeloodár alhhe'eesaay an deeloodá' ak ur. Baldae Yesu ina sihhiít iri tseé' ar afór ur iri oó', “Hee bira waxiít, ni amor'eé' hardahi, as iwa wahi.

³⁸ Asma Gooi i kat, ‘Heé aníng iga haratlintii', yau awa ma'aá slafíngw koomá' i baraawós wa ti'iitiyá'.’”

³⁹ Yesu axweesanaywí guna axweés daanduú Qeeruú hhoohhoó', kudá' ta haniisi dír mukdá' sleémeero oo inós gwa haratlintii'. Qeeru naa hardahiiká qoomaadae, asma qoomaadae Yesu xirfuuwós gwa slayká.

Muu tina partliít daanduú Yesuwo

⁴⁰ Muu bahh'alé baraá boo/aydae /aymi'iiká' kiwa axaás, tari oó', “Ar ló', heewí a aarusmoodá'.”

⁴¹ Bahh'alé tari oó', “Heewí a Kristo.” Ala bahh'alé tari oó' sleeme, “Ahaá, Kristo i Galiláyár dáhhi?

⁴² Gooi baré i kat gídaabá, Kristo i ti'iit baraá xwaylár Daudí wa ale, nee amór ni dahhi a amór Betilehemu, gixsadá' Daudi iwa hoót.”

⁴³ Ala gawaá adoorihe boo/aydá' tiri partliít as daanduú Yesú wa ale.

⁴⁴ Bahh'alé baraá boo/aydae Yesu kuri oohár wa slaá', ala heé gwa oh i kaahh.

Geeraharuusér múk Yahudi i haratlintaaór koondaaká

⁴⁵ Askaáridá' taa ya/aáw, iri hardát dír geeraharuusér uren ar saalíngw múk Yahudi nee múk Farisayo. Inooín tari oó', “Ahaá, gaálay ngwa hube'?”

⁴⁶ Askaáridá' iri ó', “Heé aa adór heedaádár axwees i kaahh tam looár wake.”

⁴⁷ Múk Farisayo iri oó', “Kuungá' sleeme tunda al/áyi?

⁴⁸ Baraá múk urén nee múk Farisayowo heé gwa haratlintii' a heemá?

⁴⁹ Ala boo/aywí hara'aya ga xuaaká, kwa qaroó lu'ús.”

⁵⁰ Nikodemu a heé wák baraá tla/angw'ine. Inós a kudá' Yesu gwa i daqay looár wake, qoomár xweeraawo. Inós giri báy,

⁵¹ “Ahaá, hara'ayarén hee gu sakwasleemúta, barnaxes axweesantós kaa axaasiiká geerí alé, nee barnaxes kaa xuiiká tidá' aa tleéhh?”

⁵² Inooín tari oó', “Kuúng sleeme kár amór ni dahh a Galiláyáro? Áx leelehheek baraá Gooiro gídaabá aarusmoó Galiláyár wa ti'iít i deéro?”