Yohana 6 - Ya/abtór hho' 1977

/Aymisír múk kumér kooán

¹ Aluuwo Yesu iri tláy iri waaraáhh amór gayuú tlawtá Galilaya, ar ta babay tlawtá Tiberia.

² Boo/oó úr oo muu Yesu gway eehaár, asma muruú taa ár, oo Yesu aa tleéhh dír tiqtuusér i alé.

³ Yesu iri tsa/án gawaá tloomár i alé, nee eeharuuseerós tari dinkwár i iwiít.

⁴ Ala Pasaáka, deelór ur ar múk Yahudi, naa tseewuúr.

⁵ Yesu iri qaytsiít, boo/oó úr oo muu guna ár, oo inós gwa eehaar. Yesu iri oó' dír Filipo, “Mikaátér mukwí i /ayi, dír kawa tlaxwaan a diimá?”

⁶ Adoorí gana oó' as nguwa iiari, ala inós gár i tleehhamór wa slai ga xuu'.

⁷ Filipo iri oó', “Mikaátér har shilíngi tsirér tsár sleeme i bu'utaká, tam ka dir'ín i niinaweemisi.”

⁸ Eeharusmoowós oo hatlá', Andrea, hhiyoó Simoni Petro, iri oó',

⁹ “Garmaako niiná diirihe i deer. Inós mikaátér kooán ga kón, ar taa tleéhh ar puuruú shayíri, nee siyoó tsár. Ala tí gár i bu' a milá dír múk yaariír kwihe?”

¹⁰ Yesu iri oó', “Muu iwiitisaak yaamí ale.” Didaádae gitsór yaariir i deer. Muu iri iwiít, hhawaate kilooín faaror'ín a har kume kooán.

¹¹ Aluuwo Yesu mikaáteedá' gari óh, Mungú guri sluufiís, gari qasmiís dír mukdá' aa iwiit. Tam siyó sleeme aqo guna adoodá' laáq, ar qoomoó inooín taa slai.

¹² Tam qoomár tawa aáx, Yesu eeharuuseerós gari báy, “Parhheemoodá' naa meetiye' burumburaak, tam parhhamtá wák miwa qwát.”

¹³ Parhheemaá naa meetiye' kiri burumbuúr, kudá' mukdá' aa /ayin aa meetiís gawaá mikaátér kooán wa ale ar puuruú shayíri, katatoó miba nee tsár nguri hatsiisiyé'.

¹⁴ Nee muu waa/oo/amoodá' Yesu aa tleéhh ngiwa ár, tari oó', “Aarusmoodá' ni baraá yaamí hardáh a kwí tsuwá alé.”

¹⁵ Yesu gari tsaáhh ar gídaabá inooín ku oohár wa slaa' ar /uuru, kuwa waawutmooín tleehhi. Inós adoodá' ngiwa tsaáhh, tina paraátl dir'ine, iri tsa/án gawaá tlooma malé alé, inós kilós.

Yesu i ya'aár hi'imiit gawaá daanduú tlawtá wa ale

¹⁶ Tsiindo niwa xayé', eeharuuseerós iri awét ay afaá tlawi.

¹⁷ Tari tsa/án gawaá miringamo, tlawtidá' kay waraáhh as tawa waaraahhi ay Kapernaumu. Nee qoomaadaádae iimi aa gíp, slám Yesu aa dir'ín i hardahiiká.

¹⁸ Tlawi iri leexwandút, asma fur'ár yaariir i deer.

¹⁹ Tawa geerí kumiít har qoomár kilomeétár kooán laqaá lahhoó', Yesu kuri ár, naxés i hii'imiit gawaá tlawtá wa ale, dír miringamoodá' gaa haranakaá/. Tari da'ayuút.

²⁰ Yesu iri oó', “Hee a aníng. Ma da'ayumitaara'.”

²¹ Nee kuri ilaoohár wa slaá' baraá miringamoó har alé. Nee qoomaadár kilae miringamoó aáng iri hardáh afaá tsee/a amoodá' ta kay.

Múk Yésú leelehhiít

²² Looitleérós boo/oó muu iri gayuuqá' wa sihhiít amoodá' eeharuusee i dahh. Inooín ka xuu' adór miringamoó hatlá' ir kaáhh, aqo har kudá' wák. Slám Yesu nee eeharuuseerós taa al dahiiká baraá miringamoodá' i alé, ala eeharuuseerós iwa waaráhh a kilooín.

²³ Ala miringér hatlá' ar Tiberiár daahh niri hardát didá' mikaáte kawa /aáy qoomár Aako iwa sluufiís.

²⁴ Boo/aydá' ngiwa ár gídaabá Yesu i kaahh didaádae, tam eeharuuseerós, inooína kilá' tari dáh baraá miringe, tari tláy ay Kapernaumu as Yesu kuwa leelehhiiti.

Yesu a mikaátér slafiingw

²⁵ Kuri amoodá' wa ár kuri báy, “Intsaahhatusúmo, xaylá kuúng naa amoorí hardát?”

²⁶ Yesu iri oó', “Án a kah, án kuungá' gár is leelehhita' a layaadaeeká, tidá' taa aandé', ala gár is leelehhita' a mikaáteedá' taa /agé', tay axé'.

²⁷ Muruú /aymaadá' hhitiruút mu sagadiyuusara', ala kudá' hhitiruutaaká oo slafíngw alhhe'eesay wásl ngu huúw na sagadiyuusaak. Muruú /aymaarí Garmoó Hee ngu kuungá' i haniis. Asma Mungú Baabá inós gwa ya/án, guri aleesleemuuwós i haniís.”

²⁸ Tari oó', “Ala adór ta laqaan a adoomá, as gadiyér Mungú kawa tleehhaan?”

²⁹ Yesu iri oó', “Gadiyér Mungú a tí, ‘Kudá' inós naa ya/aáw, haratlintiaak.’”

³⁰ Tari oó', “Layár kuúng ta tlehh a gaalá? Atén i laqaamang, as atén kawa araan, nee kuúng uri haratlintiaán. Gadiyér kuúng ta tlehh a milá?

³¹ Baabi'iirén maána ngina /ayiyé', baraá xanxáy wa ale, adoodá' kara gooín, ‘Mikaátér dooraá daahh gana haniís as ngiwa /ayiya'.’”

³² Yesu iri oó', “Án a kah, Musa mikaátér dooraá daahh ngaa haniisiiká, ala a Baabuúeé' mikaátér ló' ar dooraá daahh, ngin hanimiis dirhúng i alé.

³³ Asma mikaátér Mungú a tidá' awdiit gawaá doorí wa ale, nee muu guri slafíngw i hanís.”

³⁴ Tari oó', “Aáko, mikaáteesíng umuúqo deelooro hanimiisang.”

³⁵ Yesu iri oó', “Aníng an mikaátér slafíngw huwaahuuw dír heewo. Heé amor'eé' hardáh, i baloó qwariitiiká. Slám heé aníng iga haratlintii', i baloó waxiitiiká sleeme.

³⁶ Ala án kuungá' nuna qaroó báw, án kuungá' iga aandé', ala i haratlintatia'aaká.

³⁷ Kudá' sleémeero Baabá naa aníng i haniís, i amor'eé' hardahiyá'. Slám umuúqo heewo oo amor'eé' hardáh, u baloó tsee/aá i kwahhaaká.

³⁸ Asma aníng naa aweeriiká gawaá doorí wa ale tidá' án ni slaa' ngiwa tleehh, ala a sla'aarirós kudá' aníng iga ya/aaw ngiwa tleehh.

³⁹ Kudá' aníng iga ya/aaw gár i slai a tí, ‘Aníng tam heé wák muwa qwaareés baraá kudá' sleémeero awa naa aníng i hanmiisi, ala masók un waaslee/atís bál deelór alhhe'eesaywo.’

⁴⁰ Asma Baabuúeé' gár i slai a tí, ‘Umuúqo heewo oo Garma gwa i qaytsiit, nee guri haratlintii', masók slafíngw alhhe'eesay wásl gu kón. Nee aníng nguri waaslee/atís bál deelór alhhe'eesaywo.’”

⁴¹ Múk Yahudi iri qununuú/, tari oó', “Ahaá, mis kaahi, ‘Aníng a mikaáteedá' naa gawaá doorí wa awet.’”

⁴² Tari oó', “Ahaá, inós a Yesúwoóke, garmoó Yosefu. Slám baabuúwós nee aayoorós a kudá' ni xuaánaáke? Ahaá, mis kaahi, ‘Aníng nina gawaá doorí wa aweér.’”

⁴³ Yesu iri oó', “Ma kiloohúng qununu/aara'.

⁴⁴ Heé hardahamuú amor'eé' gu aleesláw i kaahh, barnaxes kunga uruuxiiká nee Baabuúdá' aníng iga ya/aaw. Nee aníng nguri waasle/atís bál deelór alhhe'eesaywo.

⁴⁵ Kaa gooín baraá gooír aaruuseero gídaabá, ‘Muu sleémeero ku intsaahhatis nee Mungú.’ Gawaá adoorihe, umuúqo heewo oo Baabá gwa axaas, nee gari intsatsaahh amoorós wa ale, i amor'eé' hardah.

⁴⁶ A gídaabaheeká hee Baabá guna ár. Ala heé Baabá gwa ar, a kudá' amór Mungú daáhh. Kwí an kudá' Baabá ngwa ar.

⁴⁷ Án a kah, heé aníng iga haratlintii', i slafíngw alhhe'eesay wásl kón.

⁴⁸ Aníng a mikaátér slafíngw huwaahuuw dír heewo.

⁴⁹ Baabi'iihúng maána kana /aáy, baraá xanxáy wa ale, ala qatlo kaa mayká.

⁵⁰ Ala tí an mikaáteedár naa gawaá doorí wa awet. Hee bar ngaa /aáy i baloó gwaiiká.

⁵¹ Aníng an mikaáteedá' slafíngw koom, tidá' naa awet gawaá doorí wa ale. Hee bar mikaáteerí ngaa /aáy, i slafaafín ay alhhe'eesay wasle. Nee mikaáteerí án ni haniis a slaqwte'eé' ar kilá', as muu slafiingw nguwa slay.”

⁵² Múk Yahudi tari kilooín kaangaanuús tari oó', “Ahaá, heewí adór slaqwtós ngir atén i haniisi a adoomá kawa /ayaan?”

⁵³ Yesu iri oó', “Án a kah, kuungá' barnaxes slaqwtá Garmoó Hee aga /agi'iiká, nee tseereerós aga wati'iiká, kuungá' slafiingw i kaahh baraahunge.

⁵⁴ Heé slaqwte'eé' ga /aáy, nee oo tseerer'eé' ga wáh, slafíngw alhhe'eesay wásl gu kón. Nee án u waasle/atís bál deelór alhhe'eesaywo.

⁵⁵ Asma slaqwte'eé' a mikaáteedár ló', nee tseerer'eé' a wahtadár ló'.

⁵⁶ Heé slaqwte'eé' ga /aáy, nee heé tseerer'eé' ga wáh, inós i baraaeé' wa hoot, nee aníng a baraawós wa hoót.

⁵⁷ Asma adoodá' Baabuúeé' kudá' slaáf aníng ira ya/aáw, nee aníng a slaáf as Baabá, heé aníng iga /aay i slaaf sleeme as aníng.

⁵⁸ Tí an mikaáteedá' naa gawaá doorí wa awet. Mikaáteerí nee tidá' baabi'iihúng naa /ayiyé' a wakeeká. Asma inooín tam mikaáteedá' kaa /ayi, ala qatlo kaa mayká. Ala heé mikaáteerí ga /aáy i slaaf ay alhhe'eesay wasle.”

⁵⁹ Yesu axweesanaywí guna baraá doó saalíngw wa axweés, qoomár iwa intsaahhatimís amór Kapernaumú wa ale.

Axweesantá slafíngw alhhe'eesay wásl

⁶⁰ Múk yaariír baraá tla/ángw eeharuusér Yesuwo axweesanaydá' kuwa axaás, tari oó', “/Aymuuwí ku gawít, heé ya/aamaro gu aleesláw a heemá?”

⁶¹ Yesu gari tsaáhh baraá muunuúwose gídaabá, eeharuuse /aymuudá' gu qununú/, iri oó', “/Aymuuwí i dukutsumoó tleehhimíti dirhunge?

⁶² Ala a adoomá bál Garmoó Hee bura aandé', bir tsa/a/án amoodá' geera i dahhi?

⁶³ Qeeru an kudá' slafíngw hanmiís, slaqwa gár i bu' i káhh. /Aymi'iiká' naa kuungá' i oó' a qeeru, slám a slafiingw.

⁶⁴ Ala baraá tla/angwhunge muu i deer oo aa haratlinti'iiká.” Asma Yesu mukdá' gwa haratlinti'iiká gu qaroó geerí xuu', tam heedaádá' gu sakií/ sleeme.

⁶⁵ Yesu iri oó', “Gawaá adoorihe gaarí an gár án kuungá' nusa báw gídaabá, ‘Hee i kaahh oo hardahamuú amor'eé' gu aleesláw burkwa aleesleemuú i haniisiiká nee Baabuúeé'.’”

⁶⁶ Iimír qoomaadae múk yaariír baraá eeharuuseerose iri alí kií/, Yesu kwa sangw eehariiká.

⁶⁷ Yesu iri oó' dír eeharuuseerós tidá' miba nee tsár, “Xáy, kuungá' sleeme aníng i geexeemuú wa sla'á'a?”

⁶⁸ Simoni Petro iri oó', “Aáko, amór ta kawaan a amór heemá? Asma kuúng a axweesantá slafíngw alhhe'eesay wásl koón.

⁶⁹ Atén aga haratlintiaán, slám aga xuaán adór kuúng tar Kudá' hhoohhoó' oo Mungú.”

⁷⁰ Yesu iri oó', “Xáy, án kuungaásingá' mibá nee tsár naa tsawaáriíke? Nee oo wák baraahunge a neetlaangw.”

⁷¹ Gawaá axweesantihe daanduú Yuda guna axweés, garmoó Simoni Iskariote, asma inós an kudá' gu sakií/, nee inós an heé wák baraá eeharuuseedá' mibá nee tsare.