Yohana 5 - Ya/abtór hho' 1977

Tiqtuusér dír tlahhasár Betesta

¹ Aluudae deelór ur ar múk Yahudi nay hardát. Yesu inós sleeme iri tsa/án ay Yerusalemu.

² Nee amoodár Yerusalemuro dír afkuko ta babay afkuú Bee/aangw, tlahhasár ma'aay i deer. Tsifrír múk Ebraniaro a Betesta. Nee dír tlahhasaadae isleeraá kooán i dayá'.

³ Baraá isleeridae boo/oó yaariír oo tiqtuuse aa qaqataatín, taampu, taqooraay nee múk aa sol'omiit, [ta ma'aá daamaarán iwa dahhiya'.

⁴ Asma siiwarkaaro malaykamoó Aako nin awdaadiit, iri baraá tlahhasadá' i dah, ma'aydá' giri xwaraanxwaar. Nee heé aa giirin baraá ma'aydá' i /etaango, tiqtirós tidá' i kon in hungú/.]

⁵ Nee didaádae heeko i deer, oo tiqaaqiím kureeri mibeeri tám nee dakaát.

⁶ Yesu heewí guri ár i gawaá hhaftuuwós i dirii'. Nee gari xuú' gídaabá inós i tiqaaqín deelór yaarire, iri oó', “A slá'a tawa hungu/?”

⁷ Tiqtusmoodá' iri oó', “Aáko, aníng hee u koomaaká oo i /aytiís baraá tlahhasaár i aleeró, qoomár ma'aay birka xwaraanxwaár. Ala qoomár án bar adoorí wa mak /eét, heé hatlá' aa geeraaeé' wa /eét.”

⁸ Yesu iri oó', “Sihhiít, hhaftuuwók gagaareek, tláw.”

⁹ Hamtidár kilae heedaádá' iri hunguú/, hhaftuuwós guri gagaár, iri tláy. Nee deeloodá' a deelór hungu/uma.

¹⁰ Múk Yahudi heedá' taa hungu/uús kuri báy, “Laarí a deelór hungu/uma, i hariindaaká kuúng tawa hhaftuú gagariin.”

¹¹ Heedaádá' taa hungu/uús iri oó', “Heedá' aníng iga hungu/uus, aníng ina báy, ‘Hhaftuuwók gagaareek, tláw.’”

¹² Kuri yaahaás, “Heesíng kuúng ugwa bay, ‘Hhaftuuwók gagaareek, tláw,’ a heemá?”

¹³ Ala heedaádá' inós gwa hungu/uus umuuwós gu xuiiká'. Asma Yesu qoomaadae taa paraátl, asma didaádae muu qoomaadae ku úr.

¹⁴ Aluudae heedaádá' taa hungu/uús kuri harasliqiít nee Yesu baraá Doó Mungú i alé. Yesu iri oó', “Qaytsiít, kuúng hamí aga hungú/. Tlakweema mi malé tleehhaar, as gár tlaakw ar adór tidá' ba/a muwa sleér.”

¹⁵ Heedaádá' iri tláy, múk Yahudi guri xu'utisár áy gídaabá, “Heedaádá' aníng iga hungu/uus a Yesu.”

¹⁶ Gawaá adoorihe múk Yahudi Yesu kuri slahhe'eemisuú wa slaá', asma adoodá' aa tleéhh bál deelór hungu/umaawo.

¹⁷ Yesu iri oó', “Baabuúeé' i gadiyuus tam hamí, nee aníng sleeme an gadiyuús.”

¹⁸ Gawaá adoorihe múk Yahudi loohi kari ak leelehhiít ar Yesu kur gaasi. As gídaabaheeká hara'ayár deelór hungu/uma gana geeqáy kilós, ala as adoodá' sleeme Mungú nguwa Baabuúwós ar ateetín, tiwa Mungúr qoomeemeesi.

Aleesleemuú Garma i kon

¹⁹ Yesu iri oó', “Án a kah, Garma gár tleehharo kilós i aleeslay i káhh, aqo har tidá' Baabá i tlehhiiti gan tleehh. Asma tidá' sleémeero Baabá i tlehhiiti an tidá' Garma i tlehhiiti.

²⁰ Baabá Garma gu slaa'. Nee tidá' sleémeero inósuú kilá' i tlehhiiti gan laqaaqán. Tam gadiyér ak ur tidá' ba/a gan laqán, as kuungá' tawa waa/o/a'.

²¹ Asma adoodá' Baabá tu'u ngir waaslee/atimisi nee ngir slafimisi, Garma sleeme mukdá' inós aa tsawaár, gun slafimis.

²² Slám Baabá heé i sakwasleemuuti i kaahh. Asma sakwasleema sleémeero gaa Garmá i haniís,

²³ as muu sleémeero Garma nguwa ilaiwawa/i, adoodá' Baabá kur ilaiwawa/i. Heé Garma gu ilaiwawa/aaká, Baabá sleeme gu ilaiwawa/iiká, kudá' Garma ngwa ya/aaw.

²⁴ “Án a kah, heé axweesante'eé' ga axamiís, nee kudaádá' aníng iga ya/aaw guri haratlintii', slafíngw alhhe'eesay wásl gu kón, slám i dahiiká baraá sakwasleema. Aa waaraáhh ar baraá gwa'ara, iri dáh baraá slafiingw.

²⁵ Án a kah, qooma ni hardát, nee hám naa hardát, ar tu'u afór Garmoó Hee ngiwa axaasiya', nee kudá' afoo ngaa axaasiye' tari waaslee/.

²⁶ Asma adoodá' Baabá ir slafíngw kon, nee Garma sleeme gwa slafíngw i haniís.

²⁷ Slám aleesleemuú sakwasleema gwa amoorós i haniís asma tawa Garmoó Hee.

²⁸ Axweesanaywí mu waa/oo/amiimara', asma qooma naa hardát ar muu sleémeero, kuduú baraá /aantu, afór Garmoó Hee kawa axaasi.

²⁹ Nee inooín tindiri ti'iit. Mukdá' tlehhema'aá hho' gaa tleehh, kun waasle/atis tari dah baraá slafiingw, ala mukdá' tlehhema'aá tlakw gaa tleehh, kun waasle/atis kuri sakwasleemuut.”

Lamabu'uusér Yesu

³⁰ “Aníng gár ni kilooeé' tleehh i káhh. Aníng an sakwasleemuút ar adoodá' Baabá naa oó'. Nee sakwasleemar'eé' i ganá', asma aníng sla'aarir'eé' a leelehhiitaaká, ala ar Baabá, kudá' aníng iga ya/aaw.

³¹ “Án birti kilooeé' lamabu'uúm, lamabu'ungw'eé' oo loeeká.

³² Oo hatlá' i deer oo aníng i lamabu'uúm. Nee aníng a xuú' gídaabá, lamabu'uungós kudá' aníng iwa lamabu'un oo ló'.

³³ Kuungá' muu una ya/abé' amór Yohana, nee inós looeema giri lamabu'ún.

³⁴ Ala aníng lamabu'úngw muu u ilaohiimaaká. Tí ngin alki/iít dirhúng i alé as kuungá' tawa ba/aanda'.

³⁵ Yohana inós a tsaa'asi tidá' tsaa'amiis nee ar gwa/aat. Nee kuungá' gwa/ateemaadá' ina slaé', nee kay sa qwalala/é' ar har qoomár niina.

³⁶ Ala lamabu'úngw án ni koom ku ak úr ta kuduú Yohanuwo. Asma gadiyeédár Baabuúeé' naa haniís ngiwa alhhe'ees. Nee gadiyeédár kilá' án ni tleehh, aníng i lamabu'uún sleeme gídaabá aníng Baabá iga ya/aáw.

³⁷ Slám Baabuúdá' aníng iga ya/aaw, aníng iga lamabu'ún. Kuungá' afoorós ar kilá' qoomár kawa axasé' i káhh, slám slaqsaywós ugwa aandi'iiká.

³⁸ Nee ala axweesantós i baraahúng wa hotká. Asma kuungá' kudá' tinda ya/aáw u haratlintatia'aaká.

³⁹ Kuungá' tidá' taa gooín baraá Gooiro a mak tsee/ariindá', asma kawa xua', gídaabá kuungá' slafíngw alhhe'eesay wásl u koondá' baraawose. Nee Gooisíng an tidá' aníng i lamabu'uum.

⁴⁰ Ala kuungá' a sla'a'aaká niwa amor'eé' hardata' as slafiingw kuwa sleera'.

⁴¹ “Aníng xirfuú amór múk daáhh u ilaohiimaaká.

⁴² Ala án kuungá' naa tsaáhh gídaabá kuungá' Mungú u sla'a'aaká.

⁴³ Aníng nina hardáh ar umuú Baabuúeé'. Ala án kuungá' i ilaohiinda'aaká. Heé hatlá' bar naa hardáh ar umuuwós, kuungá' heedá' u ilaotá'.

⁴⁴ Kuungá' haratlintaaooro adór kar aleesleera' a adoomá, kuungaásingá' ti kiloohúng xirfayeemisá'. Nee xirfuudá' amór Mungú kudá' wák daáhh kuungá' u leelehhita'aaká.

⁴⁵ Ma kaahara' gídaabá aníng kuungá' nun sakwasleemuút dír Baabahe. Heé kuungá' nu sakwasleemuút i deer. An Musa, kudá' kuungá' taa haraxua'.

⁴⁶ Asma kuungá' geera Musa bura haratlintié', aníng sleeme geera iga haratlintié'. Asma inós iidíguú daanduueé' guna gooín.

⁴⁷ Ala bar kuungá' gooirós haratlintaaooro aga sié', kuungá' adór axweesanay'eé' kur haratlintia' a adoomá?”