Yohana 15 - Ya/abtór hho' 1977

Yesu a sabiíbuú ló'

¹ “Aníng a xa'anoó sabiíbu kuduú ló', nee Baabuúeé' an dooslitmo.

² Umuúqo halmír laqwaliimaaká baraaeene gan hingees. Nee halmiidá' laqwaliim, gan fiits, as iwa laqwal kángw kilá' wa ale.

³ Kuungá' aga qaroó hhoohhoouuré' asma axweesantadá' naa kuungá' báw.

⁴ Baraaeé' wa hootaak, nee án baraahúng. Adoodá' halmi kilós ir laqwalaká barnaxes i gawaá xa'anoduú sabiíbuú i dir'aká, tam kuungá' sleeme a adoorí barnaxes a baraaeé' wa hota'aaká.

⁵ “Aníng a xa'anoó sabiíbu, kuungá' a haleemi. Heé baraaeé' wa hoót, nee án baraawós, heedaádá' mamu gi ló'wa laqwaal. Asma án bar kaáhh, kuungá' gár tleehhamooro ta aleesleera' i káhh tam ar wák.

⁶ Heé baraaeé' wa kumiitaaká hotaango, kun tsee/aá i kwaahh, adoodár halmi kar tsee/aá i kwaakwahhi, iri kát. Muu haleemiidá' giri sleemiis, kiri kwaahh baraá asla, as asla ngiwa /ak.

⁷ Kuungá' barnaxes a baraaeé' wa hotá', nee axweesanay'eé' bira baraahúng wa hoót, umuúqo gár ta sla'a'a firiimaak, kingi haniis.

⁸ Baabuúeé' ku xirfayeemiis, as adoodá' kuungá' mamu kiwa ló'wa laqwaliinda', nee tawa eeharuuser'eé' ar ló'.

⁹ Adoodá' Baabá aníng ira slaá', aníng sleeme kuungá' nuna adoodár slaá', baraá sla'aarir'eé' wa hootaak.

¹⁰ Kuungá' bar hara'ayar'eé' aga oté', a hotá' baraá sla'aarir'eé' wa ale, adoodá' aníng hara'ayár Baabuúeé' ngira óh, nee nira hoót baraá sla'aarirós wa ale.

¹¹ “Tí án ngina oó' dirhúng i alé, as qwal/uueé' masók i baraahúng, nee qwal/uuhúng i boo/i.

¹² Hara'ayar'eé' a tí, ‘Ti sla'aaslae' adoodá' án kuungá' nura slaá'.’

¹³ Hee i kaahh oo sla'aarír ur ga koóm, ar tí ga baa/, ar hee slafiingós nguwa haniisi as daanduú mulqeerós.

¹⁴ Kuungá' a mulqer'eé', bar tidá' án naa hara'ayiím aga tlehhé'.

¹⁵ Án kuungá' nu lawaalér ar ateetimaaká malé alé, asma lawaalmo gár aakoowós i tleehhi ga xuiiká. Ala án kuungá' nun mulqér ar ateetiím, asma tidá' sleémeero án naa axaás amór Baabuúeé' wa ale, nga kuungá' i oó'.

¹⁶ Aníng kuungá' iga tsawdi'iiká, ala a án kuungá' nuna tsawaár, nuri qaás as mamu kiwa laqwaalár eera', nee mamuuhúng iwa hootiya', as tidá' sleémeero ta firiinda' ar umuueé', Baabá ngiwa haniisi.

¹⁷ Tí ngin dirhúng i hara'ayiyiím, ‘Ti sla'aslae'.’”

Múk aa haratlintii'iiká nu aahh

¹⁸ “Kuungá' múk aa haratlintii'iiká buurnaa aáhh, xuaak gídaabá aníng iga qaroó aáhh, qoomár kuungá' nuwa aahhiiká.

¹⁹ Kuungá' geera bar muk'ín, inooín geera kuungá' nu slaiyá'. Ala daxta kuungá' a muk'ineeká, asma adoodá' án kuungá' nuwa tsawaár baraaín wa ale. Gawaá adoorihe múk aa haratlintii'iiká kuungá' nu aahh.

²⁰ /Aymuudá' naa kuungá' báw inslawaak gídaabá, ‘Lawaalmo ku ureeká ta aakoowose.’ Bar án tina slahhe'eemiís, kuungá' sleeme tundu slahhe'eemiis. Bar axweesante'eé' kana óh, toohúng sleeme ka oh.

²¹ Ala tí sleémeero kingi tleehh dirhunge as aníng, asma kudá' aníng iga ya/aaw, inooín ngu xuiiaaká.

²² Án geera binda hardahiiká nee nari axweés nee inooín, geera ta tlakweemaá konká. Ala hám daxta tlakweemaaín tlaankuuwo ngi aleeslay'aaká.

²³ Heé aníng iga aahh, a Baabuúeé' guna aáhh sleeme.

²⁴ Aníng tlehhemi'i ina tla/angw'ín wa tleéhh, tam heé hatlá' i kaahh oo tlehhema'aá adór kudá' gaa tleehh. Adoorí geeraawo bar aga tleehhiiká, inooín alók geera ta tlakweemaá konká. Ala daxta inooín tlehhemi'iieé' kaa ár, tam adoorihe aníng nee Baabuúeé' taa aahhiyé'.

²⁵ Adoorí ina tleehharút as /aymuudá' taa gooín baraá hara'ayar'ín iwa boo/i, kudá' káh, ‘Aníng ina tawó aahhiyé'.’

²⁶ “Alee/isusmoodá' binda hardáh, kudá' aníng ni ya/aaw amór Baabá wa ale, inós aníng i lamabu'ún. Inós a Qeeruú looeema, kudá' amór Baabá daáhh.

²⁷ Kuungá' sleeme aníng i lamabu'uundá', asma iimír iimu/uungo kuungá' a dinkwa nee aníng.