Yohana 11 - Ya/abtór hho' 1977

Gwa'arár Lasaro

¹ Heeko wák i tiiq, umuuwós a Lasaro. Inós a heé gixsár Betania, gixsadá' Mariamu i hot, nee Marta, hho'oorós.

² Mariamu inós a tidá' ya'aá Aako gaa slik ar di/itá mooyángw koom, giri fíts ar se'éngw sagós. Hhiyaawós an Lasaro, kudá' tiíq.

³ Hhaeedá' iidík nguri haniisiyé' amór Yesu, tari oó', “Aáko, mulqumoowók i tiiq.”

⁴ Yesu iidíguuwí nguwa axaás, iri oó', “Tiqtisíng ar gwa'araarooká, ala as xirfuú Mungú, as Garmoó Mungú i xurfuuti ar tiqtisíng.”

⁵ Yesu Marta nee hho'oorós nee Lasaro gina ló'wa slaá'.

⁶ Yesu ngiwa axaás gídaabá Lasaro i tiiq, iri deél amoodá' i dirii'i deelo tsár.

⁷ Aluudaádae eeharuuseerós gari báy, “Qwalaasé', a Yudéár kawaán malé alé.”

⁸ Eeharuuse iri ó', “Intsaahhatusúmo, lata'aáng ar /aben múk Yahudi una loohi leelehhiít as tuwa tlaquuti ar tlaa/e. Slám a amoodá' i kí/a?”

⁹ Yesu iri oó', “Ahaá, looár tlaatla/aangw a mibá nee tsáreéke? Hee bir hi'imiit tlaatla/aango dukutsmo gu tuuiiká. Asma gwa/ateemaá yaamu gi ga/áy.

¹⁰ Ala bir hi'imiit xweeraawo, dukutsmo gu tuu', asma gwa/ateemaá baraawós i kahhiyá'.”

¹¹ Yesu axweesanaywí guna axweés, aluuwo iri oó', “Mulqumoorén Lasaro aa guú', nee án hamí a amoodá' káw as nguwa tleesár aw.”

¹² Eeharuuse iri ó', “Aáko, bar ina guú', ahaá ala, i hunguú/iíke?”

¹³ Yesu iidíguú aa káh a daanduú gwa'ara, ala inooín ka xui, iidíguú aa káh a daanduú gu'ute.

¹⁴ Yesu iidíguuwí guri gwa/atís, iri oó', “Lasaro aa gwaá'.

¹⁵ Nee aníng a qwalalaá/ asma aníng qoomaadae a amoodá' i diriiaaká. Asma gawaá adoorihe kuungá' aníng iwa haratlintia'. Qwalaasé' amoorós.”

¹⁶ Tomaso, kudá' ta babay Daangamo, iri oó' dír eeharuusér hatlá', “Qwalaasé', atén sleeme a daqawán, as tawa alqatlaan nee inós.”

Yesu a waasle/ nee slafiingw

¹⁷ Yesu iwa hardáh, Lasaro kwa qaroó foól deelo tsiyáhh aa waaráhh.

¹⁸ Betania ka tseew nee Yerusalemu adór kilomeétár tám.

¹⁹ Nee múk yaariír oo Yahudi tinda hardáh dír Marta nee Mariamu, as kiwa gurkwa/amisi as hhiyaaín iwa gwaá'.

²⁰ Marta ngiwa axás gídaabá Yesu i lawee', guri al'eér. Ala Mariamu i dó' wa iwiwít.

²¹ Marta iri ó' dír Yesu, “Aáko, kuúng geera bar diirí dirí', hhiyaaeé' geera alók aa gwaaiiká.

²² Ala tam hamí a xuú' gídaabá umuúqo gár ta firiinda Mungú i alé, Mungú ngi haniis.”

²³ Yesu iri oó', “Hhiyaawók i waaslee/.”

²⁴ Marta iri ó', “A xuú' gídaabá i waaslee/ baraá waasle/uwo bál deelór alhhe'eesaywo.”

²⁵ Yesu iri oó', “Aníng an waasle/ nee slafiingw. Heé aníng iga haratlintii', tim i gwaai, inós i slaaf.

²⁶ Nee kudá' slaáf, nee aníng iri haratlintii', inós i baloó gwaaiiká ay slafíngw alhhe'eesay wásl. Xáy, tí aga haratlintí'i?”

²⁷ Marta iri ó', “Eeít, Aáko, aníng aga haratlintií' gídaabá kuúng an Kristo, Garmoó Mungú, kudá' hardáh baraá yaamí alé.”

Yesu ina /aá/

²⁸ Marta adoorí ooaro ngiwa hhe'és, iri amór dó' i kí/, hho'oorós Mariamu gari bihhí atét, iri ó', “Intsaahhatusmo naa hardáh, kiíng i ateetín.”

²⁹ Mariamu adoorí ngiwa axás, iri tleér ar gaanslaay, iri hardát amór Yesu.

³⁰ Nee Yesu qoomaadae aa hardahiiká baraá gixsadá', i didaádá' i kaahh, didár Marta ngway al'eér.

³¹ Múk Yahudi, kudá' nee Mariamu al'iiwiwitá' dír dó' wa ale as gurkwa/amis, kari ár adór Mariamu ira tleér ar gaanslaay, tari ti'iít, kari aluú wa eehaár. Inooín geera ka xui in /aa/aá eér amór /aanta.

³² Mariamu iwa hardát didá' Yesu i dirii'i, nee qoomár nguwa aán, iri tumbarara'át dír ya'aá Yesu, iri ó', “Aáko, kuúng geera bar diirí dirí', hhiyaaeé' geera alók aa gwaaiiká.”

³³ Yesu Mariamu ngiwa ár iwa /aa/amiin, nee mukduú Yahudi nee inós ti alkoomá' i /aa/amín sleeme, guruuwós iri tláy, muunuúwós iri amoqwaár,

³⁴ iri oó', “Dír kway qasé' a diimá?” Tari oó', “Aáko, qwaláng areek.”

³⁵ Yesu iri /aá/.

³⁶ Múk Yahudi iri oó', “Qaytsité' adór ngura slaá'.”

³⁷ Bahh'alé ta kaahi, “Kwí bar taampa gana ila' qaytsitís, ala gwa'arár heewí ila/aro geera gaa aleeslaykáhe?”

Lasaro kwaa waaslee/atís

³⁸ Yesu iri amoqwaqwadín malé alé baraá muunuúwose, iri hardáh ay dír /aanta. /Aantadá' kaa baraá guruú tlaa/ár i foól, nee tlaa/ár hatlá' kari afkudí qaás.

³⁹ Yesu iri oó', “Tlaa/a hingeesaak.” Marta, hho'ór heedaádá' aa gwaa', iri ó', “Aáko, aa tsutsuú', asma aa hoót baraá /aantár wa ale deelo tsiyáhh.”

⁴⁰ Yesu iri oó', “Án kiíng iga báwiíke, bara haratlintí', xirfuú Mungú u aán.”

⁴¹ Tlaa/adá' kari hingeés. Yesu iri gawtí qaytsiít, iri oó', “Baabá, án kuúng un sluufiís, asma án kuúng iga iiár i qás.

⁴² Aníng aga xuú' gídaabá kuúng i iiár i qamamiín umuú deelooro. Ala tí aníng gár ngisa oó', a as boo/aywí oo muu, kwí diirí dirií', kawa haratlinti'i gídaabá án kuúng iga ya/áp.”

⁴³ Yesu adoorí ooaro ngiwa hhe'eés, iri tseé' ar afór ur, “Lasáro, ti'iitáng.”

⁴⁴ Inósuudá' aa gwaa' niri ti'iít, kwaa untsuús ar inqwaruú tuuaa, iimír ya'aá wa ale ay daba', nee gitse/awós kaa tseék ar warqamo. Yesu iri oó', “Gweeraak, i tlay.”

Ta loohír leelehhiit ar Yesu kur oohi

⁴⁵ Múk Yahudi oo yaariír oo naa hardah amór Mariamu, adoodá' Yesu aa tleéhh kawa ár, kuri haratlintií'.

⁴⁶ Ala múk Yahudi bahh'alé tari tláy amór múk Farisayo, adoodá' Yesu aa tleéhh kari alki/iít.

⁴⁷ Geeraharuusér uren ar saalíngw múk Yahudi nee múk Farisayo, mukduú doó kwasleemár ur kuri ateét tari oó', “Adór heewí ku laqaan a adoomá? Asma heewí layaá yaariir gi tlehhiit.

⁴⁸ Nee atén bura tawó mawaán, muu sleémeero gu haratlintii'. Nee múk Rumi niri hardah, doorén kwí oo Doó Mungú kuri fee/, nee xooroorén kari waawuti'iima hayoh.”

⁴⁹ Heeko wák baraá tla/angw'ine, umuuwós a Kayafa, inós a geeraharusmoó úr oo saalíngw múk Yahudi kurkudae, ina oó', “Kuungá' gár ta baloó xua' i káhh,

⁵⁰ slám a aldakuta'aaká gídaabá, i hariín heé wák iwa gwaai as daanduú muu, asma xooro sleémeero miwa qwát.”

⁵¹ Kayafa /aymuuwí inós kilós gwa ooiiká. Ala inós kurkudae a geeraharusmoó úr oo saalíngw múk Yahudi. Gawaá adoorihe axweesantós tí a aari gídaabá Yesu i gwaa' as daanduú xooroorí.

⁵² Ala as xooroorí kiloseeká. Nee tam as mukdá' Mungú haratlintií' baraá xoorduuwo nguwa burumburi as tawa wák tleehhiti.

⁵³ Iimír baldá' tari al'axweés adór Yesu kur gaasi.

⁵⁴ Ala gawaá adoorihe Yesu aa hi'imiitiiká malé alé ar geehhoeema baraá tla/ángw múk Yahudiro. Iri quútl amoodae, iri tláy bihhaá xanxaay, ay dír gixsarka ta babay Efraimu, iri amoodá' wa hoót nee eeharuuseerós.

⁵⁵ Deelór ur ar Pasaáka ar múk Yahudi deeloodae aa naká/, nee múk yaariír niri tlatláy ayaaín wa ale, tari tsa/án Yerusalemu, qoomár deeloodár Pasaáka iwa xeeriiká, as tiwa hheehhe'eesiya'.

⁵⁶ Inooín Yesu kuri leelehhiít. Tawa sihhimiiti baraá Doó Mungú wa ale, tiri yaahamisiyé' tari oó', “Xaysé', a adoomá, i hardahiikáhe baraá deeloorí ure?”

⁵⁷ Nee geeraharuusér uren ar saalíngw múk Yahudi, nee múk Farisayo, hara'aya kaa qaroó haniís gídaabá, hee bar ngu xuu' dír i dirii'i, iidík ngu huuwi as kuwa oohár ay.