Yohana 10 - Ya/abtór hho' 1977

¹ Yesu iri oó', “Án a kah, heé aa dahiiká ar afkuú do' baraá matla/ángw bee/aangw, ala ina dáh ar amór hatlá', heedaádá' a fisusmo nee a malgusmo.

² Heé afkuú doó ar dáh a de'eamusmoó bee/aangw.

³ Heedaádá' afkuú doó xuúm, afkuú do' gu gweer dír heewihe. Nee bee/aangw afoorós gari axaas. Inós bee/aangós guri ateetín ar ume, nee guri tsee/aá i duux sleémeero.

⁴ Qoomár bee/aangós sleémeero burngu duuxún, gun geerahaar, nee bee/aangw iri eeharín, asma afoorós ga xuu'.

⁵ Bee/aangwí heé hatlá' gu baloó eehariiká, ala a gun ilagoow. Asma bee/angwí afór múk hatlá' ga xuiiká.”

⁶ Yesu slaqsaywí guna ar axweés dir'ín i alé. Ala inooín gídaabárós kaa tsaahhiiká.

Yesu a de'eamusmoó hhoó'

⁷ Yesu iri malé oó', “Án a kah, aníng an afkuú doó bee/aangw.

⁸ Kudá' sleémeero naa hardahiye' qoomár án niwa hardahiiká, inooín a fisuuse nee malguuse. Ala bee/aangw gaa iiár i qaasiiká.

⁹ Aníng an afkuú do'. Hee bira dáh ar aníng, i ba/án. Inós in darah nee in ti'imiit, nee /aymisi ga sláy.

¹⁰ Fisusmo gár nis hardahi a fiiso nee tsu/uta nee hhita. Án nina hardáh as slafiingw nguwa slaya', nee slafingwdá' iwa doogin.

¹¹ “Aníng a de'eamusmoó hhoó'. De'eamusmoó hhoó' slafiingós gun duux as daanduú bee/aangw.

¹² Heé ta bu'un, barnaxes taweermo gwa ár, naa hardáh, in goow, bee/aangw guri geexáy, asma inós a de'eamusmoowooká, slám bee/aangw a koseeká. Taweermo bee/angwdá' gway uhín nee gway diyayaa/.

¹³ Heedaádá' ina goów as tawa heé ta bu'un, asma bee/aangw dirose a gaarooká.

¹⁴ Aníng a de'eamusmoó hhoó'. Aníng bee/angw'eé' u xuú', nee bee/angw'eé' aníng i xuu'.

¹⁵ Adoorí an adór Baabá aníng ir xui, nee adór aníng Baabá ngur xuu'. Aníng slafingw'eé' un duúx as daanduú bee/aangw.

¹⁶ Bee/ángw hatlá' sleeme u koóm, ala i baraá daqtiheeká. Bee/angwí gár kuwa hariím a ngun huúw baraá daqtí alé. Inooín afor'eé' ngiri iiár i qaasiyá', aluuwo tari daqtá wák nee de'eamusmo tari wak.

¹⁷ “Baabá aníng i slaa', asma slafingw'eé' un haniís as nguwa malé oh.

¹⁸ Heé slafingw'eé' gu hingeés i kaahh. Ala a ánuú kilá' un haniís. Aníng aleesleemu u koóm oo slafingw'eé' nguwa haniis. Nee slám aleesleemu u koóm oo nguwa slaw malé alé. Adoorí an adoodá' Baabuúeé' naa hara'ayín tlehhmuuwo.”

¹⁹ Múk Yahudi tiri partliít malé alé as axweesanaywí.

²⁰ Awa yaariir bahh'alé tari ooín, “Heewí i neetlaamér kón, slám a slarhhamá. Ahaá, mus iiár i qamiindá'?”

²¹ Bahh'alé tari ooín, “Axweesanaywí a axweesanoó heé neetlaamér koomaaká. Ahaá, neetlaame aleesleemu gu koónda oo taampu ngiwa ila' qaytsiitimis?”

Yesu kwaa sií' nee múk Yahudi

²² Baraá Yerusalemuro deelór ur i deer ar inslaslángw aldafiimár Doó Mungú. Qoomaadá' a qoomár tsaaqwa.

²³ Qoomaadae Yesu ina hi'imiít baraá Doó Mungú wa ale, baraá matla/ángw Sulemani.

²⁴ Múk Yahudi Yesu kuri harweér tari oó', “Kuúng atén ti daawitimamis ay xaylá? Kuúng barnaxes a Kristo, atén ti xu'utisa hhe'es.”

²⁵ Yesu iri oó', “Án kuungá' naa qaaroó ádbáw, ala kuungá' án i ya/a/aanda'aaká. Gadiyeérí aníng ni tlehhiit ar umuú Baabuúeé', an tidá' aníng i lamabu'uum.

²⁶ Ala kuungá' a ya/a/aanda'aaká, asma kuungá' a kahhá' baraá tla/ángw bee/angw'eene.

²⁷ Bee/angw'eé' afor'eé' ga iiár i qamín. Aníng u xuú', nee inós aníng i eeharahaar.

²⁸ Aníng u slafíngw alhhe'eesay wásl i haniís, nee inós i baloó qwaariiká. Slám heé gu gawaá dakw'eé' wa hayóh i kaahh.

²⁹ Baabuúeé' oo bee/angwí ngwa haniis, inós ku úr ta awa hatlá' sleémeerowo. Slám heé gu aleesláw hayooharo i kaahh gawaá dákw Baabuúeé' wa ale.

³⁰ Aníng nee Baabá a wak.”

³¹ Múk Yahudi tlaa/e giri taataáhh malé alé as Yesu kuwa tlaquuti.

³² Yesu iri oó', “Gadiyér yaariir ar hho' nga laqaám, ar amór Baabá daahh. Gawaá adoorihe a gadiyeét gaalá ar aníng is tlaquta' ar tlaa/e?”

³³ Múk Yahudi iri oó', “Atén kuúng u tlaquutanaaká ar tlaa/e gadiyér hhó' wa ale, ala gár us tlaquutaan as kuúng tawa Mungú /ooslisliin, nee as kuúng kilók tiwa Mungú tlehhit.”

³⁴ Yesu iri oó', “Ahaá, kaa gooínke baraá hara'ayár Musawo tidá' Mungú iwa oó', ‘Kuungá' a mungi'i.’

³⁵ Atén a xuaán gídaabá Gooi i warqeeraaká baloó alé. Gawaá adoorihe, Mungú mukdá' aa axweesantós i haniís guna báy, ‘Kuungá' a mungi'i.’

³⁶ Ala ánuúwí taa tsuúq nee Baabá, nee tiri ya/aáw baraá yaamí alé, kuungá' mis babeera', ‘Kuúng a Mungú /ooslisliín,’ án bar kah, ‘Aníng a Garmoó Mungú?’

³⁷ Án bar gadiyér Baabuúeé' a tleehhaaká, án mi haratlintiaara'.

³⁸ Ala án bar gadiyeét aga tleéhh, ala án tim haratlintatia'aakahe, gadiyeédá' naa tleéhh na haratlintiaak. Asma kuungá' kawa xua' nee kawa tsahha' gídaabá Baabá i baraaeé', nee aníng a baraá Baabá.”

³⁹ Loohi kari leelehhiít malé alé ar kur oohi, ala iri dabaaín wa qwaár.

⁴⁰ Yesu iri malé tláy ay gayuú Yordani, ay didár aáng Yohana iwa geerí baatimiís, iri amoodá' i deél.

⁴¹ Múk yaariír Yesu guri i daqáy tari oó', “Yohana layár aa tleéhh i mak káhh, ala tidá' sleémeero Yohana aa káh daanduú heewihe, ar ló'.”

⁴² Múk yaariír amoodaádae guri haratlintií'.