Yohana 1 - Ya/abtór hho' 1977

/Aymu ina slaqwa tleehhiít

¹ Iimír iimu/uungo /aymu i daadeer. /Aymuuwí amór i dirii'i a amór Mungú. Nee /aymuuwí inós a Mungú.

² Kwí iimu/uungo amór Mungú gan i dirii'.

³ Mura' sleémeero ina tleehharuút ar inós. Geera bar inoseeká, gár aa tleehharut i káhh, baraá muruuwí sleémeero aa tleehharuuti.

⁴ Slafíngw alhhe'eesay wásl in baraawós i dirii', nee slafiingwí an gwa/ateemaá muu.

⁵ Gwa/ateemaaká' nin baraá giwtír wa gwa/aatiyá', nee giwti gaasaro gaa aleesleeriiká.

⁶ Heeko nina hardáh, kunguna amór Mungú wa ya/aáw. Umuuwós a Yohana.

⁷ Heewí nina hardáh as lamabu'uungw, gwa/atamaayeedá' ngiwa lamabu'un, as muu sleémeero i haratlintii'i ar inós.

⁸ Inósuuwí a gwa/ateemaadaeeká, ala nina hardáh as gwa/ateemaadá' ngiwa lamabu'un.

⁹ Ala gwa/atamaayér ló' ar umuúqo heewo gu gwa/atis, i hi'ít baraá yaamí alé.

¹⁰ Inós i baraá yaamí dirii', tam yaamu nina tleehharuutiyé' ar inós, ala inós kwaa tsaahhiiká nee muu.

¹¹ Inós nina ayaawós i hardáh, ala kwa ilaoohiiká nee mukós.

¹² Ala kudá' sleémeero ngwa ilaoohiye', gina aleesleemuú i haniís, tawa na/'aá Mungú tleehhiti. Inooín an kudá' inós ngwa haratlintii'iye'.

¹³ Kudá' taa laqwaliiká adór na/'iír ale, laqaá ar sla'aarír slaqwa, laqaá ar sla'aarír hee, ala ar sla'aarír Mungú.

¹⁴ /Aymuuwí ina hee tleehhiít, iri amoorén wa hoót. Atén xirfuuwós ngway araán, i ló'wa haats gurhhooaro nee looeemawo. Xirfuuwí guna amór Baabá wa sláy, asma inós a Garmoó kilós oo Mungú.

¹⁵ Yohana ina lamabu'ún, iri tseé' iri oó', “Kwí an kudá' iidíguuwós naa alki/iít gídaabá, ‘Heedá' aluueé' wa hardáh a kudá' geeraaeé' haár, asma án niwa deeruuta inós i qaroó daadeer.’”

¹⁶ Asma baraá hatsmuuwose atén tsuuqa ina slaslawaán daanduú kuqá' wa ale.

¹⁷ Asma hara'aya kana haniís ar dákw Musa, ala gurtleemu nee looeema nina hardihiyé' ar dákw Yesu Kristo.

¹⁸ Heé Mungú gwa baloó ar i kaahh. Garmoó kilós oo Mungú, kudá' dír Baabá i dirií', inós an kudá' Baabá ngwa geehhoutis.

Lamabu'úngw Yohanudá' Baatimaamiís

¹⁹ Múk Yahudi oo baraá Yerusalemu geeraharuusér saaliingw nee múk tlahhoó Lawi kuna ya/aáw amór Yohana, as kuwa yaahaasi gídaabá, “Kuúng a heemá?”

²⁰ Yohana gawaá lamabu'uungose looeema gaa si'iiká ooaro, tiri geehhoutís gídaabá, “Aníng a Kristowooká.”

²¹ Kuri yaahaás, “Kuúng a heemá ala? Kuúng a Eliyáwo?” Iri oó', “Aníng a Eliyawooká.” Tari oó', “Kuúng a aarusmoodáe?” Iri oó', “Aasla'áy.”

²² Naagáy kuri báy, “Kuúng a heemá ala? Mukdá' atén taa ya/aaw mu bawaán? Kuúng ma kát daanduuwoge?”

²³ Yohana iri oó', “Aníng a, ‘Afór hee ar tseeamiim baraá darmuú wa ale, ar kah, Loohír Aako amohhe'eesaak.’” Axweesantí an adór aarusmo Isaya ngira oó'.

²⁴ Nee mukdá' taa ya/aáw amór i dahhi a amór múk Farisayo.

²⁵ Kuri yaahaás kuri báy, “Ahaá ala, mas baatimís, kuúng bar Kristowooká, laqaá Eliyawooká, laqaá aarusmoodaeeká?”

²⁶ Yohana giri i ilawaáts giri báy, “Aníng an baatimiís ar ma'aay. Heé kuungá' taa xua'aaká aa sihhiít tla/angwhúng i alé.

²⁷ Inós an kudá' ni aluueé' wa hardáh. Tam aníng a hariimaaká himuú ya/atirós nguwa slakwekwe'ees.”

²⁸ Kaangwí dír iwa tleehharuút a amór yaamaá Betania, gayuú yaaér Yordani, amoodá' Yohana iwa baatimiisi.

Deelmoó bee/i oo Mungú

²⁹ Bál tsár Yesu iwa amór Yoháná kay, kuri ár nee Yohana. Yohana iri oó', “Ga/aawaak Deelmoó bee/i oo Mungú, kudá' tlakweemaá muu gi hingeemiís.

³⁰ Kwí an kudá' iidíguuwós aníng naa alki/iít gídaabá, ‘Hee ni aluueén wa hardah, ala a kudá' geeraaeé' gaa haar, asma án niwa deeruut, inós i qaroó daadeer.’

³¹ Aníng inós ugwa xuiiká, ala aníng nina hardáh niwa baatimiis ar ma'aay, as inós kuwa xu'utisi dír múk Israeliwo.”

³² Yohana iri malé lamabu'ún iri oó', “Án Qeeruú hhoohhoó' una ár iwa awdiiti gawaá doorí wa ale adór hhooki, nee iri gawaawós i iwiít.

³³ Ala inós aníng ugwa xuiiká. Kudá' aníng iga ya/aaw as niwa baatimiis ar ma'aay, inós aníng ina báy, ‘Heé Qeeruú hhoohhoó' aa i aweér bura aán, kwí an kudá' baatimiís ar Qeeruú hhoohhoó'.’

³⁴ Nee tí aníng aga ár, slám aga lamabu'uúm ar gídaabá, ‘Kwí a Garmoó Mungú.’”

Eeharuusér Yesu ar geera

³⁵ Slám bál tsare Yohana i sihhimiit dinkwa nee eeharuuseerós ar tsár.

³⁶ Yesu kuri ár iwa hii'iimiiti. Yohana iri oó', “Ga/aawaak Deelmoó bee/i oo Mungú.”

³⁷ Eeharuuseedá' tsár ar Yohana gwa axas qoomár iwa axweesi, Yesu guri eehát.

³⁸ Yesu iri warqáy, eeharuuseedá' gu eeharahaar gari ár gari báy, “Gár ta leelehhita' a milá?” Eeharuuseedá' iri ó', “Intsaahhatusúmo, kuúng dír ta hot a diimá?”

³⁹ Yesu giri báy, “Qwalaasé' dír ni hoot artá awaare'.” Tari tláy, dír i hooti kari ár. Tari deél dír do'ós i aleeró baalaadae. Nee qoomaadaádá' a qoomár looár mibaangw.

⁴⁰ Andrea, hhiyoó Simoni Petro, a heé wák baraá eeharuuseedá' tsár ar Yohana gwa axamis nee Yesu kwa eehát.

⁴¹ Andrea hhiyaawósuú kilá' guri ár, kudá' ta babay Simoni, guri báy, “Atén Masihi una araán.” (Gídaabárós a Kristo.)

⁴² Simoni kuri huúw amór Yesu. Yesu iri qaytsiít amór Simoni, iri oó', “Kuúng a Simoni, garmoó Yohana. Nee kuúng tu bay Kefa.” (Gídaabárós a Petro, laqaá Tlaa/a).

Yesu Filipo nee Natanaeli ngiwa ateét

⁴³ Looitleérose Yesu iwa Galilayár keemuú wa slai, Filipo guri ár. Yesu iri oó', “Aníng eeharáng.”

⁴⁴ Nee Filipo inós a heé Betsaida, gixsár Andrea nee Petro.

⁴⁵ Filipo Natanaeli guri ár, guri báy, “Kudá' gooír Musa nar aaruuse i kat, atén ugwa araán. Inós a Yesu, garmoó Yosefu, heé gixsár Nasareti.”

⁴⁶ Natanaeli iri oó', “Gár hhoo' ar baraá gixsár Nasaretír wa ti'iit iqo deéro?” Filipo iri oó', “Qwaláng, areek.”

⁴⁷ Yesu Natanaeli guri ár iwa amoorós kay. Yesu iri oó', “Ga/aaweek, heewí a heé Israelú kilá'. Waaqooda i káhh baraawose.”

⁴⁸ Natanaeli iri oó', “Ahaá, án kuúng adór ira tsáhh a adoomá?” Yesu iri oó', “Qoomár kuúng Filipo uwa ateetiiká, kuúng tawa baraá guruú /aantsí i dirí', án kuúng ugwa qaroó ár.”

⁴⁹ Natanaeli iri oó', “Intsaahhatusúmo, kuúng a Garmoó Mungú. Slám kuúng an Waawutmoó múk Israeli.”

⁵⁰ Yesu iri oó', “Gár tasa haratlintí' a tidaádá' uwa báwi, ‘Án kuúng una qaroó ár qoomár kuúng tawa baraá guruú /aantsír i diri'’? Ala muruú urén oo kwí gu baá/ u aán.”

⁵¹ Yesu iri oó' dír Natanaeli, “Án a kah, doori iqo aandá' adór nir gweeritiya', nee malaykér Mungú iwa tsa/a/aan nee iwa awdit gawaá Garmoó Hee.”