WARA'AMI 97 - Ya/abtór hho' 1977

Mungú a Baalusmoó Úr

¹ AAKOÓ MUNGÚ i waawuti'ii'ín, yaamu i qwalala/iye', yaamudaá baraá tla/eeraá tlabeemo i qwalaa/iye'!

² Huunkoó bó/ oo qoomár ma/mi Aakoó Mungú gwaa harweér, hhooeema nee sakwasleemár ganaa' an iimuu/úngw waawuti'iimarós.

³ Asla i geeraawós wa hi'ít, nee wakuuseerós tidár tsuf'i sleémeero asltidá' giri xaawuúr.

⁴ Mankartós yaamu gin gwa/atís, yaamu ngiri ariyé' nee tari daaraxaat.

⁵ Tlom'i niri weeqiya' adór boohhayaangw dír geeraá AAKOOWO, dír geeraá Aakoó Mungú yaamu sleémeero.

⁶ Doori hhoeemaawós ngi alki/iitiyá', nee xoordu sleémeero xirfuuwós ngun ariyá'.

⁷ Kudá' sleémeero muruú tawo ngu haratlintatiá' hariímár Mungú wa ale ki murekees, kudá' sleémeero slaqsi'iidaá muruú tawo ngir diidusá' Muruudá' sleémeero i geeraá Mungú i tumbarara'aat.

⁸ Múk gixsár Sayuni kari axaas tay qwalaa/, múk Yuda i baraa/, asma sakwasleemár Mungú.

⁹ AAKOÓ MUNGÚ kuduú Aleesleemusmo, kuúng tu úr baraá yaamu sleémeerowo, kuúng tu iia tleér ta munguaá hatlá' sleémeero.

¹⁰ AAKOÓ MUNGÚ múk tlakweemaá ahhiít gu slaa', slafíngw heé hhoohhoó' gun xún, gin tuu/ gawaá dabaá múk tlakuuseero.

¹¹ Heé hhoó' gwa/ateema ngu i gwa/atiyá', Múk tsaén baraá muner'ine tay qwalalaa/.

¹² Kuungaásingá' hotaa ganá', AAKOÓ MUNGÚ saqwalala/aak, nee umuuwós kudá' hhoohhoó' sluufamamisaak.