WARA'AMI 94 - Ya/abtór hho' 1977

Mungú a Sakwasleemusmoó Muu Sleémeero

¹ AAKOÓ MUNGÚ, Mungú li/oó bu'uúm, kuúngudá' li/oó bu'uúm ti laqaan.

² Kuúng an kudá' muu sleémeero gu sakwasleemuút, sihhiitáng, múk dara/aám sakwasleemuuteek adoodá' inooín wa hariim.

³ AAKOÓ MUNGÚ, ay xaylá múk tlákw ta qwal/a/ati? Ay xaylá, xáy AÁKO?

⁴ Inooín tan axwees ar daara/aangw, tlakuuse sleémeero tin kilooín xirfayeemisiyá'.

⁵ AAKOÓ MUNGÚ, mukók kun naasúy, kun ngwaanjín, mukók kuduú aalirók ar kilá'.

⁶ Inooín ta kwaeelaá tsuu/ nee dahaayeero, panaay kun tsuu/ sleeme.

⁷ Ta kaahi, “AAKO i xumiisiiká, Mungú Yakobo gár i tsaahhi i káhh.”

⁸ Muk'eé', ahaá ay xaylá kuungá' tsaahha ka sleera'? Ahaá, daktána, ay xaylá kuungá' qeeru ku sleera'?

⁹ Kudaádá' iia gaa tleehh, i axaasiikáhe? Kudaádá' ila gaa tleehh, i xumiisikáhe?

¹⁰ Kudaádá' xoordu gi sawaawuti'iím, xáy, muxtaaro gi aleeslaykáhe? Inósuduú múk intsaahhatimís sagalooaro.

¹¹ AAKOÓ MUNGÚ iinslawoó hee gu xuu', adór tar gár tawo.

¹² AAKOÓ MUNGÚ, heé amohhoó' a kudá' kuúng taa naanáq, kudá' dabeeroge ta intsaahhatís.

¹³ Kuúng un hungu/uumií hanís deelór slahh'amayeero ay dír bohóngw heé tlaákw gu óh, foolaaro kway hhe'eesi.

¹⁴ Asma AAKOÓ MUNGÚ mukós gu mayká, aalirós ga gunqareesiika.

¹⁵ Sakwasleemár ganaa' i ki/, sleémeero kudá' hotaa ganaá' ngi ehaariyá'.

¹⁶ Xáy, heé bartaeé' ngi áw a heemá qoomár múk tlákw bura siaán? A heemaá heé gayuueé' dír múk tlakweemaá tlehhiita?

¹⁷ AAKOÓ MUNGÚ bira alee/isiiká, aníng geera aga qaroó /eét baraá gi'i ar gaanslaay.

¹⁸ Aníng niwa oó', “A huuhu'uúm,” sla'aarirók ar warqawaaká ina gawtí koón, AAKOÓ MUNGÚ.

¹⁹ Muunaáeé' amoqwaqwadiingo bira buúhh, aníng kuúng i gurkwa/ás nee in qwal/amís.

²⁰ Xáy, geeraharusmoó /aytusmo nee kuúng an dinku'usá'a? Kudá' hara'ayár gan'amuú koomaaká ngi qamiimá'?

²¹ Kudá' múk ganaá' gu tsu/utár wa slaá', kudá' múk dakuús wásl gu sakwasleemár gwa'arár i tlaáq.

²² Ala AAKOÓ MUNGÚ a koo/ir'eé' ar gawít, Mungúeé', tlaa/ar'eé' ar ni i gogoow.

²³ Tlakweemaaín kudá' i tlehhahhitiya' gin gawaaínií ki/is. Inooín kin hhaamees as tlakweemaín. Eeít, AAKOÓ Mungúrén gi qwaarees.