WARA'AMI 93 - Ya/abtór hho' 1977

Mungú a Waawutmo

¹ AAKOÓ MUNGÚ aa waawuti'ín, AAKOÓ MUNGÚ taa tsiitiís ar aleesleemu nee /uuruuwós, yaamu gaa gawdeés as mindiwa dingitiyé'.

² Kitaangók ku qaroó gawít iimír iimu/uungo, kuúng an kudaádá' dáw iimír iimu/uungw wasle.

³ AAKOÓ MUNGÚ, aluuo i xuurú', aluuo i xuurú' ar afór ur, aluuo naa /ur/urít ar /uuru.

⁴ AAKOÓ MUNGÚ kuduú gawaá doori, i /uuruú kón ta xuuraír ma'aá tlawto, i /uuruú kón ta xuuraaír gwaanduú ma'aaywo.

⁵ AAKOÓ MUNGÚ kaahirók ar tsáp, nee Do'ók ku ló'wa hhoohhoó' ay alhhe'eesay wasle.