WARA'AMI 92 - Ya/abtór hho' 1977

Daa'ángw Xirif

(Wara'ami. Daa'ángw deelór Sabato)

¹ A gár hhoo' AAKOÓ MUNGÚ kuwa sluufimisaan, nee umuuwók kuwa xirfayeemisaán, kuúnguduú Gawtí dirií'.

² Matlatleero sla'aarirók ar warqawaaká an alki/iitaán, nee inkihhimuuwók un alki/iitaán xweeraawo,

³ ar afór gitaa, nee ar afór seése nee ar gídaandoori.

⁴ AAKOÓ MUNGÚ, án kuúng iga qwal/atís ar tlehhmi'iiwók, aníng an daá' nee an baraá/ as tlehhma'aá dabaawók.

⁵ AAKOÓ MUNGÚ, adoodá' tlehhmi'iiwók kir urén, direne inslawaywók ku gawít tsaahharo.

⁶ Heé daktani muruuwí gu tsaahhiiká, tam heé tliíf ga xuiiká sleeme.

⁷ Tam múk hotaa ganaa'aaká ni harmaa/i adór gitsór wa ale, nee kudá' sleémeero muruú tlákw tlehhiitá' birna slu/ubibiné', ala ki qwaarees ay alhhe'eesay wasle.

⁸ Ala kuúng AAKOÓ MUNGÚ, tu xiríf ay alhhe'eesay wasle.

⁹ AAKOÓ MUNGÚ, wakuuseerók tí i qwat, tam kudá' sleémeero muruú tlákw tlehhahhiitá' i diyayá/.

¹⁰ Ala kuúng aníng iga /uuruú i hanís adór kuduú saree/a, ina slík ar di/tá /awak.

¹¹ Wakuuser'eé' aga ár ilaaeene, kiwa arbaá/, aníng iga i slaqwiyé' /aa/eeín iga axaás iaaeene.

¹² Múk hotaa ganaá' in slu/uubín adór slaansli, iri uraráy adór miereésír Lebanoni.

¹³ Kwaa dahaás baraá Doó AAKOÓ MUNGÚ, nin slu/ubibiná' baraá Doó Mungúrén wa ale.

¹⁴ Mamu ngi laqwaliyá' ay qoomár diimaay, nin hatsiyá' duwaawo nee naa/amawo.

¹⁵ Kan alki/iit adór AAKOÓ MUNGÚ ir gan'amuú kón, inós an tlaa/ar'eé', baraawose al/ayma i káhh.