WARA'AMI 91 - Ya/abtór hho' 1977

Mungú a Baqmusmoorén

¹ Kudá' taa baáq nee Mungúdá' gawtí dirií', kudá' aa iwiit baraá mahhtuú Mungú Aleesleemusmo,

² inós in dír AAKOÓ MUNGÚ í ooi', “Kuúng an dír guway'eé', nee koo/ir'eé' ar gawit, Mungúeé' kudá' ni harahhiif.”

³ Asma inós kuúng un tuu/ baraá tsaxweelír slakaatusmoó wa ale, nee baraá tiqtír pu/ito.

⁴ Un tuntuuk ar hayowós, baraá guruú hhampe'eeriwose dír guwaay an sleér. Inkihhimuuwós an gaamboót nee baqmoó.

⁵ Tsaxwaá xweera i da'ayutká, laqaá tam mahángw taa tsaxaár tlaatla/aango u daimitká.

⁶ Tam pu/tidár baraá giwti, laqaá tidá' tlaatla/aango hhitiim.

⁷ Tam múk kumuú wák i dír bihhaawók huui, laqaá kumér mibaangw i hua bihhaá dakók oo doó /iyáy, ala kuúng tu baloó naahhisiiká.

⁸ Ala ar ilaawoge an aán, nee bu'utuú múk hotaa ganaa'aaká u aán.

⁹ Asma an kat, “AÁKO, kuúng a dír guway'eé'”. Mungúdá' gawtí dirií' ugwa hotaangók tléhh.

¹⁰ Gár tlaakw u baloó sleeraaká, tam pu/i do'ók gu i tseewuuraaká.

¹¹ Asma malaykeerós ngi amoorók i ya/aaw, u xuun baraá lohuuwók sleémeero.

¹² Kuúng u gagát ar dabaaín, as yaaerók makawa tunqalaá/ nee tlaa/a.

¹³ Diraangw nee dayshimo in adarát, na/oó diraangw nee waasla in ya'ár naasuúr.

¹⁴ Aníng inós u ba/amís asma iga ló'wa slaá', un xuúm asma umuueé' gwa xuú'.

¹⁵ Aníng bira ateét, u iiárií qaás, aníng a dinkwa nee inós baraá slahh'amayeero, un ba/amís ngway xirfayeés.

¹⁶ Un aaxiís ar slafíngw deelór yaariir. Inós un ba/amar'eé' i haniís.