WARA'AMI 90 - Ya/abtór hho' 1977

KITAÁBUÚ TSIYÁHH ( War 90—106 ) Mungú nee Hee

(Firór Musa, heé Mungú)

¹ AAKOÓ MUNGÚ, kuúng an dír hotaarén awa qari sleémeero.

² Tam qoomár tlom'i kiwa tlehhká. Tam qoomár yaamu kiwa tlehhká, kuúng an Mungú daadáw iimír iimu/ungw wasle ay alhhe'eesay wasle.

³ Hee un ki/ís baraá hhapér i alé, bara ó', “Kuungá' muu, ki/é' baraá hhape amoodá' ta dahha'.”

⁴ Dír kuunge kureeraá kumuú wák a adór looár wák kilós, adór baalaadár /isá' aa waarahh, a adór xweeraá looár wák.

⁵ Kuúng muu un qwaarés inooín a adór tlata, adór gitsór naa/ matlatleero,

⁶ tidá' matlatleero harmaa/ iri /ayús, nee tsiindoowo iri /óts nee iri kát.

⁷ Asma atén ta hhaameés nee buhhtaawók, buhhtaawók atén ti dae tlaqiyá'.

⁸ Tlakweemaarén ki geehhoo' diroge, tlakweemaá baraá naaqo naa geehhouyé' baraá gwa/ateemaawoge.

⁹ Deelorén sleémeero aa waaráhh baraá buhhtaawók ar alé, kureeraá slafingwrén niri faakiyé' adór hiinsla.

¹⁰ Kureeriirén a kureeri mibeeraá faanqw, laqaá birti slaqo hhó' a mibeeri dakaát. Ala wayaqaamuú yaariír un ar hootaán, deelo i kwahhmiská atén aqo an gaanslár tlawaán.

¹¹ A heemá heé buhhtaawók tsaahharo gi aleesláw? Adoodá' kuúng tur da'ayumiti an adoodá' buhhtaawók ngir tsaahhiya'

¹² Gawaá adoorihe atén ti intsaahhatis faarór deelór hotaarén kawa xuaan, as kahhó' sagalooa kawa koomaan.

¹³ AAKOÓ MUNGÚ, buhhtaawók i kumaamitir ay xaylá? Ki/áng sagadiyuuseerók gurtlaweek.

¹⁴ Sla'aarirók ar warqawaakahe ti hatsis matlatleero, as kahhó' atén uwa sabara/aan nee uwa saqwalala/aan baraá hootangwrén sleémeero.

¹⁵ Daxta kureeraá yaariir awa qwala/ huwang, ar adoodá' kureeraá slahh'amu nee wayaqamu ngira hanís.

¹⁶ Tlehhmi'iiwók laqaameek dír sagadiyuuseeroge, na/'ii'ín xirfuuwók kudá' úr ngu ariye'.

¹⁷ AAKOÓ MUNGÚ, Mungúrén, masók hhohhoaarirók i gawaarén i dirí', gadiyér dabaarén ya/ameek, kuúng gadiyér dabaarén ka kwa/ás.