WARA'AMI 89 - Ya/abtór hho' 1977

Daa'ángw Qoomár Slahh'amuú Xooro

(Wara'amtá intsaahhatimiis ar Etan aa daá', oo tlahhoó Esra)

¹ AAKOÓ MUNGÚ, sla'aarirók ar warqawaaká a daá' ay alhhe'eesay wasle, aníng inkihhimuuwók u alki/iít dír qari sleémeero.

² Aníng a xuú' sla'aarirók ar warqawaaká i kumít daqisleém, inkihhimuuwók i dikii' adór iihhafiirír doori.

³ Kuúng ana ó', “Alqado aga qaás nee hee'eé' oo wák kudá' naa tsawaár, lo'o aga /aáy as sagadiyusmooeé' Daudi,

⁴ ‘Waawuti'iima i qutlká dír xwaylaroge, waawuti'iimarók a gawdeés baraá qari sleémeero.’”

⁵ AAKOÓ MUNGÚ, doori i waa/oo/amorók xirfayesmisiyá', inkihhimuuwók ku xirfayeesi baraá dinku'uumár múk hhohhoe!

⁶ Xáy, a heemá heé nee AAKOÓ MUNGÚ qoomá' gawaá dooriwo? I kaahh tam oo wák baraá dooriwo oo nee kuúng qoomá'.

⁷ Mungú ku da'ayumiit didaádár tlahhoó hhoohhooe. Ku úr nee ku ló'wa ilaiwawaa/ ta kudá' ngwa harweeriyé'.

⁸ AAKOÓ MUNGÚ Aleesleemúsmo, a heemá oo /uuruú koóm adór kuúng wa ale? Kuúng a inkihhimuú koón dír umuú gaaro.

⁹ Kuúng tlawtá aa leexwaandut an bál, kuúng gwanduú ma'aay un xasltimís.

¹⁰ Kuúng dayshimoodá' ta bay Rahabu una naasuúr, ar /uuruuwók kudá' ta koonda, wakuuseerók ana arbá/.

¹¹ Doori a kók nee yaamu sleeme, kuúng yaamu ina tléhh, nee muruú baraadií dirií' sleeme kuúng una iihháf.

¹² Kuúng /iya nee basko ina tléhh, tlom'aá Tabori nee Hermoni u sa baraa/iyá'!

¹³ Dakók i aleesleemuú kón, dakók oo doó /iyáy i /uuruú kón nee arba/ati.

¹⁴ Gan'amu nee sakwasleemár ganaa' an iihhafiirír waawuti'iimarók, sla'aarirók ar warqawaaká nee inkihhimu ki geehhoo', baraá umuúqo gár ta tlehhiita.

¹⁵ AAKOÓ MUNGÚ, múk amohhoó' a kudá' kuúng u sluufimiisá' ar daa'ángw bara/, kudaádá' hootá' baraá loohír gwa/ateemaawók wa ale.

¹⁶ Kudaádá' qwalala/á' tlaatla/aangw sleémeero as kuúng, nee uwa xirfayeemisiyá' as gan'amuuwók.

¹⁷ Kuúng an /uuruuín oo úr, nee as sla'aariroge atén /uuruú arba/ati ugwa slawaán.

¹⁸ Gambór atén ti baqamiim ar AAKOÓ MUNGÚ, waawutmoorén amór i dahhi a amór AAKOÓ MUNGÚ, kudá' Hhoohhoó' oo Israeli.

Al'axweesantá Mungú dír Daudi

¹⁹ Kuúng iimír aange sagadiyuuseerók ana baraá iigu'utúr beér, “Slamángw waawuti'iima ugwa haniís dír heé wák oo pihhu'uumár koóm, ugwa xirfayeés kudá' aníng naa tsawaár baraá tla/ángw múk wa ale.

²⁰ Daudi ugwa tsawaár, sagadiyusmooeé', nee ugwa imbalaáx di/itaeé' tidá' hhohhooe.

²¹ Dakw'eé' oo /uuruú koóm a dinkwa nee inós daqisleém, inós /uuru gu sláy dir'eé' wa ale.

²² Wakuuse gur ba/aká, tam múk tlákw gu mureekeesiiká.

²³ Aníng mukdá' nee inós ti tlaampa'amisá' un naasúw, i hhaameés kudá' sleémeero ngu ahhiitá'.

²⁴ Inkihhimueé' nee sla'aarir'eé' ar warqawaaká ginar hoot, inós umuú daqto arba/tír ur ga sláy ar umuueé'.

²⁵ Aníng dakós oo waawuti'iima un qaás gawaá yaamu sleémeero nee tlabeemo, nee dakós oo doó /iiyáy un qaás gawaá yau.

²⁶ Inós aníng iri ateet iri ooi, ‘Kuúng a baabuúeé' nee Mungúeé'. Kuúng a tlaa/ar'eé' nee ba/amar'eé'.’

²⁷ Aníng inós un bariismoeé' tleéhh, un waawuti'iimár i haniís ta waawituú daanduú yaamuwo.

²⁸ Sla'aarir'eé' ar warqawaaká dirose a baloó gunqareesaaká, nee alqador'eé' i warqeeraaká ay alhhe'eesay wasle.

²⁹ Baraá tlahhaywose waawuti'iima i qutliká, waawuti'iimarós i hartsatángw koondaaká adór doorií wa ale.”

³⁰ “Barnaxes na/'iiwós daber'eé' ngaa mayé', birna hooti'iiká ar adoodá' án naa káh,

³¹ barnaxes kaahir'eé' ngaa waaqaaiyé', nee hara'ayar'eé' ngay eehari'iiká,

³² daqaní inooín aníng in muúx ar hhara asma tlakweema ngiwa tleehhiyé', nee in muúx ar qawaay as tlakweemaín.

³³ Ala aníng Daudi aqo un slaá' ar sla'aarír warqawaaká, slám al'axweesante'eé' a lama tleehhaaká dirose.

³⁴ Alqado a siaaká, laqaá a warqeesaaká tidá' afkwe'eene naa oó'.”

³⁵ “Lo'o aga /aáy wa'aá wake ar hhohhoeemaeé', eeít, lama a tsaataaká dír Daudiwo.

³⁶ Yaeemirós i kumamiit ay kureeraá kureér, nee waawuti'iimarós i kumaamít adór tsee/amá dír geeraeene.

³⁷ Waawuti'iima i hót adór slahhángw wa ale, adór slahhángw gawaá doori tar lamabu'usmoó inkihhimuú koóm.”

Tsuunqusmoó Waawutmoó taa Arbaá/

³⁸ Ala daxta kuúng waawutmoowók kudá' taa imbaláx ugwa i búhh, ugwa geexeér nee kway sí'.

³⁹ Alqadoodá' kuúng taa ó' dír sagadiyusmoowók aga meér, nee slamangós kuduú waawuti'iima ugwa kwáhh baraá teerír i alé.

⁴⁰ Koo/ír gixsarós aga fé/, slumuuwós iga tangu tléhh.

⁴¹ Muruuwós kun fisisín nee múk didár waaraáhh, kun niqimis nee inslaawaywós.

⁴² Kuúng wakuuseerós aga baalír i hanís, wakuuseerós sleémeero aga qwal/ií hanís.

⁴³ Kuúng xooslarós ar slaqwara aga mutsuhhuúr, as kuwa baali baraá slaqwararo.

⁴⁴ Kuúng hhartá waawuti'iima aga hingés dirose, waawuti'iimarós kari yaamaá hara'adát.

⁴⁵ Deelór masoombi'iimarós aga quqmaarés, ugwa murekés.

Firo as Ba/ama

⁴⁶ AAKOÓ MUNGÚ, ay xaylá kuúng ta nahhamaamit, ay alhhe'eesay wasléro? Ay xaylá buhhtaawók i ohaahina' adór asltá wa ale?

⁴⁷ Inslaweek, hotaaeé' kuká' niiná, kuúng atén tina tléhh as tawa qatlaan.

⁴⁸ Heé hoót a gaalá oo gwa'aaká? Heé gwa'ara ilagowto ga aleesláw a heemá?

⁴⁹ Aáko, sla'aarirók ar warqawaaká ar iimír qaro i amá? Aáko, al'axweesantadá' taa al'axwés ar inkihhimuuwók dír Daudi, i amá?

⁵⁰ Aáko, /ooslislíngw sagadiyusmoowók inslaweek, nee adoodá' nira qiqitliím tiwa /ooslislín nee múk yaariír.

⁵¹ AAKOÓ MUNGÚ, wakuuseerók waawutmoowók kudá' taa tsawát ngu niqimisiyá'. Ngu niqimisiyá' umuúqo dír i kaya.

⁵² AAKOÓ MUNGÚ xirfayeemisaak ay alhhe'eesay wasle! Amin Amin!