WARA'AMI 88 - Ya/abtór hho' 1977

Firo as Alee/isaay

(Daa'aangw. Wara'amtá daaqoó Kora. Wara'amtá intsaahhatimiis, ar Hemani aa daá', heé tlahhoó Esra)

¹ AAKOÓ MUNGÚ, ba/amusmooeé', tlaatla/aangw nee xweeraawo án kuúng un i /aa/amiím.

² Firor'eé' axaaseek, /aa/ee'eé' iiárií qaaseek.

³ Slahh'amkuú yaariír iga sláy, tsaxwá aníng niwa gwaa'.

⁴ Aníng taa harafaár dinkwa nee múk afkuú bohóngw gwa'arár i dirií', /uuruueé' sleémeero aa faák.

⁵ Aníng taa kwaáhh baraá tla/ángw tu'u, adór tuaá dír /aantú í diriiá', kudaádá' kuúng ta baloó insleeraaká, kaa saweés diroge.

⁶ Aníng kuúng iga /aytís baraá baa'ár aa tser'et, baraá bohóngw saáw nee oo giíw.

⁷ Buhhtaawók iga al iiloouyé', buhhtaawók iga slahh'eesiyé' adór gwaanduú ma'aay wa ale.

⁸ Iga parátl dír mulqer'eene, aníng aga adór gár dae tlaaq tleehhiít dir'ine, taa baraá doói tseék, tam adór nir kotsqoot i káhh.

⁹ Ilaaeé' naa maa/uutiyé' as slahha'amaaye, AAKOÓ MUNGÚ, kuúng umuú deeloro un i /aa/amamiím, ugwa dabaaeé' i tleés.

¹⁰ Ahaá, kuúng muruú waa/oo/amo uqo tléhha dír múk aa qaatl? Ahaá, gi'i niqo tlayá'a uwa xirfayeemisiya'.

¹¹ Ahaá sla'aarirók ar warqawaaká kaqo alki/iíti dír /aantaro? Laqaá inkihhimuuwók kuqo kaáhi dír ta hhitini?

¹² Xáy, waa/oo/amorók kaqo xuúi baraá giwtiro? Laqaá hhooeemawók kiqo geehhoóe dír múk ta gunqareesi?

¹³ Ala AAKOÓ MUNGÚ, aníng kuúng un i /aa/amiím, umuúqo matlaatlér xawa un fiririím.

¹⁴ AAKOÓ MUNGÚ, asma milá misa amór saáw i kwáhh? Ahaá, masa aníng wa nahhát?

¹⁵ Iimír masoombi'iimar'eene slahha'amu una /aa/aáy tsaxwaá gwa'ara in wa /akumaamiít. Aga ló'wa slahhaá' as muxtaarók.

¹⁶ Buhhtaawók kudá' xaraasla'a iga aldaa/atuúr, haratlatlaangók kuduú /uuru i dae tlaaq nee i hariiáy.

¹⁷ In harwedít adór ma'aá wa/amiimá' tlaatla/aangw sleémeero, nee aníng iga /amatsék bihhe sleémeero.

¹⁸ Kuúng aníng iga parátl dír mulqer'eene nee sla'aaruuser'eene, gár daw a giwti kilós.