WARA'AMI 86 - Ya/abtór hho' 1977

Firo as Alee/isaay

(Firór Daudi)

¹ AAKOÓ MUNGÚ, án iiárií qaasáng, nee mu/aywatsáng, asma aníng a narkutmo nee ti dawa kaahaár.

² Slafingw'eé' amohhe'eeseek, asma aníng a ganaá' dír geeraawoge, anuú sagadiyusmoowók kudá' kuúng u harahhiíf, ba/amisáng.

³ Aakoó Mungú, án gurtlawáng, asma aníng kuúng un i /aa/aamiím tlaatla/aangw sleémeero.

⁴ Muunuú sagadiyusmoowók qwal/aseek, aníng ti amoorógí haniís, Aakoó Mungú.

⁵ Kuúng tu hhoó', Aáko, tu amohhoó' gurtleemuuwo, nee sla'aarirók i warqeeraaká, dír kudá' sleémeero kuúng u ateetimaa'a.

⁶ AAKOÓ MUNGÚ, firor'eé' axaaseek, afor'eé' iiárií qaaseek.

⁷ Bál slahh'amuueene án kuúng u ateét, asma kuúng aníng i mu/aywáts.

⁸ Baraá yaamuuwo Mungú adór kuúng i kaahh, Aáko, tam tlehhma'aá adór tlehhmi'iiwók i kahhiyá'.

⁹ AAKOÓ MUNGÚ, xoorduudá' sleémeero kuúng taa tléhh u i hardahiyá', kuúng turi i tumbarara'amiit, umuuwók kuri xirfayemiis.

¹⁰ Asma kuúng tu úr, kuúng an kudá' tlehhma'aá waa/oo/amór tlehhiít. Kuúng kilók an Mungú.

¹¹ AAKOÓ MUNGÚ, án intsaahhatisáng loohiroge, as kahhó' niwa hoot baraá looeemaawók wa ale. Muunuú tsáp oo ilaiwa/ame haniisang.

¹² Aáko, Mungúeé', aníng kuúng u sluufiís ar muunuúeé' sleémeero. Aníng umuuwók u xirfayeés ay alhhe'eesay wasle.

¹³ Asma sla'aarirók ar warqawaaká ka yaariir dir'eene, hhintlueé' ugwa tú/ baraá gi'ií wa aleeró.

¹⁴ Mungú, múk sage gawdén aníng iga harmagaáhh, mukwí tlákw oo aa barti'ín ay, i slafingw'eé' leelehhiit. Slám Aáko, kuúng u iiárií qamina'aaká.

¹⁵ Ala Aáko, kuúng an Mungú gurtleemu nee oo qeemu, tu inslahheká buhhtaawo, a háts sla'aarír warqawaakahe nee inkihhimuwo.

¹⁶ Aníng na i qaytáng nee gurtlawáng, sagadiyusmoowók /uuruuwók ti hanis, na/oó sagadiyuso'oorók na ba/amiseek.

¹⁷ Aníng layár hhooeemaawók i laqaamáng, kudá' aníng i ahhiitá' layaarí ngi ariye' nee ki murekeesi. Asma AAKOÓ MUNGÚ, aníng kuúng iga alee/ís nee iga gurkwa/ás.