WARA'AMI 84 - Ya/abtór hho' 1977

Qwal/amaayér baraá Doó Mungú

(Wara'amtá daaqoó Kora)

¹ Dír hootawók ka ló'wa sla'atimis, AAKOÓ MUNGÚ Aleesleemusmo!

² Aníng do'ók u ló'wa slaá', AAKOÓ MUNGÚ. Muunaáeé' nee slaqwte'eé' kuúng u saqwalala/iyá'.

³ Siikáy do'ós sleeme gwa tleéhh, nee pareeqamo do' gwa sláy oo i qanhhuusi, bihhaá kitangwduú ilahhooár sluufaay kawa hanmamisa', AÁKO Mungú Aleesleemusmo, waawutmooeé' nee Mungúeé'.

⁴ Kudá' hootá' baraá do'ók wa ale i amohhooár koná', i kuúng xirfayeemisiyá' daqisleém.

⁵ Múk amohhoó' a kudá' /uuruín amoorók daáhh, kudá' Sayunír sla'á' kakaango.

⁶ Qoomár bar taa waaraahh baraá xatstá kaahaar ar ta bay Baka, didá' iri tsiinqár ma'aay tleehhít, tluwoó saxi ga tlahheesí tleehh.

⁷ I kumiitiyá' /uuru slaslaango, ay dír umuúqo heewo i hardihi dír geeraá Mungú amoodár Sayuni.

⁸ AAKOÓ MUNGÚ Aleesleemusmo, firor'eé' iiárií qaaseek. Mungú Yakobo, án iiárií qaasáng.

⁹ Aakoó Mungú, kuúng baqmoorén i qaytsiteek, waawutmoodá' kuúng taa tsawát i qaytsiteek.

¹⁰ Looár wák dír do'oge ka afhhamít, ta hotaá deelór kumér yaariire awa dír hatlá'. A tsiní bar aga sihhimiít dír afkuú Doó Mungú wa ale, ta niwa hoota baraá maraá múk tlákw wa ale.

¹¹ Asma AAKOÓ Mungúrén an gwa/aateema nee an adór gaamboót, AAKOÓ MUNGÚ gurhhooa nee xirif gi kón. Inós ku hhoó' dír mukdaáduú gan'amuú kooma.

¹² AAKOÓ MUNGÚ Aleesleemusámo, heé kuúng u harahhiíf ku amohhoó'.